ആഫ്രിക്കൻ വൻകരയുടെ യഥാർഥ വലിപ്പം കൃത്യമായി പ്രതിഫലിപ്പിക്കുന്ന പുതിയ ലോക ഭൂപടം ഉപയോഗിക്കാനുള്ള പ്രമേയം ഐക്യരാഷ്ട്രസഭയുടെ (UN) ജനറൽ അസംബ്ലി വോട്ടെടുപ്പിലൂടെ പാസാക്കി. ടോഗോ അവതരിപ്പിക്കുകയും ആഫ്രിക്കൻ യൂണിയൻ (AU) അംഗങ്ങൾ പിന്തുണയ്ക്കുകയും ചെയ്ത ‘കറക്റ്റ് ദി മാപ്പ്’ (Correct the Map) പ്രമേയത്തെ ഫ്രാൻസ്, ബ്രിട്ടൻ തുടങ്ങിയ രാജ്യങ്ങൾ ഉൾപ്പെടെ 164 രാഷ്ട്രങ്ങൾ പിന്തുണച്ചു. അമേരിക്ക മാത്രമാണ് പ്രമേയത്തിനെതിരെ വോട്ട് ചെയ്തത്; ആറ് രാജ്യങ്ങൾ വോട്ടെടുപ്പിൽ നിന്ന് വിട്ടുനിന്നു.
യു.എന്നിന്റെ ഈ തീരുമാനം നിർബന്ധിത നിയമമല്ലെങ്കിലും, ലോകമെമ്പാടുമുള്ള പ്രമുഖ സ്ഥാപനങ്ങളിൽ ഉപയോഗിക്കുന്ന ഭൂപടങ്ങളിൽ മാറ്റം വരുത്താൻ ഇത് വഴിയൊരുക്കും. പതിനാറാം നൂറ്റാണ്ട് മുതൽ വ്യാപകമായി ഉപയോഗിച്ചുവരുന്ന ‘മെർക്കേറ്റർ മാപ്പ്’ (Mercator map) കടുത്ത വിമർശനങ്ങൾ നേരിട്ടിരുന്നു. ആഫ്രിക്കയെക്കാൾ 14 മടങ്ങ് ചെറുതായ ഗ്രീൻലാൻഡിനെ ആഫ്രിക്കയുടെ അതേ വലിപ്പത്തിലാണ് ഈ ഭൂപടത്തിൽ കാണിച്ചിരുന്നത്. ഭൂമധ്യരേഖയ്ക്ക് സമീപമുള്ള രാജ്യങ്ങളുടെ വികസന ആവശ്യങ്ങളെയും സാധ്യതകളെയും ചെറുതായി കാണാൻ ഇത് ഇടയാക്കുന്നുവെന്ന് വിമർശകർ ചൂണ്ടിക്കാട്ടുന്നു.
യൂറോപ്യൻ നാവികർക്ക് കടൽയാത്രകളിൽ ദിശ മനസ്സിലാക്കാൻ 1569-ൽ ഫ്ലെമിഷ് ഭൂപട നിർമ്മാതാവായ ജെറാർഡസ് മെർക്കേറ്റർ രൂപകൽപ്പന ചെയ്തതാണ് ഈ മാപ്പ്. ഗോളാകൃതിയിലുള്ള ഭൂമിയുടെ ഉപരിതലം ഇരുമാനങ്ങളുള്ള (2D) ഒരു പരന്ന ഭൂപടത്തിലേക്ക് മാറ്റുമ്പോൾ ഉണ്ടാകുന്ന വ്യതിയാനമാണ് ഇതിന് കാരണം. മെർക്കേറ്റർ മാപ്പിൽ ഭൂമധ്യരേഖയോട് അടുത്തുള്ള രാജ്യങ്ങൾ യഥാർഥ വലിപ്പത്തേക്കാൾ ചെറുതായും, ധ്രുവങ്ങളോട് അടുത്തുള്ള രാജ്യങ്ങൾ കൂടുതൽ വലുതായും കാണപ്പെടുന്നു.
ഇത് തിരുത്തുന്നതിനായി 2018-ൽ കാർട്ടോഗ്രാഫർമാരുടെ ഒരു സംഘം ‘ഈക്വൽ എർത്ത്’ (Equal Earth projection) എന്ന പേരിൽ എല്ലാ പ്രദേശങ്ങൾക്കും കൃത്യമായ വലിപ്പം നൽകുന്ന ഒരു ഭൂപടം തയ്യാറാക്കി. ഫെബ്രുവരിയിൽ ആഫ്രിക്കൻ യൂണിയനിലെ 54 അംഗരാജ്യങ്ങളും ഇത് അംഗീകരിക്കുകയും, എല്ലാ വൻകരകളുടെയും പ്രത്യേകിച്ച് ആഫ്രിക്കയുടെയും വലിപ്പം ഇത് കൃത്യമായി കാണിക്കുന്നുവെന്ന് വ്യക്തമാക്കുകയും ചെയ്തു.
