സെപ്റ്റംബർ 25 മുതൽ 28 വരെ ലെയോ പതിനാലാമൻ മാർപാപ്പ നടത്തിയ ഫ്രാൻസ് സന്ദർശനം ഫ്രാൻസിലെ ജനങ്ങൾക്ക് മാത്രമല്ല, ലോകമെമ്പാടുമുള്ള കത്തോലിക്കർക്കും എന്നും ഓർത്തുവയ്ക്കാൻ തക്കവിധം ചരിത്രപരമായ ഒന്നായിരുന്നു. എന്നിരുന്നാലും, വലിയ ആഘോഷങ്ങൾക്കും ഔദ്യോഗിക ചടങ്ങുകൾക്കുമപ്പുറം, ആരുടെയും ശ്രദ്ധയിൽപെടാതെ പോയ ചില സ്വാഭാവിക നിമിഷങ്ങളും തെരുവുകളിലെ സ്നേഹപ്രകടനങ്ങളും വൈകാരിക നിമിഷങ്ങളും ഈ സന്ദർശനത്തിൽ ഉണ്ടായിരുന്നു.
1. ക്രിസ്തുവിന്റെ മുൾകിരീടത്തിലെ മുള്ള് വണങ്ങി മാർപാപ്പ
പാരിസിലെ നോട്രെ ദാം കത്തീഡ്രൽ സന്ദർശനത്തിനിടെ, പരിശുദ്ധ ദൈവാലയത്തിൽ സൂക്ഷിച്ചിരിക്കുന്ന ഏറ്റവും പ്രധാനപ്പെട്ട തിരുശേഷിപ്പുകളിലൊന്നായ ക്രിസ്തുവിന്റെ മുൾകിരീടത്തിലെ മുള്ള് വണങ്ങി ലെയോ പതിനാലാമൻ മാർപാപ്പ. 2019-ലെ തീപിടിത്തത്തിന് ഏഴ് വർഷങ്ങൾക്ക് ശേഷം പുനരുദ്ധാരണം പൂർത്തിയാക്കിയ കത്തീഡ്രൽ സന്ദർശിച്ച മാർപാപ്പ, അവിടെ സായാഹ്ന പ്രാർഥനയ്ക്ക് (Vespers) നേതൃത്വം നൽകി.
2. ഫ്രാൻസിൽ നിന്നുള്ള 1,700-ലധികം വരുന്ന വിശുദ്ധരുടെ വേഷത്തിലെത്തിയ യുവജനങ്ങൾ
പരിശുദ്ധ പിതാവിനോടൊപ്പമുള്ള ജാഗരണ പ്രാർഥനയിൽ എൺപതിനായിരത്തോളം യുവാക്കളാണ് പങ്കെടുത്തത്. ഫ്രാൻസിലെ 1,700-ലധികം വരുന്ന യുവാക്കൾ, വിശുദ്ധരുടെയും വാഴ്ത്തപ്പെട്ടവരുടെയും വേഷത്തിലെത്തിയപ്പോൾ അത് വിശുദ്ധിയുടെ ഒരു വലിയ സൈന്യത്തിന്റെ തന്നെ പ്രതീതിയുണ്ടാക്കി. ഈ കാഴ്ച പരിശുദ്ധ പിതാവിനെയും ഏറെ വികാരഭരിതനാക്കി.
3. തുറന്ന തെരുവുകൾ ഒരു വലിയ കുമ്പസാരക്കൂടായി മാറി
മാർപാപ്പയുടെ സന്ദർശന വേളയിൽ സോഷ്യൽ മീഡിയയിൽ ഏറെ തരംഗമായ ചിത്രങ്ങളിലൊന്ന് പാരീസിലെ തെരുവുകളിൽ നിന്നുള്ളതായിരുന്നു. പാരീസിലെ തെരുവോരങ്ങളിൽ വൈദികർ ജനങ്ങൾക്ക് കുമ്പസാരം നടത്തിക്കൊടുക്കുന്നതിന്റെ വീഡിയോ ഫ്രഞ്ച് മാധ്യമപ്രവർത്തകനായ പോൾ ലാറൂട്ടൂറൂ (Paul Larrouturou) പങ്കുവച്ചിരുന്നു.
4. ഫ്രാൻസിനെ തൊട്ടുണർത്തിയ ആ അനുഗ്രഹം!
സെപ്റ്റംബർ 26-ന്, പ്ലാസ ഡെല്ലാ കോൺകോർഡിയയിലേക്ക് ദിവ്യബലി അർപ്പിക്കാൻ പോകുന്നതിനിടെ, ലെയോ പതിനാലാമൻ മാർപാപ്പ തന്റെ വാഹനം നിർത്തി ഒരു കൊച്ചുപെൺകുട്ടിയെ അടുത്തുവിളിച്ച് അനുഗ്രഹിച്ചു. ആ ദിവസത്തെ ഏറ്റവും മനോഹരമായ നിമിഷങ്ങളിൽ ഒന്നായിരുന്നു അത്.
5. ഡൗൺ സിൻഡ്രോം ബാധിതരായ ശുശ്രൂഷികൾ
പ്ലേസ് ഡി ലാ കോൺകോർഡിൽ നടന്ന ദിവ്യബലിയിൽ പരിശുദ്ധ പിതാവിനെ സഹായിക്കാൻ 400 അൾത്താര ശുശ്രൂഷികളാണ് ഉണ്ടായിരുന്നത്. അതിൽ ഡൗൺ സിൻഡ്രോം ബാധിച്ച ആറ് ആൺകുട്ടികളും ഉണ്ടായിരുന്നു. ഈ കുട്ടികളുടെ സാന്നിധ്യം ഡൗൺ സിൻഡ്രോം ഉള്ളവരുടെയും, പ്രത്യേകിച്ച് സമൂഹം പാർശ്വവത്കരിച്ച ദുർബലരുടെയും മഹത്വത്തെയും വിലയെയും ഓർമ്മിപ്പിക്കുന്നതായിരുന്നു.
6. ലൂർദിലെ ആ മനോഹര നിമിഷം!
പാരിസിലെ ചടങ്ങുകൾക്ക് ശേഷം, മാർപാപ്പ ലോകത്തിലെ തന്നെ പ്രശസ്തമായ മരിയൻ തീർഥാടന കേന്ദ്രമായ ലൂർദിലെ പരിശുദ്ധ കന്യകാമറിയത്തിന്റെ പുണ്യസങ്കേതത്തിൽ (Sanctuary of Our Lady of Lourdes) എത്തി. അവിടെ ലിഫ്റ്റ് ഉപയോഗിക്കുന്നതിനിടെ, തനിക്കായി പുറത്തു കാത്തുനിന്നവരെ മാർപാപ്പ പുഞ്ചിരിയോടെ അഭിവാദ്യം ചെയ്തത് തീർഥാടകർക്ക് വലിയ സന്തോഷമായി.
7. മാർപാപ്പയ്ക്കായി പാട്ടുപാടിയ കുട്ടികൾ
തന്റെ നാലാമത്തെയും അവസാനത്തെയും ദിവസമായ സെപ്റ്റംബർ 28-ന്, മാർപാപ്പ ലൂർദിൽ നിന്ന് മെറ്റ്സിലേക്ക് (Metz) യാത്ര തിരിച്ചു. വിമാനത്താവളത്തിൽ എത്തിയ പാപ്പയുടെ അനുഗ്രഹം വാങ്ങാനായി ഒരു കൂട്ടം കുട്ടികൾ ആകാംക്ഷയോടെ കാത്തുനിൽക്കുന്നുണ്ടായിരുന്നു. പരിശുദ്ധ പിതാവ് അവരുടെ അടുത്തെത്തി അനുഗ്രഹിച്ചപ്പോൾ, കുട്ടികൾ പാപ്പയ്ക്കായി മനോഹരമായ ഒരു ഗാനം പാടി തങ്ങളുടെ സ്നേഹം പകർന്നു.
