അമേരിക്കയിലെ നോട്ര ഡാം സർവകലാശാലയിലുള്ള ‘നിക്കോള സെന്റർ ഫോർ എത്തിക്സ് ആൻഡ് കൾച്ചർ’, തങ്ങളുടെ 2027-ലെ ‘ഇവാഞ്ചലിയം വീത്തേ’ (Evangelium Vitae) മെഡൽ ‘ഡൊമിനിക്കൻ സിസ്റ്റേഴ്സ് ഓഫ് ഹോത്തോൺ’ സന്ന്യാസിനി സമൂഹത്തിന് നൽകുമെന്ന് ഒക്ടോബർ നാലിന് പ്രഖ്യാപിച്ചു. പാവപ്പെട്ടവർക്കും മരണാസന്നരായവർക്കും ഒരു നൂറ്റാണ്ടിലധികമായി നൽകിവരുന്ന സത്യവും സ്നേഹവും നിറഞ്ഞ സേവനങ്ങളെ മാനിച്ചാണ് ഈ പുരസ്കാരം.
2027 ഏപ്രിൽ 24-ന് സർവകലാശാലയിൽ നടക്കുന്ന പ്രത്യേക വിശുദ്ധ കുർബാനയ്ക്കും വിരുന്നിനും ഇടയിൽ, സന്ന്യാസിനി സമൂഹത്തിന്റെ സുപ്പീരിയർ ജനറലായ മദർ മേരി എഡ്വേർഡിന് (OP) പുരസ്കാരം സമ്മാനിക്കുമെന്ന് നിക്കോള സെന്റർ അറിയിച്ചു. സെന്റർ നൽകുന്ന ഈ പുരസ്കാരത്തിന്റെ 16-ാമത് വാർഷിക പതിപ്പാണിത്.
പ്രശസ്ത നോവലിസ്റ്റ് നഥാനിയൽ ഹോത്തോണിന്റെ മകളായ മദർ മേരി അൽഫോൺസ (റോസ് ഹോത്തോൺ) 1900-ൽ സ്ഥാപിച്ച ഈ സന്ന്യാസിനി സമൂഹത്തിന്റെ ആസ്ഥാനം ന്യൂയോർക്കിലെ ഹോത്തോണിലാണ്. ക്യാൻസർ ബാധിച്ച് മരണാസന്നരായ പാവപ്പെട്ട സ്ത്രീപുരുഷന്മാരെ പരിചരിക്കുന്നതിനായിട്ടാണ് ഈ സഹോദരിമാർ തങ്ങളുടെ ജീവിതം സമർപ്പിച്ചിരിക്കുന്നത്.
സഹോദരിമാർ തങ്ങളുടെ പ്രവർത്തനങ്ങളിലൂടെ “ദൈവത്തിന്റെ കരുണ തന്നെയാണ് ചൊരിയുന്നത്” എന്ന് നോട്ര ഡാം റെക്ടർ ഫാ. റോബർട്ട് ഡൗഡ് (CSC) പത്രക്കുറിപ്പിൽ പറഞ്ഞു. സർവകലാശാലയിലെ എത്തിക്സ് സെന്റർ ഡയറക്ടറായ ജെന്നിഫർ ന്യൂസം മാർട്ടിൻ, സന്ന്യാസിനിമാരെ “ക്രിസ്തീയ സ്നേഹത്തിന്റെ ഉജ്ജ്വലമായ മാതൃക” എന്ന് വിശേഷിപ്പിച്ചു.
‘റെസ്പെക്ട് ലൈഫ് സൺഡേ’യിലാണ് (Respect Life Sunday) ഇവാഞ്ചലിയം വീത്തെ മെഡൽ വർഷം തോറും സമ്മാനിക്കുന്നത്. മനുഷ്യജീവിതത്തിന്റെ അന്തർലീനമായ അന്തസ്സിനെയും, ഏറ്റവും നിർധനരായവരെ പരിചരിക്കേണ്ടതിന്റെയും സംരക്ഷിക്കേണ്ടതിന്റെയും ആവശ്യകതയെയും കുറിച്ച് പ്രതിപാദിക്കുന്ന, വിശുദ്ധ ജോൺ പോൾ രണ്ടാമൻ മാർപാപ്പയുടെ 1995-ലെ പ്രശസ്തമായ ‘ഇവാഞ്ചലിയം വീത്തേ’ എന്ന ശ്ലീഹാസന്ദേശത്തിന്റെ (Encyclical) പേരാണ് ഈ പുരസ്കാരത്തിന് നൽകിയിരിക്കുന്നത്.
1926-ൽ അന്തരിച്ച മദർ മേരി അൽഫോൺസയെ, ഈ സന്ന്യാസിനി സമൂഹത്തിന്റെ ആസ്ഥാനമായ റോസറി ഹിൽ ഹോമിലാണ് അടക്കം ചെയ്തിരിക്കുന്നത്. 2024-ൽ ഫ്രാൻസിസ് മാർപാപ്പ ഇവരെ ‘ധന്യ’ (Venerable) ആയി പ്രഖ്യാപിച്ചിരുന്നു.
