വിശുദ്ധ ജോൺ പോൾ രണ്ടാമൻ മാർപാപ്പയുടെ നേതൃത്വത്തിൽ നടന്ന ചരിത്രപ്രസിദ്ധമായ ‘അസീസി സംഗമത്തിന്റെ’ (Spirit of Assisi) 40-ാം വാർഷികത്തോട് അനുബന്ധിച്ച് വിശുദ്ധ ഫ്രാൻസിസിന്റെ നഗരത്തിൽ അന്താരാഷ്ട്ര സമാധാന സമ്മേളനത്തിന് തുടക്കം കുറിച്ചു. 2026-ലെ ലോക സമാധാന ദിനത്തിനായി മാർപാപ്പ നൽകിയ സന്ദേശത്തിൽ നിന്ന് പ്രചോദനമുൾക്കൊണ്ട്, ‘ആയുധമില്ലാത്തതും നിരായുധീകരിക്കുന്നതുമായ സമാധാനം’ (Unarmed and Disarming Peace) എന്ന പ്രമേയത്തെ ആസ്പദമാക്കിയാണ് അന്താരാഷ്ട്ര സമാധാന സമ്മേളനം നടക്കുന്നത്.
മനുഷ്യാവകാശ ലംഘനങ്ങൾ രേഖപ്പെടുത്തുന്നതിനും തുറന്നുകാട്ടുന്നതിനുമായി പ്രവർത്തിക്കുന്ന ‘സ്ട്രാറ്റജിക് ഇനിഷ്യേറ്റീവ് ഫോർ വിമൻ ഇൻ ദി ഹോൺ ഓഫ് ആഫ്രിക്ക’യുടെ റീജിയണൽ ഡയറക്ടറായ ഹാല അൽകാരിബ് (Hala AlKarib) ഉദ്ഘാടന സമ്മേളനത്തിലെ പ്രഭാഷകരിലൊരാളായിരുന്നു. ലോകമെമ്പാടുമുള്ള അക്രമങ്ങളുടെയും സംഘർഷങ്ങളുടെയും പ്രശ്നങ്ങളിലേക്ക് വെളിച്ചം വീശാൻ ഈ അന്താരാഷ്ട്ര സമ്മേളനത്തിന് കഴിഞ്ഞിട്ടുണ്ടെന്ന് അവർ പ്രത്യാശ പ്രകടിപ്പിച്ചു.
പ്രത്യേകിച്ച് സുഡാനിലെ സാഹചര്യം വളരെ ദയനീയമാണ്. സംഘർഷം ആരംഭിച്ച് നാല് വർഷത്തിനുള്ളിൽ 2,50,000-ത്തിലധികം പ്രദേശവാസികളാണ് കൊല്ലപ്പെട്ടത്. വീടുകളും പള്ളികളും മോസ്കുകളും മ്യൂസിയങ്ങളും കൊള്ളയടിക്കപ്പെടുന്നു. ലൈംഗികവും ലിംഗാധിഷ്ഠിതവുമായ അതിക്രമങ്ങൾ അവിടെ സാധാരണയായി മാറിയിരിക്കുന്നു.
“ഇത് സുഡാനിൽ മാത്രം ഒതുങ്ങിനിൽക്കുന്നില്ല, ആഫ്രിക്കയുടെ മറ്റ് ഭാഗങ്ങളിലേക്കും ഇത് പടരുകയാണ്,” എന്നതത്രേ ഇതിന്റെ ഏറ്റവും വലിയ അപകടമെന്ന് അവർ പറഞ്ഞു. ഇവിടെയാണ് മതപരമായ പ്രസ്ഥാനങ്ങളും സ്ഥാപനങ്ങളും കൂടുതൽ ഇടപെടേണ്ടത്.
