സെപ്റ്റംബർ നാലിന് ആഞ്ചലൂസ് പ്രാർഥനയ്ക്ക് ശേഷം സംസാരിക്കവെ, ഒക്ടോബർ മാസത്തിൽ സമാധാനത്തിനായുള്ള ജപമാല പ്രാർഥനയിൽ പങ്കാളികളാകുന്ന ആയിരക്കണക്കിന് കുട്ടികൾക്ക് ലെയോ പതിനാലാമൻ മാർപാപ്പ നന്ദി രേഖപ്പെടുത്തി. ലോകത്തിന്റെ വിവിധ ഭാഗങ്ങളിൽ സായുധ പോരാട്ടങ്ങൾ തുടരുന്ന സാഹചര്യത്തിൽ, ഈ കുട്ടികളുടെ മാതൃക പിന്തുടരാൻ പാപ്പ തിരുസഭയോട് ആവശ്യപ്പെട്ടു.
യുദ്ധങ്ങൾ അവസാനിക്കുന്നതിനും സമാധാനം കെട്ടിപ്പടുക്കുന്നതിനുമായി ഒക്ടോബർ മാസത്തിൽ ജപമാല ചൊല്ലി പ്രാർഥിക്കാൻ കഴിഞ്ഞ ആഴ്ച ലൂർദിൽ വച്ച് താൻ നൽകിയ ആഹ്വാനം പരിശുദ്ധ പിതാവ് വീണ്ടും ഓർമ്മിപ്പിച്ചു. “യുദ്ധങ്ങൾ അവസാനിക്കണമെന്നും സമാധാനം പുലരണമെന്നുമുള്ള പ്രത്യേക നിയോഗത്തോടെ ഈ ഒക്ടോബർ മാസത്തിൽ ജപമാല ചൊല്ലാൻ കഴിഞ്ഞ ഞായറാഴ്ച ലൂർദിൽ വച്ച് ഞാൻ ഏവരെയും ക്ഷണിച്ചിരുന്നു,” പാപ്പ പറഞ്ഞു.
ഒക്ടോബർ ഒന്നു മുതൽ ഏഴ് വരെ നടത്തുന്ന ‘എയ്ഡ് ടു ദി ചർച്ച് ഇൻ നീഡ്’ (ACN) ഫൗണ്ടേഷന്റെ “ലോകത്തിലെ സമാധാനത്തിനും ഐക്യത്തിനുമായി ഒരു ദശലക്ഷം കുട്ടികൾ പരിശുദ്ധ ജപമാല ചൊല്ലി പ്രാർഥിക്കുന്നു” എന്ന സംരംഭത്തെ പാപ്പ പ്രത്യേകമായി ചൂണ്ടിക്കാണിച്ചു.
“ഈ പ്രാർഥനയിൽ പങ്കുചേരുന്ന ലോകമെമ്പാടുമുള്ള എല്ലാ കുട്ടികൾക്കും ഞാൻ ആത്മാർഥമായി നന്ദി പറയുന്നു. കൊച്ചുകുട്ടികളുടെ ഈ മാതൃക പിന്തുടരാൻ അദ്ദേഹം എല്ലാ വിശ്വാസികളോടും അഭ്യർഥിച്ചു. എല്ലാ ജനങ്ങളെയും യുദ്ധത്തിന്റെ ദുരിതങ്ങളിൽ നിന്ന് മോചിപ്പിക്കുന്നതിനായി പരിശുദ്ധ കന്യകാമറിയത്തിന്റെ മധ്യസ്ഥത അപേക്ഷിച്ച് നമുക്ക് ആ കുട്ടികളുടെ മാതൃക പിന്തുടരാം,” മാർപാപ്പ പറഞ്ഞു. അക്രമത്തിന്റെ പ്രത്യാഘാതങ്ങൾ അനുഭവിക്കുന്നവർക്കായി പരിശുദ്ധ പിതാവ് പ്രത്യേക അഭ്യർഥന നടത്തി. “വിശേഷാൽ, വിശുദ്ധ നാടിനും അക്രമത്തിന്റെ ഇരകളായ നിരപരാധികൾക്കുമായി നമുക്ക് പ്രാർഥിക്കാം,” പാപ്പ കൂട്ടിച്ചേർത്തു.
‘അമോറിസ് ലെത്തീഷ്യ’ (Amoris Laetitia) എന്ന അപ്പസ്തോലിക പ്രബോധനത്തിന്റെ പത്താം വാർഷികത്തോടനുബന്ധിച്ച് ഒക്ടോബർ ഏഴു മുതൽ 14 വരെ വത്തിക്കാനിൽ യോഗം ചേരുമെന്നും പാപ്പ പ്രസംഗത്തിൽ അനുസ്മരിച്ചു.
