സെപ്റ്റംബർ 25 മുതൽ 28 വരെയുള്ള ഫ്രാൻസ് സന്ദർശനത്തിനിടെ ലെയോ പതിനാലാമൻ പാപ്പ പാരീസ്, ലൂർദ്, മെറ്റ്സ് (Metz) എന്നീ നഗരങ്ങൾ സന്ദർശിക്കും. യുവാക്കൾ, സർക്കാർ ഉദ്യോഗസ്ഥർ, രോഗികൾ, കുടിയേറ്റക്കാർ തുടങ്ങിയവരുമായി കൂടിക്കാഴ്ച നടത്തുന്നതിനായാണ് പരിശുദ്ധ പിതാവ് ഈ മൂന്ന് നഗരങ്ങളിൽ എത്തുന്നത്. നാല് ദിവസത്തെ ഈ പര്യടനത്തിൽ, നിർമ്മിത ബുദ്ധി (AI) മുതൽ കുടിയേറ്റ പ്രശ്നങ്ങൾ വരെയും ഇന്നത്തെ ഫ്രാൻസിലെ കത്തോലിക്കാ സഭയുടെ അവസ്ഥയെക്കുറിച്ചും മാർപാപ്പ ചർച്ച ചെയ്യും.
മാർപാപ്പയുടെ ഈ ചരിത്രപ്രസിദ്ധമായ യാത്രയെക്കുറിച്ചും ഫ്രാൻസിന്റെ സമ്പന്നമായ കത്തോലിക്കാ പാരമ്പര്യത്തെക്കുറിച്ചും അറിയേണ്ട 12 പ്രധാന കാര്യങ്ങൾ താഴെ നൽകുന്നു:
1. പാരീസും ലൂർദും സന്ദർശിക്കുന്ന മൂന്നാമത്തെ മാർപാപ്പയാണ് ലെയോ പാപ്പ
ഫ്രാൻസിസ് മാർപാപ്പ സ്ട്രാസ്ബർഗ്, മാർസെയിൽ, കോർസിക്കയിലെ അജാസിയോ തുടങ്ങിയ ഫ്രഞ്ച് നഗരങ്ങൾ സന്ദർശിച്ചിട്ടുണ്ടെങ്കിലും പാരീസോ ലൂർദോ സന്ദർശിച്ചിരുന്നില്ല. വിശുദ്ധ ജോൺ പോൾ രണ്ടാമനും ബെനഡിക്റ്റ് പതിനാറാമനും ശേഷം ഈ രണ്ട് പ്രശസ്ത കത്തോലിക്കാ കേന്ദ്രങ്ങളും സന്ദർശിക്കുന്ന മൂന്നാമത്തെ മാർപാപ്പയാണ് ലെയോ പാപ്പ.
2008 സെപ്റ്റംബറിൽ, ലൂർദിൽ മാതാവ് പ്രത്യക്ഷപ്പെട്ടതിന്റെ 150-ാം വാർഷിക വേളയിൽ നാല് ദിവസം ലൂർദിൽ ചെലവഴിച്ച ബെനഡിക്റ്റ് പതിനാറാമൻ മാർപാപ്പയാണ് ഏറ്റവും കൂടുതൽ ദിവസം അവിടെ ചെലവഴിച്ച മാർപാപ്പ.
2. തീപിടുത്തത്തിന് ശേഷം നോട്രെ ഡാമിൽ ആദ്യമായി പാപ്പയുടെ വിശുദ്ധ കുർബാനയും പ്രാർഥനയും
സെപ്റ്റംബർ 25-ന് പാരീസിലെ നോട്രെ ഡാമിനുള്ളിൽ വൈദികർ, സന്യസ്തർ, സെമിനാരി വിദ്യാർഥികൾ എന്നിവർക്കൊപ്പം സന്ധ്യാപ്രാർഥനയ്ക്ക് (Vespers) നേതൃത്വം നൽകിക്കൊണ്ട് ലെയോ പാപ്പയുടെ അപ്പസ്തോലിക യാത്രയ്ക്ക് തുടക്കം കുറിക്കും.
2019-ലെ ദാരുണമായ തീപിടുത്തത്തിൽ കത്തീഡ്രലിന്റെ മേൽക്കൂര തകർന്നടിഞ്ഞ് ഏഴ് വർഷങ്ങൾക്ക് ശേഷം, അതിന്റെ ഗോഥിക് ശൈലിയിലുള്ള നവീകരിച്ച മനോഹരമായ മേൽക്കൂരയ്ക്ക് താഴെ നടക്കുന്ന ആദ്യത്തെ പോന്തിഫിക്കൽ (മാർപാപ്പയുടെ) പ്രാർഥനയായിരിക്കും ഇത്.
3. പാരീസിലെ പ്ലേസ് ഡി ലാ കോൺകോർഡിൽ പാപ്പ വിശുദ്ധ കുർബാന അർപ്പിക്കും
രാജാവിനോടുള്ള ആദരസൂചകമായി ‘പ്ലേസ് ലൂയി XV’ എന്ന പേരിൽ നിർമ്മിക്കപ്പെട്ട ഈ സ്ഥലം ഫ്രഞ്ച് വിപ്ലവ കാലത്ത് ‘പ്ലേസ് ഡി ലാ റെവല്യൂഷൻ’ ആയി മാറി. ലൂയി പതിനാറാമൻ, മേരി ആന്റോനെറ്റ് എന്നിവരുൾപ്പെടെ ആയിരത്തിലധികം ആളുകളെ ശിരച്ഛേദം ചെയ്തത് ഇവിടെ വച്ചായിരുന്നു. പിന്നീട് 1795-ൽ ദേശീയ അനുരഞ്ജനത്തിന്റെ പ്രതീകമായി ഇതിന് ‘പ്ലേസ് ഡി ലാ കോൺകോർഡ്’ (സൗഹാർദ ചതുരം) എന്ന് പുനർനാമകരണം ചെയ്തു. 20 ഏക്കറിലധികം വിസ്തൃതിയുള്ള ഇത് പാരീസിലെ ഏറ്റവും വലിയ പൊതു ചതുരമാണ് (Public Square).
4. സന്ദർശനത്തിനിടെ ക്രിസ്തുവിന്റെ വിശുദ്ധ അങ്കിയുടെ തിരുശേഷിപ്പ് പ്രദർശിപ്പിക്കും
പാരീസിന് വടക്കുള്ള സെന്റ് ഡെനിസിലെ ‘സ്റ്റേഡ് ഡി ഫ്രാൻസിൽ’ (Stade de France) സെപ്റ്റംബർ 25-ന് നടക്കുന്ന യുവജന ജാഗരണ പ്രാർഥനയിൽ മാർപാപ്പ പങ്കെടുക്കും. എൺപതിനായിരത്തിലധികം ഫ്രഞ്ച് ചെറുപ്പക്കാരാണ് ഈ ചടങ്ങിൽ പങ്കെടുക്കാൻ രജിസ്റ്റർ ചെയ്തിട്ടുള്ളത്.
ചടങ്ങിന്റെ സമാപനത്തിൽ, ക്രിസ്തുവിന്റെ വിശുദ്ധ അങ്കിയുടെ തിരുശേഷിപ്പ് ഇവിടെ പ്രദർശിപ്പിക്കും. സെന്റ് ഡെനിസ് ബസിലിക്കയിൽ സൂക്ഷിച്ചിരിക്കുന്നതും, ക്രിസ്തു പീഡാസഹന സമയത്ത് ധരിച്ചതെന്ന് വിശ്വസിക്കപ്പെടുന്നതുമായ ഈ വിശുദ്ധ തിരുശേഷിപ്പിന്റെ പ്രദർശനത്തിന് ഒരു മാർപാപ്പ സാക്ഷ്യം വഹിക്കുന്നത് ചരിത്രത്തിൽ ആദ്യമായാണ്.
എല്ലാ 50 വർഷത്തിലൊരിക്കലും പ്രത്യേക അവസരങ്ങളിലും (ഏറ്റവും ഒടുവിൽ 2023-ൽ) മാത്രമാണ് ഈ അപൂർവ തിരുശേഷിപ്പ് പൊതുജനങ്ങൾക്ക് ദർശനത്തിനായി വയ്ക്കുന്നത്. എന്നാൽ മുമ്പൊരിക്കലും ഇത് ഒരു മാർപാപ്പയുടെ മുന്നിൽ കൊണ്ടുവന്നിട്ടില്ല. ബസിലിക്കയിൽ നിന്ന് ഏകദേശം 3.7 മൈൽ അകലെയുള്ള സ്റ്റേഡിയത്തിലേക്ക് കർശനമായ സുരക്ഷാ വലയത്തിലാണ് ഈ തിരുശേഷിപ്പ് എത്തിക്കുക.
1998-ലെ ഫിഫ ലോകകപ്പ് ഫൈനലിനായി പ്രത്യേകമായി നിർമ്മിച്ച സ്റ്റേഡ് ഡി ഫ്രാൻസ് സ്റ്റേഡിയത്തിന് അതിന്റേതായ ചരിത്രമുണ്ട്. അന്ന് ഫ്രാൻസ് ബ്രസീലിനെ 3-0 ന് തോൽപ്പിച്ച് തങ്ങളുടെ കന്നി ലോകകപ്പ് കിരീടം നേടിയത് ഇവിടെ വച്ചായിരുന്നു. ഫ്രഞ്ച് ഫുട്ബോൾ വിജയത്തിന്റെ ഈ ചരിത്രഭൂമിയിൽ ഇത്തവണ സ്പോർട്സ് ഗാനങ്ങൾക്ക് പകരം ഭക്തിഗാനങ്ങൾ മുഴങ്ങും. 80,000 ചെറുപ്പക്കാർ മെഴുകുതിരികൾ ഏന്തി മാർപാപ്പയോടൊപ്പം പ്രാർഥിക്കുന്ന വലിയൊരു യാഗപീഠമായി ഈ മൈതാനം മാറും.
5. ബർണദെത്തയ്ക്ക് പരിശുദ്ധ അമ്മ ദർശനം നൽകിയ അതേ ഗുഹയിൽ പാപ്പ പ്രാർഥിക്കും
സെപ്റ്റംബർ 26-ന് ലൂർദിലെ മാർപാപ്പയുടെ ആദ്യ പരിപാടി മസബിയേൽ ഗുഹയിലെ സന്ധ്യാപ്രാർഥനയാണ്. ലോകത്തിലെ ഏറ്റവും പ്രശസ്തമായ മരിയൻ ദർശന കേന്ദ്രങ്ങളിൽ ഒന്നാണിത്. കൂടാതെ ലൂർദിൽ ആയിരിക്കുമ്പോൾ, സെപ്റ്റംബർ 27-ന് ലൂർദ് മാതാവിന്റെ തീർഥാടന കേന്ദ്രത്തിൽ വച്ച് മാർപാപ്പ ജപമാല പ്രാർഥനയ്ക്കും പ്രദക്ഷിണത്തിനും നേതൃത്വം നൽകും. ഞായറാഴ്ചത്തെ വിശുദ്ധ കുർബാന ബസിലിക്കയ്ക്കുള്ളിൽ വച്ചല്ല, മറിച്ച് തീർഥാടന കേന്ദ്രത്തിലെ പുൽത്തകിടിയിലാണ് (Prairie) സംഘടിപ്പിച്ചിരിക്കുന്നത്. ഗേവ് (Gave) നദിക്ക് കുറുകെയുള്ള വിശാലമായ ഒരു തുറസ്സായ പുൽത്തകിടിയാണിത്.
ലൂർദ് സന്ദർശനത്തിന്റെ വളരെ സവിശേഷമായ ഒരു നിമിഷമായി, രോഗികളും ഭിന്നശേഷിക്കാരുമായ തീർഥാടകർക്കായി ഒരുക്കിയിരിക്കുന്ന ‘അക്യൂയിൽ ഡാം’ (Accueil Notre-Dame) കേന്ദ്രത്തിലെ ജീവനക്കാരെയും രോഗികളെയും പരിശുദ്ധ പിതാവ് സന്ദർശിക്കും.
1858-ൽ 14 കാരിയായ വിശുദ്ധ ബർണദെത്തയ്ക്ക് പരിശുദ്ധ അമ്മ ദർശനം നൽകിയതിനുശേഷം 20 കോടിയിലധികം തീർഥാടകരാണ് മസബിയേൽ ഗുഹ സന്ദർശിച്ചത്. അദ്ഭുതകരമായ രോഗശാന്തി ലഭിച്ചതായി അവകാശപ്പെടുന്ന 7,000-ത്തിലധികം സംഭവങ്ങളിൽ 72 എണ്ണം ശാസ്ത്രീയമായി വിശദീകരിക്കാൻ കഴിയാത്ത അദ്ഭുതങ്ങളാണെന്ന് സഭയും വിദഗ്ദ്ധ മെഡിക്കൽ ബോർഡും ഔദ്യോഗികമായി സ്ഥിരീകരിച്ചിട്ടുണ്ട്.
6. ഫ്രഞ്ച് തീർഥാടകർക്ക് മാർപാപ്പയുടെ പ്രസംഗം മനസ്സിലാക്കാൻ തർജ്ജമയുടെ ആവശ്യമില്ല
പരിശുദ്ധ പിതാവിന് ഫ്രഞ്ച് ഭാഷ സംസാരിക്കാൻ അറിയാം. തന്റെ ഫ്രഞ്ച് പാരമ്പര്യവും, 15-ാം വയസ്സിൽ മിഷിഗണിൽ സഹപാഠികളെ ഫ്രഞ്ച് പഠിപ്പിച്ച പരിചയവും, അഗസ്റ്റീനിയൻ പ്രിയോർ ജനറലായിരിക്കുമ്പോൾ ആഫ്രിക്കൻ ഫ്രഞ്ച് രാജ്യങ്ങളിൽ പ്രസംഗിച്ച വർഷങ്ങളിലെ പരിചയസമ്പത്തും കാരണം ചിക്കാഗോയിൽ ജനിച്ച ഈ മാർപാപ്പയ്ക്ക് ഫ്രഞ്ച് ഭാഷയിലും അവിടുത്തെ ആത്മീയതയിലും വലിയ പാണ്ഡിത്യമുണ്ട്.
7. വിശുദ്ധ കൊച്ചുത്രേസ്യയുടെ ജന്മനാടാണ് ഫ്രാൻസ്
‘ചെറുപുഷ്പം’ എന്ന് സ്നേഹത്തോടെ വിളിക്കപ്പെടുന്ന ലിസ്യൂവിലെ വിശുദ്ധ കൊച്ചുത്രേസ്യ (St. Thérèse of Lisieux) ഒരു ഫ്രഞ്ച് കർമ്മലീത്താ സന്ന്യാസിനിയായിരുന്നു. 24-ാം വയസ്സിൽ അന്തരിച്ച അവരെ 1997-ൽ ജോൺ പോൾ രണ്ടാമൻ മാർപാപ്പ സഭയുടെ വേദപാരംഗതയായി (Doctor of the Church) പ്രഖ്യാപിച്ചു. ലൂർദ് സന്ദർശനവേളയിൽ മാർപ്പാപ്പ അവിടുത്തെ കർമ്മലീത്താ മഠത്തിലെ സന്ന്യാസിനികളെ സ്വകാര്യമായി സന്ദർശിക്കും.
8. ‘സഭയുടെ മൂത്ത മകൾ’ എന്ന പദവി ഫ്രാൻസിന് സ്വന്തം
എ.ഡി. 496-ൽ ഫ്രാങ്കുകളുടെ രാജാവായ ക്ലോവിസ് ഒന്നാമൻ റെയിംസിൽ (Reims) വച്ച് മാമോദീസ സ്വീകരിച്ചു. ഇതോടെ അജ്ഞാത വിശ്വാസങ്ങളോ അല്ലെങ്കിൽ ഏരിയൻ ഗ്രൂപ്പുകളോ സ്വീകരിക്കുന്നതിന് പകരം കത്തോലിക്കാ സഭയെ ഔദ്യോഗികമായി സ്വീകരിച്ച ആദ്യത്തെ പാശ്ചാത്യ രാജ്യമായി ഫ്രാങ്ക് സാമ്രാജ്യം മാറി. അങ്ങനെയാണ് ഫ്രാൻസിന് ‘സഭയുടെ മൂത്ത മകൾ’ എന്ന പദവി ലഭിച്ചത്.
9. എഴുപത് വർഷത്തോളം മാർപാപ്പമാർ ഫ്രാൻസിലാണ് ജീവിച്ചിരുന്നത്
അവിഞ്ഞോൺ പേപ്പസി (Avignon Papacy – 1309-1377) കാലഘട്ടത്തിൽ, തുടർച്ചയായി വന്ന ഏഴ് മാർപാപ്പമാരും (എല്ലാവരും ഫ്രഞ്ചുകാരായിരുന്നു) റോമിന് പകരം തെക്കൻ ഫ്രാൻസിലെ പാലെസ് ഡെസ് പാപ്സ് (Palais des Papes) കൊട്ടാരത്തിലിരുന്നാണ് കത്തോലിക്കാ സഭയെ ഭരിച്ചത്. പിന്നീട് സീനായിലെ വിശുദ്ധ കാതറിൻ ഇടപെട്ടാണ് ഗ്രിഗറി പതിനൊന്നാമൻ മാർപാപ്പയെ റോമിലേക്ക് തിരികെ കൊണ്ടുവന്നത്.
10. പാരീസിന്റെ ഹൃദയഭാഗത്താണ് അദ്ഭുത മെഡൽ വെളിപ്പെടുത്തപ്പെട്ടത്
1830-ൽ പാരീസിലെ റൂ ഡു ബാക്കിലുള്ള (Rue du Bac) ചാപ്പലിൽ വെച്ച് പരിശുദ്ധ കന്യകാമറിയം വിശുദ്ധ കാതറിൻ ലാബറെയ്ക്ക് ദർശനം നൽകുകയും ‘അദ്ഭുത മെഡലിന്റെ’ (Miraculous Medal) രൂപകൽപ്പന നടത്തുകയും ചെയ്തു. വർഷങ്ങൾക്കുള്ളിൽ ദശലക്ഷക്കണക്കിന് മെഡലുകൾ വിതരണം ചെയ്യപ്പെട്ടു. ഇന്ന് ലോകമെമ്പാടുമുള്ള കത്തോലിക്കർ ധരിക്കുന്ന ഏറ്റവും പ്രധാനപ്പെട്ട ഒരു വിശ്വാസ പ്രതീകമായി ഇത് തുടരുന്നു.
11. ഷാർട്രൂസ് എന്ന ഹെർബൽ ലിക്വറിന്റെ രഹസ്യക്കൂട്ടറിയാവുന്നത് രണ്ട് ഫ്രഞ്ച് സന്ന്യാസികൾക്ക് മാത്രം
ലോകപ്രശസ്തമായ ‘ഷാർട്രൂസ്’ (Chartreuse) എന്ന ഹെർബൽ ലിക്വർ 1737 മുതൽ ഗ്രെനോബിളിന് അടുത്തുള്ള ഗ്രാൻഡെ ഷാർട്രൂസ് മഠത്തിലെ കാർത്തൂസിയൻ സന്ന്യാ
സികളാണ് ഉണ്ടാക്കുന്നത്. 130-ലധികം സസ്യങ്ങളും പൂക്കളും മൂലികകളും ചേർത്തുള്ള ഇതിന്റെ രഹസ്യക്കൂട്ടും നിർമ്മാണരീതിയും ഇന്നും മൂന്നു സന്ന്യാസികൾക്ക് മാത്രമേ അറിയുകയുള്ളൂ.
12. ഡോം പെരിന്യോൺ ഷാംപെയ്ൻ വികസിപ്പിച്ചത് ഒരു ബെനഡിക്റ്റൈൻ സന്ന്യാസിയാണ്
17-ാം നൂറ്റാണ്ടിൽ ജീവിച്ചിരുന്ന ഫ്രഞ്ച് ബെനഡിക്റ്റൈൻ സന്ന്യാസിയായ ഡോം പിയറി പെരിന്യോൺ (Dom Pierre Pérignon) ആണ് കട്ടിയുള്ള ഗ്ലാസ് ബോട്ടിലുകൾ, കോർക്ക് സ്റ്റോപ്പറുകൾ, മദ്യം പൊട്ടിത്തെറിക്കാതെ സൂക്ഷിക്കുന്ന മിശ്രിതങ്ങൾ എന്നിവ വികസിപ്പിച്ചെടുത്ത് വൈൻ നിർമ്മാണത്തിൽ വിപ്ലവം സൃഷ്ടിച്ചത്. ഇതാണ് ഇന്നത്തെ ആധുനിക ഷാംപെയ്ൻ നിർമ്മാണത്തിന് തുടക്കം കുറിച്ചത്.
വിവർത്തനം: സി. സൗമ്യ മുട്ടപ്പിള്ളിൽ DSHJ
