സുഡാൻ, ഉക്രൈൻ, റഷ്യ എന്നിവിടങ്ങളിൽ വർധിച്ചുവരുന്ന സംഘർഷങ്ങളും അക്രമങ്ങളും ഉടനടി അവസാനിപ്പിക്കണമെന്ന് ആഹ്വാനം ചെയ്ത് ലെയോ പതിനാലാമൻ മാർപാപ്പ. ഞായറാഴ്ച വത്തിക്കാനിലെ സെന്റ് പീറ്റേഴ്സ് സ്ക്വയറിൽ പരമ്പരാഗത അഞ്ചലൂസ് പ്രാർഥനയ്ക്കു ശേഷം തീർഥാടകരെയും വിശ്വാസികളെയും അഭിസംബോധന ചെയ്തു സംസാരിക്കുകയായിരുന്നു പാപ്പ.
യുദ്ധത്തിനും അക്രമങ്ങൾക്കും പകരം നയതന്ത്ര ചർച്ചകൾക്കും മാനുഷിക സഹായങ്ങൾക്കും അന്താരാഷ്ട്ര നിയമങ്ങൾ പാലിക്കുന്നതിനും ആഗോളനേതാക്കൾ മുൻഗണന നൽകണമെന്ന് പാപ്പ അഭ്യർഥിച്ചു. മാസങ്ങളായി ഉപരോധത്തിൽ കഴിയുന്ന സുഡാനിലെ ‘എൽ-ഒബെയ്ദ്’ നഗരത്തിലെ ജനങ്ങളുടെ ദയനീയ സ്ഥിതിയിൽ മാർപാപ്പ കടുത്ത ആശങ്ക പ്രകടിപ്പിച്ചു. അവിടെ ഭക്ഷണവും കുടിവെള്ളവും മരുന്നുകളും ലഭിക്കാതെ ജനങ്ങൾ നേരിടുന്ന രൂക്ഷമായ ക്ഷാമം പരിഹരിക്കാൻ അടിയന്തരമായി മാനുഷിക ഇടനാഴികൾ അനുവദിക്കണമെന്നും പാപ്പ ഭരണാധികാരികളോട് ആവശ്യപ്പെട്ടു.
ഐക്യരാഷ്ട്രസഭയുടെ കണക്കുകൾ പ്രകാരം സുഡാനിൽ തുടരുന്ന സംഘർഷങ്ങൾ മൂലം 1.4 കോടിയിലധികം ആളുകൾ ഭവനരഹിതരാക്കപ്പെടുകയും കടുത്ത പട്ടിണിയിലാവുകയും ചെയ്തിട്ടുണ്ട്. ഉക്രൈനിലും റഷ്യയിലും തുടരുന്ന യുദ്ധത്തിൽ നിരപരാധികളായ സാധാരണക്കാർ കൊല്ലപ്പെടുന്നതിലും പരിക്കേൽക്കുന്നതിലും മാർപാപ്പ അനുശോചനം രേഖപ്പെടുത്തി. അക്രമത്തിന്റെ പാത അവസാനിപ്പിച്ച് സംഭാഷണങ്ങൾക്കും സമാധാന ശ്രമങ്ങൾക്കും വഴിതുറക്കണമെന്നും പാപ്പ ആഹ്വാനം ചെയ്തു.
