ക്രൈസ്തവ വിശ്വാസത്തിലെ ഏറ്റവും പുരാതനമായ തിരുശേഷിപ്പുകളിലൊന്നായ യേശുക്രിസ്തുവിന്റെ വിശുദ്ധ തയ്യലില്ലാത്ത അങ്കി (Holy Tunic of Christ) ചരിത്രത്തിലാദ്യമായി ഒരു മാർപാപ്പയുടെ സാന്നിധ്യത്തിൽ പൊതുജനങ്ങൾക്കായി പ്രദർശിപ്പിക്കുന്നു. ഫ്രാൻസ് സന്ദർശനത്തിനിടെ ലെയോ പതിനാലാമൻ മാർപാപ്പ പങ്കെടുക്കുന്ന യുവജന പ്രാർഥനാ സംഗമത്തിലാണ് ഈ ചരിത്രമുഹൂർത്തം ഒരുങ്ങുന്നത്.
ഫ്രാൻസിലെ പാരിസിന് സമീപമുള്ള ബാസിലിന ഡി സെന്റ് ഡെനിസ് അർജന്റ്യൂവിലിൽ (Argenteuil) കഴിഞ്ഞ 1,200-ലേറെ വർഷങ്ങളായി സൂക്ഷിച്ചുപോരുന്നതാണ് ഈ തിരുശേഷിപ്പ്. ക്രിസ്തുവിന്റെ പീഡാസഹന വേളയിൽ അണിഞ്ഞിരുന്നതെന്നും തയ്യലുകളില്ലാതെ നെയ്തെടുത്തതാണെന്നും വിശ്വസിക്കപ്പെടുന്ന ഈ തിരുവസ്ത്രം, സെന്റ്-ഡെനിസിലെ സ്റ്റേഡ് ഡി ഫ്രാൻസ് (Stade de France) സ്റ്റേഡിയത്തിൽ നടക്കുന്ന പ്രാർഥനാ സംഗമത്തിന്റെ സമാപനത്തിലാണ് പ്രദർശിപ്പിക്കുന്നത്. എൺപതിനായിരത്തോളം യുവാക്കളാണ് ഈ ചരിത്ര സംഭവത്തിന് സാക്ഷ്യം വഹിക്കാൻ രജിസ്റ്റർ ചെയ്തിട്ടുള്ളത്.
അർജന്റ്യൂവിലിൽ നിന്ന് നാല് മൈലോളം (ഏകദേശം 6 കിലോമീറ്റർ) അകലെയുള്ള സ്റ്റേഡിയത്തിലേക്ക് അതീവ സുരക്ഷാ സജ്ജീകരണങ്ങളോടെയാണ് ഈശോയുടെ തിരുവസ്ത്രം എത്തിക്കുന്നത്. കരമാർഗവും വ്യോമമാർഗവുമുള്ള നിരീക്ഷണങ്ങൾ അധികൃതർ ഉറപ്പാക്കിയിട്ടുണ്ട്. 1983-ൽ ഈ തിരുശേഷിപ്പ് മോഷണം പോവുകയും മാസങ്ങൾക്ക് ശേഷം തിരികെ ലഭിക്കുകയും ചെയ്ത പശ്ചാത്തലത്തിൽ, കൃത്യമായ യാത്രാ വഴി രഹസ്യമായി സൂക്ഷിച്ചുകൊണ്ടാണ് അധികൃതർ മാറ്റം സാധ്യമാക്കുന്നത്.
സാധാരണയായി അര നൂറ്റാണ്ടിൽ (50 വർഷം) ഒരിക്കൽ മാത്രം നടത്താറുള്ള അപൂർവ പ്രദർശനമാണ് ഇപ്പോൾ മാർപാപ്പയുടെ സാന്നിധ്യത്തിൽ ക്രമീകരിച്ചിരിക്കുന്നത്. ക്രൈസ്തവ വിശ്വാസത്തിന്റെ പുരാതന പാരമ്പര്യവും ആധുനിക സഭയുടെ ജീവസ്സുറ്റ വിശ്വാസവും തമ്മിലുള്ള അപൂർവ സംഗമമായി ഈ ചരിത്രനിമിഷം മാറുന്നു.
