നേപ്പാളിൽ ഉണ്ടായ കഠിനമായ പ്രളയത്തിൽപ്പെട്ട 17,000 കുട്ടികൾക്ക് അടിയന്തര സഹായം ആവശ്യമാണെന്ന് യുണിസെഫ് അറിയിച്ചു. പ്രളയത്തിൽ നൂറിലധികം ആളുകൾ മരണപ്പെടുകയും നിരവധി പേരെ കാണാതാവുകയും ചെയ്തിട്ടുണ്ട്. പാലങ്ങളും റോഡുകളും തകർന്നതോടെ ദുരന്തബാധിത മേഖലകളിലേക്കുള്ള ഗതാഗതവും വാർത്താവിനിമയ സംവിധാനങ്ങളും പൂർണ്ണമായി നിലച്ച അവസ്ഥയിലാണ്.
പ്രളയബാധിത പ്രദേശങ്ങളിൽ കഴിയുന്ന കുട്ടികളെ രോഗങ്ങളിൽ നിന്നും പോഷകാഹാരക്കുറവിൽ നിന്നും രക്ഷിക്കാൻ യുണിസെഫ് അടിയന്തിര നടപടികൾ ആരംഭിച്ചു. ഇതിന്റെ ഭാഗമായി മരുന്നുകൾ, താൽക്കാലിക ഷെൽട്ടറുകൾ, ശുദ്ധജലം എന്നിവ കുടുംബങ്ങൾക്ക് വേഗത്തിൽ എത്തിച്ചു നൽകുന്നുണ്ട്. ഒറ്റപ്പെട്ടുപോയ കുട്ടികളെ കണ്ടെത്തി മാതാപിതാക്കളുടെ അടുത്ത് എത്തിക്കാനുള്ള ശ്രമങ്ങളും സംഘം നടത്തുന്നുണ്ട്.
ദുരിതാശ്വാസ പ്രവർത്തനങ്ങൾ തടസ്സമില്ലാതെ മുന്നോട്ട് കൊണ്ടുപോകാൻ അന്താരാഷ്ട്ര സമൂഹത്തിൽ നിന്ന് 1.72 കോടി ഡോളറിന്റെ സാമ്പത്തിക സഹായവും യുണിസെഫ് ആവശ്യപ്പെട്ടിട്ടുണ്ട്. ഗവൺമെന്റുമായി ചേർന്ന് പണമായി സഹായം നൽകാനും ദുരന്തത്തിൽപ്പെട്ട കുടുംബങ്ങൾക്ക് ആശ്വാസം എത്തിക്കാനും പദ്ധതി തയ്യാറാക്കിയിട്ടുണ്ട്. വലിയ തുക സമാഹരിക്കാൻ സാധിച്ചാൽ മാത്രമേ പ്രദേശത്തെ കുട്ടികളുടെ സുരക്ഷിതത്വം പൂർണ്ണമായി ഉറപ്പാക്കാൻ സാധിക്കൂ.
