മെൽ ഗിബ്സൺ സംവിധാനം ചെയ്ത ലോകപ്രശസ്ത ക്രിസ്തീയ ചലച്ചിത്രം ‘ദി പാഷൻ ഓഫ് ദി ക്രൈസ്റ്റ്’ (The Passion of the Christ) രണ്ട് പതിറ്റാണ്ടുകൾക്ക് ശേഷം വീണ്ടും തീയേറ്ററുകളിൽ പ്രദർശനത്തിനെത്തുന്നു. റിലീസ് ചെയ്ത് 20 വർഷത്തിലേറെ പിന്നിടുമ്പോൾ, ഒരു ആഴ്ചക്കാലത്തെ പ്രത്യേക പ്രദർശനത്തിനായാണ് ചിത്രം വീണ്ടും തീയേറ്ററുകളിൽ എത്തിച്ചിരിക്കുന്നത്.
തീയേറ്റർ റീ-റിലീസിനൊപ്പം ചിത്രത്തിന്റെ വരാനിരിക്കുന്ന രണ്ടാം ഭാഗമായ ‘ദി റസറക്ഷൻ ഓഫ് ദി ക്രൈസ്റ്റ്’ (The Resurrection of the Christ) എന്ന സിനിമയുടെ ഇതുവരെ പുറത്തുവിടാത്ത ചില ദൃശ്യങ്ങളും അണിയറക്കാഴ്ചകളും പ്രേക്ഷകർക്കായി ഉൾപ്പെടുത്തിയിട്ടുണ്ട്. ലയൺസ്ഗേറ്റിന്റെ (Lionsgate) സഹകരണത്തോടെ സെപ്റ്റംബർ 10 മുതൽ ആരംഭിച്ച പ്രത്യേക പ്രദർശനം സെപ്റ്റംബർ 17 വരെ തീയേറ്ററുകളിൽ തുടരും.
4K വിഷ്വൽ റെസ്റ്റോറേഷനോടെയും അത്യാധുനിക ‘ഡോൾബി അറ്റ്മോസ്’ (Dolby Atmos) ശബ്ദ സാങ്കേതികവിദ്യയോടെയുമാണ് ചിത്രം പുനരവതരിപ്പിച്ചിരിക്കുന്നത്. യേശുക്രിസ്തുവിന്റെ ഉത്ഥാനത്തെയും (Resurrection) സ്വർഗാരോഹണത്തെയും പ്രമേയമാക്കി മെൽ ഗിബ്സൺ ഒരുക്കുന്ന ‘ദി റസറക്ഷൻ ഓഫ് ദി ക്രൈസ്റ്റ്’ എന്ന രണ്ടാം ഭാഗം 2027 മേയിൽ തീയേറ്ററുകളിലെത്തുമെന്നാണ് പ്രതീക്ഷിക്കുന്നത്.
2004-ൽ പുറത്തിറങ്ങിയ ചിത്രം യേശുക്രിസ്തുവിന്റെ അവസാന 12 മണിക്കൂറുകളിലെ പീഡാസഹനങ്ങളെയും കുരിശുമരണത്തെയുമാണ് ദൃശ്യവൽക്കരിച്ചത്. വൻ സാമ്പത്തിക വിജയവും ആഗോളതലത്തിൽ വലിയ ചർച്ചകളും സൃഷ്ടിച്ച ചിത്രമായിരുന്നു ഇത്. പുതിയ തലമുറയിലെ പ്രേക്ഷകർക്ക് ബിഗ് സ്ക്രീനിൽ മികച്ച ദൃശ്യാനുഭവം നൽകാനും, രണ്ടാം ഭാഗത്തിനായുള്ള കാത്തിരിപ്പിന് ആവേശം കൂട്ടാനുമാണ് ഈ പുനഃപ്രദർശനം സംഘടിപ്പിച്ചിരിക്കുന്നത്.
