രണ്ടാം ലോകമഹായുദ്ധകാലത്ത് ഇറ്റലിയിലെ ‘മോണ്ടെ സോലെ’ കൂട്ടക്കൊലയിൽ നാസിപ്പടയുടെ വെടിയേറ്റു മരിച്ച മൂന്ന് കത്തോലിക്കാ വൈദികരെ വാഴ്ത്തപ്പെട്ടവരായി പ്രഖ്യാപിച്ചു. ഇറ്റലിയിലെ ബൊളോഞ്ഞയിലുള്ള സെന്റ് പെട്രോണിയോ ബസിലിക്കയിൽ നടന്ന തിരുക്കർമ്മങ്ങളിൽ ഡിഗ്രി ഓഫ് സെയിന്റ്സ് ഡികാസ്റ്ററിയുടെ പ്രിഫെക്ട് കർദിനാൾ മാർസെല്ലോ സെമെരാറോയാണ് പ്രഖ്യാപനം നടത്തിയത്. ഫാ. ഉബാൾഡോ മാർക്കിയോണി, ഫാ. എലിയ കോമിനി, ഫാ. മാർട്ടിനോ കപ്പല്ലി എന്നിവരെയാണ് ‘വിശ്വാസത്തിനുവേണ്ടിയുള്ള രക്തസാക്ഷികളായി’ സഭ ഉയർത്തിയത്.
1944 സെപ്റ്റംബർ 29-ന് സാന്താ മരിയ അസ്സുന്താദൈവാലയത്തിനുള്ളിൽ അഭയം പ്രാപിച്ച സ്ത്രീകളെയും കുട്ടികളെയും സംരക്ഷിക്കാൻ ശ്രമിക്കുന്നതിനിടെയാണ് 26-കാരനായ ഫാ. ഉബാൾഡോ മാർക്കിയോണിയെ നാസി പടയാളികൾ ബലിപീഠത്തിന് മുന്നിലിട്ട് വെടിവച്ചുകൊന്നത്. അദ്ദേഹത്തിന്റെ ഓർമ്മയ്ക്കായി, കസാഗ്ലിയ പള്ളിയുടെ അവശിഷ്ടങ്ങൾക്കിടയിൽ നിന്ന് കണ്ടെടുത്ത വെടിയുണ്ടകൾ തുളച്ചുകയറിയ ഒരു കാസ ഡോസെറ്റി സന്ന്യാസ സമൂഹം ഇന്നും സൂക്ഷിച്ചുപോരുന്നു. ദശാബ്ദങ്ങൾക്ക് ശേഷം, ഈ കൂട്ടക്കൊലയ്ക്ക് നേതൃത്വം നൽകിയ എസ്. എസ് മേജർ വാൾട്ടർ റെഡറിന് ഉബാൾഡോയുടെ പിതാവായ അഗസ്റ്റോ മാർക്കിയോണി പൂർണ്ണമായും മാപ്പുനൽകി.
1910-ൽ ജനിച്ച എലിയ കോമിനിയും 1912-ൽ ജനിച്ച മാർട്ടിനോ കപ്പല്ലിയും സൽവാരോയിൽ വച്ചാണ് ഇടവക സേവനങ്ങളിലൂടെ ഗാഢമായ സഹോദരബന്ധം കെട്ടിപ്പടുത്തത്. ക്രെഡയിൽ മരണാസന്നരായ ആളുകളെ സഹായിക്കാൻ ശ്രമിച്ചതിനെത്തുടർന്ന് 1944 ഒക്ടോബർ 1-ന് ഇരുവരും ഒരുമിച്ച് വെടിയേറ്റു കൊല്ലപ്പെടുകയായിരുന്നു.
ക്രൂരമായ കൂട്ടക്കൊലകൾ അരങ്ങേറുമ്പോഴും തങ്ങളുടെ ഇടവകജനങ്ങളെയും ഇടവകകളെയും ഉപേക്ഷിച്ചുപോകാൻ ഈ വൈദികർ തയ്യാറായിരുന്നില്ല. ക്രിസ്തുവിനോടും തങ്ങളുടെ ജനത്തോടുമുള്ള വിശ്വസ്തത മുൻനിർത്തിയാണ് ഇവർ മരണം വരിച്ചത്. മനുഷ്യത്വരഹിതമായ ക്രൂരതകൾക്ക് നടുവിലും മാപ്പപേക്ഷയുടെയും സമാധാനത്തിന്റെയും ക്രിസ്തീയ സ്നേഹത്തിന്റെയും സന്ദേശം നൽകിയ ഈ മൂന്ന് വൈദികരുടെയും ജീവിതം ആധുനിക ലോകത്തിന് വലിയൊരു പ്രചോദനമാണെന്ന് പ്രഖ്യാപന ചടങ്ങുകൾക്ക് നേതൃത്വം നൽകിയ കർദിനാൾമാർ ചൂണ്ടിക്കാട്ടി.
