ആഫ്രിക്കയുടെ ഹൃദയം എന്നറിയപ്പെടുന്ന മലാവിയിൽ കത്തോലിക്കാ സഭ തന്റെ സുവിശേഷ ദൗത്യത്തിന്റെ 125-ാം വാർഷികം (ജൂബിലി) ആഘോഷിക്കുകയാണ്. ഒരു നൂറ്റാണ്ടിലധികം മുൻപ്, വളരെ ലളിതമായി ആരംഭിച്ച ഈ ആത്മീയ പ്രയാണം ഇന്ന് ദശലക്ഷക്കണക്കിന് വിശ്വാസികളുള്ള വലിയൊരു സഭയായി വളർന്നു പന്തലിച്ചിരിക്കുന്നു. ചരിത്രപരമായ തിരിച്ചടികളെയും പ്രതിസന്ധികളെയും അതിജീവിച്ച് ആഫ്രിക്കൻ മണ്ണിൽ കത്തോലിക്കാ വിശ്വാസം ഇന്നും ശക്തമായി മുന്നേറുന്നു എന്നതിന്റെ സാക്ഷ്യമാണ് ഇവിടത്തെ ജൂബിലി ആഘോഷം.
പൂർവികർ വിതച്ച വിശ്വാസത്തിന്റെ വിത്തുകൾ
1890-കളുടെ അവസാനത്തിൽ ‘വൈറ്റ് ഫാദേഴ്‌സ്’ എന്നറിയപ്പെടുന്ന വൈദികരുടെയും മിഷനറിമാരുടെയും കഠിനാധ്വാനത്തിലൂടെയാണ് മലാവിയിൽ കത്തോലിക്കാ വിശ്വാസത്തിന്റെ വിത്ത് പാകപ്പെടുന്നത്. 1901-ൽ സ്ഥാപിക്കപ്പെട്ട ആദ്യത്തെ മിഷൻ കേന്ദ്രങ്ങളിൽ നിന്ന് ആരംഭിച്ച്, പ്രാദേശിക ഭാഷയും സംസ്കാരവും പഠിച്ച് മിഷനറിമാർ നടത്തിയ പ്രവർത്തനങ്ങൾ വളരെ വേഗത്തിൽ ജനഹൃദയങ്ങളിലേക്ക് ഇറങ്ങിച്ചെന്നു. ആദ്യകാലങ്ങളിൽ മതിയായ ആരോഗ്യ സംരക്ഷണത്തിനുള്ള സൗകര്യങ്ങൾ ഇവിടെ ഉണ്ടായിരുന്നില്ല. ആ സമയത്ത് ഉൾഗ്രാമങ്ങളിൽ ആശുപത്രികളും ക്ലിനിക്കുകളും സ്ഥാപിച്ച് പാവപ്പെട്ടവർക്ക് മെച്ചപ്പെട്ട ചികിത്സ ലഭ്യമാക്കാൻ മിഷനറിമാർക്ക് കഴിഞ്ഞു.
ഇതിനൊപ്പം തന്നെ പ്രാദേശിക തലത്തിൽ വിശ്വാസം കൂടുതൽ കരുത്തുള്ളതാക്കാൻ അവർ കൂടുതൽ പരിശ്രമിച്ചു. പ്രാദേശിക മിഷനറിമാരെയും വൈദികരെയും വാർത്തെടുക്കുന്നതിനും പൂർവികർ പ്രത്യേകം ശ്രദ്ധ ചെലുത്തിയിരുന്നു. ഇപ്രകാരം വളരെ ദീർഘവീക്ഷണത്തോടു കൂടി നടത്തിയ പ്രവർത്തനങ്ങളുടെ ഫലമാണ് ഇന്ന് വലിയ രീതിയിൽ കാണുന്ന വിശ്വാസ വളർച്ച.
അതിവേഗം വളരുന്ന സഭയും ആത്മീയ നവീകരണവും
മലാവിയിൽ ഇന്ന് ആകെ ജനസംഖ്യയുടെ വലിയൊരു ശതമാനം കത്തോലിക്കാ വിശ്വാസികളാണ്. യൂറോപ്പിൽ പലയിടത്തും ദൈവാലയങ്ങളിൽ ആളുകളുടെ എണ്ണം കുറയുമ്പോൾ, മലാവിയിലെ പള്ളികളിൽ ഞായറാഴ്ചകളിൽ നടക്കുന്ന ദിവ്യബലികളിലും പ്രാർഥനാ കൂട്ടായ്മകളിലും യുവജനങ്ങളുടെയും കുട്ടികളുടെയും വലിയ പങ്കാളിത്തമാണ് കാണാനാകുന്നത്.
125-ാം വാർഷികത്തോടനുബന്ധിച്ച് രാജ്യത്തെ വിവിധ രൂപതകളിൽ പ്രത്യേക ദിവ്യബലികളും ദിവ്യകാരുണ്യ പ്രഘോഷണങ്ങളും കുടുംബ കൂട്ടായ്മകളും സംഘടിപ്പിച്ചു. വരും തലമുറകളിലേക്ക് വിശ്വാസം പകർന്നു നൽകാനും സഭയുടെ സാമൂഹിക ദൗത്യം കൂടുതൽ ശക്തമായി മുന്നോട്ട് കൊണ്ടുപോകാനുമുള്ള ആഹ്വാനത്തോടെയാണ് സഭാനേതൃത്വം ഈ ജൂബിലി വർഷത്തെ കാണുന്നത്.
മലാവിയിലെ കത്തോലിക്കാ സഭയുടെ വളർച്ച, പ്രതിസന്ധികൾക്കിടയിലും പ്രത്യാശയോടെ മുന്നേറാൻ ആഗോള ക്രൈസ്തവ സമൂഹത്തിന് നൽകുന്ന വലിയൊരു സന്ദേശമാണ്.
