പാലസ്തീനിലെ പൂർണ്ണമായും ക്രിസ്ത്യൻ ജനവിഭാഗം അധിവസിക്കുന്ന ചരിത്രപ്രസിദ്ധമായ തയ്ബ ഗ്രാമത്തിനു നേരെ കുടിയേറ്റക്കാർ നടത്തുന്ന തീവ്രവാദ ആക്രമണങ്ങളെ ഇസ്രായേൽ സ്ഥാനപതി നിസ്സാരവത്കരിച്ച് സംസാരിച്ചതിൽ കടുത്ത പ്രതിഷേധവുമായി പ്രാദേശിക ക്രിസ്ത്യൻ സമൂഹം. അക്രമികൾക്കെതിരെ രാജ്യാന്തരതലത്തിലുള്ള ശക്തമായ നടപടികൾ വേണമെന്ന് അവർ ആവശ്യപ്പെട്ടു.
അടുത്തിടെ തയ്ബ ഗ്രാമത്തിലെ ഒലിവ് തോട്ടങ്ങളും വീടുകളും വാഹനങ്ങളും ആക്രമിക്കപ്പെടുകയും തീവച്ച് നശിപ്പിക്കപ്പെടുകയും ചെയ്തിരുന്നു. എന്നാൽ, ഈ ആക്രമണങ്ങൾ ഒറ്റപ്പെട്ട സംഭവങ്ങളാണെന്നും അതിരൂക്ഷമായ പ്രശ്നങ്ങളില്ലെന്നുമാണ് വത്തിക്കാനിലെ ഇസ്രായേൽ അംബാസഡർ അഭിപ്രായപ്പെട്ടത്. ഇസ്രായേൽ കുടിയേറ്റക്കാരുടെ ഭാഗത്ത് നിന്നുണ്ടാകുന്ന നിരന്തരമായ അക്രമങ്ങളെയും ഭീഷണികളെയും ലഘൂകരിച്ചു കാണിക്കാനാണ് സ്ഥാനപതി ശ്രമിക്കുന്നതെന്ന് ഗ്രാമവാസികളും സഭാനേതാക്കളും ആരോപിക്കുന്നു.
തയ്ബയിലെ പ്രധാന ജീവനോപാധിയായ ഒലിവ് കൃഷിയും തോട്ടങ്ങളും ലക്ഷ്യമിട്ടാണ് പ്രധാനമായും ആക്രമണങ്ങൾ നടക്കുന്നത്. വിളവെടുപ്പ് കാലത്ത് അക്രമികൾ തോക്കുകളും മറ്റ് ആയുധങ്ങളുമായെത്തി കർഷകരെ ഭീഷണിപ്പെടുത്തുന്നത് പതിവായിരിക്കുകയാണ്. വിശുദ്ധനാട്ടിലെ പുരാതന ക്രിസ്ത്യൻ സാന്നിധ്യത്തെ തന്നെ ഇല്ലാതാക്കുന്ന രീതിയിലാണ് ആക്രമണങ്ങൾ തുടരുന്നത്. അതിനാൽ ഇസ്രായേൽ സർക്കാരിൽ സമ്മർദം ചെലുത്തി തങ്ങൾക്ക് സുരക്ഷ ഉറപ്പാക്കാൻ വത്തിക്കാനും അന്താരാഷ്ട്ര സമൂഹവും ഇടപെടണമെന്ന് തയ്ബയിലെ ക്രിസ്ത്യാനികൾ ആഹ്വാനം ചെയ്തു.
