2009-ൽ അമേരിക്കയിലെ ഫോർട്ട് ഹൂഡ് സൈനിക താവളത്തിൽ വെടിവയ്പ്പ് നടത്തി 14 പേരുടെ മരണത്തിനിടയാക്കിയ മേജർ നിദാൽ മാലിക് ഹസന്റെ വധശിക്ഷ തത്സമയം (Livestream) സംപ്രേക്ഷണം ചെയ്യില്ലെന്ന് യു.എസ്. പ്രസിഡന്റ് ഡൊണാൾഡ് ട്രംപ് വ്യക്തമാക്കി. ഡിസംബർ മൂന്നിനാണ് ഫയറിങ് സ്ക്വാഡ് വഴിയുള്ള ഹസന്റെ വധശിക്ഷ നിശ്ചയിച്ചിരിക്കുന്നത്.
ടെക്സസിലെ കില്ലീനിലുള്ള ഫോർട്ട് ഹൂഡ് സൈനിക താവളത്തിൽ സൈക്യാട്രിസ്റ്റായിരുന്ന നിദാൽ മാലിക് ഹസൻ നടത്തിയ ഭീകരാക്രമണത്തിൽ ഗർഭിണിയായ സ്ത്രീ ഉൾപ്പെടെ 14 പേർ കൊല്ലപ്പെടുകയും 32 പേർക്ക് പരിക്കേൽക്കുകയും ചെയ്തിരുന്നു. ഈ കേസിൽ ഫയറിങ് സ്ക്വാഡ് വഴിയുള്ള വധശിക്ഷ നടപ്പാക്കാനാണ് തീരുമാനിച്ചിട്ടുള്ളത്. എന്നാൽ ഇതിനെതിരെ കത്തോലിക്കാ സഭയും വിവിധ രാഷ്ട്രീയ നേതാക്കളും ശക്തമായ എതിർപ്പ് പ്രകടിപ്പിച്ചിരുന്നു.
വധശിക്ഷ പരസ്യമായി സംപ്രേക്ഷണം ചെയ്യുന്നത് മരണത്തെ ഒരു കാഴ്ചയാക്കി മാറ്റുമെന്നും, ഇത് മനുഷ്യന്റെ അന്തസ്സിനെ ചോദ്യം ചെയ്യുന്നതാണെന്നും യു.എസ്. കത്തോലിക്കാ മെത്രാന്മാരും വത്തിക്കാനും വ്യക്തമാക്കുകയുണ്ടായി. വധശിക്ഷ ഒരുകാലത്തും അംഗീകരിക്കാനാവാത്തതാണെന്നും അത് മനുഷ്യന്റെ പവിത്രതയ്ക്ക് എതിരാണെന്നും മാർപാപ്പയും പ്രതികരിച്ചിരുന്നു. ഇതേതുടർന്ന് ഇരു രാഷ്ട്രീയ കക്ഷികളിൽ നിന്നും വലിയ തോതിലുള്ള വിമർശനങ്ങളാണ് ട്രംപിന് നേരിടേണ്ടി വന്നത്.
