സുഡാനിൽ സർക്കാരിന്റെ നിയന്ത്രണത്തിലുള്ള വടക്കൻ കോർദോഫാൻ (North Kordofan) പ്രവിശ്യയിലെ നഗരങ്ങളിൽ അർധസൈനിക വിഭാഗമായ റാപ്പിഡ് സപ്പോർട്ട് ഫോഴ്സിന്റെ (RSF) ഡ്രോൺ ആക്രമണങ്ങൾ ശക്തമാകുന്നു. സാധാരണക്കാരുടെ ജീവിതത്തെ താറുമാറാക്കുന്ന തരത്തിലുള്ള തുടർച്ചയായ ആക്രമണങ്ങളാണ് ഇപ്പോൾ റിപ്പോർട്ട് ചെയ്യപ്പെടുന്നത്.
അന്താരാഷ്ട്ര സമ്മർദത്തെ തുടർന്ന് കുറച്ചുകാലമായി ഡ്രോൺ ആക്രമണങ്ങൾ നിർത്തിവച്ചിരുന്ന ആർഎസ്എഫ്, ഇപ്പോൾ പുതിയൊരു കാമ്പെയ്ന്റെ ഭാഗമായി വീണ്ടും ആക്രമണങ്ങൾ കടുപ്പിച്ചിരിക്കുകയാണ്. സുഡാനിൽ മൂന്നര വർഷമായി തുടരുന്ന ആഭ്യന്തരയുദ്ധത്തിൽ ഇരുവിഭാഗവും ഡ്രോണുകളാണ് ഇപ്പോൾ പ്രധാന ആയുധമായി ഉപയോഗിക്കുന്നത്.
ഈ വർഷത്തിന്റെ ആദ്യപകുതിയിൽ മാത്രം ഇരുവിഭാഗത്തിന്റെയും ഡ്രോൺ ആക്രമണങ്ങളിൽ സാധാരണക്കാരായ ആയിരത്തിലധികം പേർ കൊല്ലപ്പെട്ടതായി ഐക്യരാഷ്ട്രസഭ വ്യക്തമാക്കുന്നു. സെപ്റ്റംബർ എട്ടിന് ഉം റുവാബ (Um Ruwaba) നഗരത്തിലെ കോടതി കെട്ടിടത്തിനു നേരെ നടത്തിയ ഡ്രോൺ ആക്രമണത്തിൽ 10 പേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തു.
തങ്ങൾ സാധാരണക്കാരെ ലക്ഷ്യമിടാറില്ലെന്നാണ് ആർഎസ്എഫിന്റെ വാദമെങ്കിലും, തുടർച്ചയായി ഉണ്ടാകുന്ന ഇത്തരം ആക്രമണങ്ങൾ സുഡാനിലെ സാധാരണ ജനങ്ങളിൽ കടുത്ത അരക്ഷിതാവസ്ഥയാണ് സൃഷ്ടിച്ചിരിക്കുന്നത്.
