റോമിലെ കൊറിയൻ പൊന്തിഫിക്കൽ കോളേജിന്റെ 25-ാം വാർഷികാഘോഷങ്ങളുടെ ഭാഗമായി കൊറിയൻ വൈദികരുമായി കൂടിക്കാഴ്ച നടത്തി ലെയോ പതിനാലാമൻ പാപ്പ. കൂടിക്കാഴ്ചയിൽ കൊറിയൻ ജനതയുടെ വിശ്വാസ യാത്രയെ മാർപാപ്പ പ്രത്യേകം അനുസ്മരിച്ചു. 2027-ൽ സിയൂളിൽ (Seoul) നടക്കാനിരിക്കുന്ന ലോക യുവജന ദിനത്തിനായുള്ള ഒരുക്കങ്ങൾ പുരോഗമിക്കവേയാണ് ഈ കൂടിക്കാഴ്ച നടന്നത്.
കൊറിയൻ സഭയുടെ ഈ വളർച്ച അവിടെയുള്ള രക്തസാക്ഷികളുടെ സാക്ഷ്യത്തിൽ ഉറച്ചുനിൽക്കുന്നതാണെന്ന് മാർപാപ്പ ഊന്നിപ്പറഞ്ഞു. കടുത്ത പീഡനങ്ങൾ, വിനാശകരമായ യുദ്ധങ്ങൾ, ദാരിദ്ര്യം, രാജ്യത്തിന്റെ വിഭജനം എന്നിവയെല്ലാം അതിജീവിച്ച് കൊറിയൻ കത്തോലിക്കർ പ്രതിസന്ധികളെ നിരന്തരം തരണം ചെയ്തു. “ചരിത്രത്തിലുടനീളം കൊറിയൻ ജനത അസാധാരണമായ ആത്മവീര്യം പ്രദർശിപ്പിച്ചിട്ടുണ്ട്,” ലെയോ മാർപാപ്പ പറഞ്ഞു.
“പ്രതീക്ഷ കൈവിടാതെയും കഷ്ടപ്പാടുകൾ ഹൃദയത്തെ കഠിനമാക്കാൻ അനുവദിക്കാതെയും കഠിനമായ പരീക്ഷണങ്ങളിലൂടെ കടന്നുപോകാൻ സാധിച്ചത് ദൈവകൃപയുടെ ശക്തമായ തെളിവാണ്,” പാപ്പ കൂട്ടിച്ചേർത്തു. സഭയുടെ ചരിത്രത്തിൽ നിന്ന് പ്രചോദനം ഉൾക്കൊണ്ട മാർപാപ്പ, ധന്യനായ തോമസ് ചോ യാങ്-ഇയോപിന്റെ നിഷ്കാമമായ സേവനങ്ങളെ എടുത്തുപറഞ്ഞു. സുവിശേഷ വെളിച്ചം എത്തിക്കുന്നതിനായി വിദൂര ഗ്രാമങ്ങളിലേക്ക് മൈലുകളോളം നടന്നു സഞ്ചരിച്ച ഫാദർ ചോ, ഇന്നത്തെ വൈദിക സേവനത്തിന് മാതൃകയാണെന്ന് മാർപാപ്പ അഭിപ്രായപ്പെട്ടു.
വിവിധ രൂപതകളിൽ നിന്നും പശ്ചാത്തലങ്ങളിൽ നിന്നുമുള്ള വൈദികരുടെ സാന്നിധ്യം ചൂണ്ടിക്കാട്ടി, സഭയിലെ പരസ്പര കൂട്ടായ്മയ്ക്കും ഐക്യത്തിനും മാർപാപ്പ ആഹ്വാനം ചെയ്തു. പ്രാദേശിക വ്യത്യാസങ്ങൾ മാറ്റിവച്ച് പരസ്പരം ശ്രവിക്കുന്നതിലൂടെ, ക്രിസ്തുവിലൂടെ ഒരേ പാതയിൽ മുന്നേറുന്ന ഏകീകൃത സഭയെയാണ് വൈദികർ പ്രതിഫലിപ്പിക്കുന്നതെന്നും പാപ്പ കൂട്ടിച്ചേർത്തു.
ഒടുവിൽ, 2027-ൽ ലോകമെമ്പാടുമുള്ള കത്തോലിക്കാ യുവാക്കളെ സ്വീകരിക്കാൻ ഒരുങ്ങുമ്പോൾ, കൊറിയൻ വൈദികരുടെ മധ്യസ്ഥനായ വിശുദ്ധ ആൻഡ്രൂ കിം തെയ്ഗോണിന്റെ (St. Andrew Kim Taegon) മാധ്യസ്ഥ്യം തേടി പ്രാർഥനയിൽ അധിഷ്ഠിതമായി വേണം എല്ലാ ഒരുക്കങ്ങളും നടത്താനെന്ന് മാർപാപ്പ ഓർമ്മിപ്പിച്ചു.
