പ്രധാനമന്ത്രി നരേന്ദ്ര മോദിയുടെ ജന്മദിനത്തോടനുബന്ധിച്ച് ഡൽഹി സർക്കാരിന്റെ നേതൃത്വത്തിൽ ഇന്ന് നാല് പ്രധാന പരിപാടികൾ സംഘടിപ്പിക്കും. ജനസേവനത്തിനും പങ്കാളിത്തത്തിനും മുൻഗണന നൽകിയാണ് ഈ പ്രത്യേക പരിപാടികൾ ആസൂത്രണം ചെയ്തിരിക്കുന്നത്. ഡൽഹി മുഖ്യമന്ത്രി രേഖാ ഗുപ്തയാണ് ഇക്കാര്യം ഔദ്യോഗികമായി അറിയിച്ചത്.
പരിപാടിയുടെ ഭാഗമായി കർത്തവ്യ പഥിൽ 1,25,000 ചിരാതുകൾ തെളിയിക്കുന്ന പ്രത്യേക ചടങ്ങ് നടക്കും. കൂടാതെ ത്യാഗരാജ് സ്റ്റേഡിയത്തിൽ വലിയ രക്തദാന ക്യാമ്പും 108 ഹോമകുണ്ഡങ്ങളോടെയുള്ള പ്രത്യേക പൂജയും സംഘടിപ്പിച്ചിട്ടുണ്ട്. തൊഴിലാളികൾക്ക് സഹായങ്ങൾ വേഗത്തിൽ ലഭ്യമാക്കുന്നതിനായി പുതിയ സേവന കേന്ദ്രവും ഇന്ന് മുതൽ പ്രവർത്തനം ആരംഭിക്കും.
ഇതോടൊപ്പം ഒരു മാസം നീണ്ടുനിൽക്കുന്ന സേവന വാരത്തിനും ഇന്ന് തുടക്കമാകുകയാണ്. ഈ കാലയളവിൽ റോഡ്, കുടിവെള്ളം, വിദ്യാഭ്യാസം തുടങ്ങിയ മേഖലകളിലെ വിവിധ വികസന പദ്ധതികൾക്ക് തുടക്കം കുറിക്കും. വരും ദിവസങ്ങളിൽ കൂടുതൽ ജനക്ഷേമ പ്രവർത്തനങ്ങൾ തലസ്ഥാനത്ത് നടപ്പിലാക്കുമെന്നും സർക്കാർ വ്യക്തമാക്കി.
