സന്യാസ ജീവിതം നയിക്കുന്ന സ്ത്രീകളും പുരുഷന്മാരും തങ്ങളുടെ ദൈനംദിന ജീവിതത്തിലൂടെയും സമർപ്പണത്തിലൂടെയും ക്രിസ്തുവിന്റെ ജീവിക്കുന്ന പ്രതിഫലനങ്ങളായി മാറാൻ വിളിക്കപ്പെട്ടവരാണെന്ന് ലെയോ പതിനാലാമൻ മാർപാപ്പ പറഞ്ഞു. ഓഗസ്റ്റ് 11 മുതൽ 14 വരെ ഫ്ലോറിഡയിലെ ഓർലാന്റോയിൽ വച്ച് നടക്കുന്ന ‘ലീഡർഷിപ്പ് കോൺഫറൻസ് ഓഫ് റിലിജിയസ് വിമൻ’ സംഘടനയുടെ എഴുപതാം വാർഷികാഘോഷത്തിനിടയിലാണ് പാപ്പ ഇപ്രകാരം പറഞ്ഞത്.
ഈ ലോകത്തിൽ ദൈവത്തിന്റെ സ്നേഹവും കരുണയും പ്രതിഫലിപ്പിക്കുന്ന പ്രകാശഗോപുരങ്ങളായി മാറാൻ സന്യാസികൾക്ക് കടമയുണ്ടെന്ന് മാർപാപ്പ ഓർമ്മിപ്പിച്ചു. സന്യാസ ജീവിതത്തിന്റെ കേന്ദ്രബിന്ദു ദൈവത്തോടുള്ള അടങ്ങാത്ത സ്നേഹവും അവിടുത്തേക്കുള്ള പൂർണ്ണ സമർപ്പണവുമാണ്. അതിനാൽ ജീവിതത്തിലെ എല്ലാ കാര്യങ്ങളിലും ദൈവത്തിന് പ്രഥമസ്ഥാനം നൽകണമെന്ന് പാപ്പ ആഹ്വാനം ചെയ്തു.
“കേവലം പ്രവൃത്തികൾ കൊണ്ടുമാത്രമല്ല, പ്രാർഥനയിലും ആത്മീയ ജീവിതത്തിലുമുള്ള നിഷ്ഠയിലൂടെ ക്രിസ്തുവിന് സാക്ഷ്യം വഹിക്കാൻ ഓരോ സന്യാസിക്കും സാധിക്കണം. ക്രിസ്തുവിന്റെ കാരുണ്യം എളിയവരിലേക്കും ഉപേക്ഷിക്കപ്പെട്ടവരിലേക്കും എത്തിക്കുന്നതിലൂടെ സഭയ്ക്കുള്ളിലെ യഥാർഥ പ്രേഷിതരായി സന്യാസ സമൂഹങ്ങൾ മാറേണ്ടതുണ്ട്,” പാപ്പ പറഞ്ഞു.
