ലെയോ പാപ്പ സന്ദർശിക്കുന്ന ലാറ്റിൻ അമേരിക്കൻ രാജ്യങ്ങളിലെ കത്തോലിക്കാ സഭയുടെ സ്ഥിതിവിവരക്കണക്കുകൾ

ലെയോ പതിനാലാമൻ മാർപാപ്പയുടെ ആദ്യ ലാറ്റിൻ അമേരിക്കൻ അപ്പസ്തോലിക സന്ദർശനത്തിന് മുന്നോടിയായി, സന്ദർശനം നടക്കുന്ന രാജ്യങ്ങളിലെ കത്തോലിക്കാ സഭയുടെ ഔദ്യോഗിക സ്ഥിതിവിവരക്കണക്കുകൾ വത്തിക്കാൻ പുറത്തുവിട്ടു. നവംബർ ആറു മുതൽ 17 വരെയാണ് മാർപാപ്പ ഉറുഗ്വേ, അർജന്റീന, പെറു എന്നീ രാജ്യങ്ങൾ സന്ദർശിക്കുന്നത്.

ലാറ്റിൻ അമേരിക്കൻ രാജ്യങ്ങളിലെ സഭയുടെ സാമൂഹികവും മതപരവുമായ പങ്കാളിത്തത്തിൽ ഊന്നിക്കൊണ്ടുള്ളതാണ് വത്തിക്കാൻ പുറത്തുവിട്ട പുതിയ കണക്കുകൾ. വരാനിരിക്കുന്ന പര്യടനം ഈ രാജ്യങ്ങളിലെ വിശ്വാസസമൂഹത്തിന് വലിയൊരു ആത്മീയ ഉണർവേകുമെന്നാണ് പ്രതീക്ഷിക്കുന്നത്. സന്ദർശനത്തിന്റെ ഭാഗമായി വിവിധ തലത്തിലുള്ള ഔദ്യോഗിക കൂടിക്കാഴ്ചകളും കത്തോലിക്കാസഭയുടെ നേതൃത്വത്തിലുള്ള കാരുണ്യ-വിദ്യാഭ്യാസ പ്രവർത്തനങ്ങളുടെ അവലോകനവും നടക്കും.

ഉറുഗ്വേ

മാർപാപ്പയുടെ സന്ദർശന പട്ടികയിലെ ആദ്യ രാജ്യമായ ഉറുഗ്വേയിൽ 2024-ലെ കണക്കനുസരിച്ച് 27.54 ലക്ഷം കത്തോലിക്കരുണ്ട്. ഇത് രാജ്യത്തെ ആകെ 35.79 ലക്ഷം വരുന്ന ജനസംഖ്യയുടെ ഏകദേശം 77 ശതമാനത്തോളമാണ്. ഒൻപത് സഭാ ഭരണപ്രദേശങ്ങളും 238 ഇടവകകളും 369 വൈദികരും അടങ്ങുന്നതാണ് ഇവിടുത്തെ സഭാസംവിധാനം. കൂടാതെ 97 സ്ഥിരം ഡീക്കന്മാരും, 436 സന്ന്യാസിനികളും, 71 മേജർ സെമിനാരി വിദ്യാർഥികളും ഇവിടെയുണ്ട്.

1980-ൽ 587 ആയിരുന്ന വൈദികരുടെ എണ്ണം കുറഞ്ഞതായി ഈ കണക്കുകൾ വ്യക്തമാക്കുന്നു. അതേകാലയളവിൽ സന്ന്യാസിനികളുടെ എണ്ണം 1,621-ൽ നിന്നും കുറയുകയും, പ്രതിവർഷം നടക്കുന്ന മാമോദീസകളുടെ എണ്ണം 41,673-ൽ നിന്ന് 11,066 ആയി താഴുകയും ചെയ്തു. സഭയുടെ വിദ്യാഭ്യാസ സ്ഥാപനങ്ങളിൽ 72,600 വിദ്യാർഥികൾ പഠിക്കുന്നുണ്ട്. ജീവകാരുണ്യ-ക്ഷേമ സ്ഥാപനങ്ങളുടെ എണ്ണം 149 ആണ്.

സന്ദർശനത്തിനിടെ, ഉറുഗ്വേയുടെ സംരക്ഷകപരിശുദ്ധയായ ‘ഔർ ലേഡി ഓഫ് ദി തേർട്ടി-ത്രീ’ (Our Lady of the Thirty-Three) യുടെ തീർഥാടന കേന്ദ്രം സ്ഥിതിചെയ്യുന്ന ഫ്ലോറിഡയിൽ മാർപാപ്പ വിശുദ്ധ കുർബാന അർപ്പിക്കും.

അർജന്റീന

പാപ്പയുടെ സന്ദർശനം നടക്കുന്ന മൂന്ന് രാജ്യങ്ങളിൽ വച്ച് ഏറ്റവും കൂടുതൽ കത്തോലിക്കാ ജനസംഖ്യയുള്ളത് അർജന്റീനയിലാണ്. 4.317 കോടി കത്തോലിക്കാ വിശ്വാസികളാണ് ഇവിടെ ഉള്ളത്. ഇത് രാജ്യത്തെ ആകെ 4.7068 കോടി വരുന്ന ജനസംഖ്യയുടെ 92 ശതമാനത്തിലധികമാണ്. 73 സഭാ ഭരണപ്രദേശങ്ങളും 2,971 ഇടവകകളും ഉൾപ്പെടുന്നതാണ് അവിടുത്തെ സഭാസംവിധാനം. 5,137 വൈദികരും 1,268 സ്ഥിരം ഡീക്കന്മാരും 5,921 സന്ന്യാസിനികളും 871 മേജർ സെമിനാരി വിദ്യാർഥികളും ഇവിടെയുണ്ട്.

സഭയുടെ കീഴിൽ പ്രവർത്തിക്കുന്ന സ്കൂളുകളിലും സർവകലാശാലകളിലുമായി 15,56,606 (15.56 ലക്ഷത്തിലധികം) വിദ്യാർഥികൾ പഠിക്കുന്നു. കൂടാതെ, രാജ്യത്തെ ജീവകാരുണ്യ-ക്ഷേമ സ്ഥാപനങ്ങളുടെ എണ്ണം 3,345 ആണ്. ഈ മൂന്ന് രാജ്യങ്ങളിലും വച്ച് ഏറ്റവും ഉയർന്ന നിരക്കാണിത്.

അർജന്റീനയിലെ സന്ദർശനവേളയിൽ, ക്ലേപോൾ (Claypole) എന്ന സ്ഥലത്തുള്ള ‘പെക്വീന്യോ കോട്ടോലെംഗോ ഡോൺ ഒറിയോൺ’ എന്ന പരിചരണ കേന്ദ്രവും മാർപാപ്പ സന്ദർശിക്കും.

പെറു

പെറുവിൽ 3.1074 കോടി കത്തോലിക്കരുണ്ട് എന്നാണ് കണക്കുകൾ സൂചിപ്പിക്കുന്നത്. ഇത് രാജ്യത്തെ ആകെ 3.4038 കോടി വരുന്ന ജനസംഖ്യയുടെ 91 ശതമാനത്തിലധികമാണ്. 46 സഭാ ഭരണപ്രദേശങ്ങളിലും 1,710 ഇടവകകളിലുമായി 3,246 വൈദികരും 71 സ്ഥിരം ഡീക്കന്മാരും 4,720 സന്ന്യാസിനികളും 864 മേജർ സെമിനാരി വിദ്യാർഥികളും ഇവിടെയുണ്ട്.

1980-ൽ 2,233 ആയിരുന്ന വൈദികരുടെ എണ്ണത്തിൽ വർധനവുണ്ടായിട്ടുണ്ടെങ്കിലും, 2020-ലെ ആകെ എണ്ണമായ 3,292-ൽ നിന്നും നേരിയ കുറവ് രേഖപ്പെടുത്തി. 2010-ൽ 2,077 ആയിരുന്ന മേജർ സെമിനാരി വിദ്യാർഥികളുടെ എണ്ണത്തിലും കുറവുണ്ടായി.

സഭയുടെ വിദ്യാഭ്യാസ സ്ഥാപനങ്ങളിൽ നിലവിൽ 5,71,482 വിദ്യാർഥികൾ പഠനം നടത്തുന്നുണ്ട്. പെറുവിൽ സഭയുടെ നേതൃത്വത്തിൽ നടത്തപ്പെടുന്ന ജീവകാരുണ്യ-ക്ഷേമ സ്ഥാപനങ്ങളുടെ എണ്ണം 1,219 ആണ്.