വെനസ്വേലയിലെ കാരക്കാസ് നഗരത്തിന് മുകളിൽ ഇപ്പോൾ മിഖായേൽ മാലാഖയുടെ കൂറ്റൻ ശിൽപം തലയുയർത്തി നിൽക്കുന്നു. വെറും 17 വയസ്സ് മാത്രം പ്രായമുള്ള ഒരു യുവ ശിൽപിയാണ് ഈ കൂറ്റൻ സ്മാരകം നിർമ്മിച്ചിരിക്കുന്നത്. 23 അടി ഉയരമുള്ള ഈ ശിൽപം വിശ്വാസത്തിന്റെയും സംരക്ഷണത്തിന്റെയും പ്രത്യാശയുടെയും പ്രതീകമായാണ് നിർമ്മിച്ചിരിക്കുന്നത്.
ബറുട്ട മുനിസിപ്പാലിറ്റിയിലെ ലാ മെഴ്സിഡസ് പ്രദേശത്തിന്റെ പ്രവേശന കവാടത്തിലാണ് ഈ ശിൽപം സ്ഥാപിച്ചിരിക്കുന്നത്. വിശുദ്ധരായ മിഖായേൽ, ഗബ്രിയേൽ, റാഫേൽ എന്നീ മാലാഖമാരുടെ തിരുനാൾ ദിനമായ സെപ്റ്റംബർ 29-നാണ് ഇത് ഔദ്യോഗികമായി അനാച്ഛാദനം ചെയ്തത്. ശിൽപവും അത് നിൽക്കുന്ന പീഠവും ഉൾപ്പെടെ സ്മാരകത്തിന് 23 അടി ഉയരമുണ്ട്. സംരക്ഷകനും കാവൽക്കാരനുമായ മിഖായേൽ മാലാഖയുടെ പരമ്പരാഗത ഭാവത്തിലാണ് ശിൽപം ചിത്രീകരിച്ചിരിക്കുന്നത്.
ചെറുപ്പകാലത്ത് തന്നെ ശിൽപകലയോട് പ്രത്യേക താല്പര്യമുണ്ടാകുകയും, വെറും 17-ാം വയസ്സിൽ വലിയ പദ്ധതികൾ ഏറ്റെടുക്കുകയും ചെയ്ത വെനസ്വേലൻ യുവ കലാകാരനായ ജോഷ്വേ ബെഞ്ചമിനാണ് ഈ ശിൽപത്തിന് പിന്നിൽ പ്രവർത്തിച്ചത്.
“സംരക്ഷണവും ശക്തിയും വിശ്വാസവും പ്രതീകപ്പെടുത്തുന്ന ഈ കലാസൃഷ്ടി, ഈ പ്രദേശത്തിന്റെ ഒരു ഭാഗമായാണ് നിർമ്മിച്ചിരിക്കുന്നത്. ഈ ശിൽപം നിർമ്മിക്കാൻ എന്നെ അനുഗ്രഹിച്ച ദൈവത്തിന് ഞാൻ നന്ദി പറയുന്നു,”ശിൽപത്തിന്റെ ചിത്രങ്ങൾ പങ്കുവച്ചുകൊണ്ട് കലാകാരൻ പറഞ്ഞു.
മാസങ്ങളോളം താൻ കഷ്ടപ്പെട്ട് നിർമ്മിച്ച ഈ ശിൽപം ഒടുവിൽ സ്ഥാപിക്കുന്നത് കാണുമ്പോഴുള്ള സന്തോഷവും ജോഷ്വേ പങ്കുവച്ചു: “ഒരു കലാസൃഷ്ടി സ്ഥാപിക്കുമ്പോൾ എപ്പോഴും എന്റെ ഉള്ളിൽ വല്ലാത്തൊരു വികാരമുണരാറുണ്ട്; അത് വിവരിക്കാനാവാത്ത ഒരു അനുഭൂതിയാണ്. ഇത് സ്ഥാപിക്കുമ്പോൾ, ഞങ്ങളെ ഇവിടെയെത്തിച്ച മുഴുവൻ യാത്രയെക്കുറിച്ചും ഞാൻ ഓർക്കുന്നു. ഒരു ദിവസം എന്റെ കൈകളിൽ തുടങ്ങിയ ഒരു കാര്യം പടിപടിയായി രൂപം പ്രാപിച്ച് ഈ കൂറ്റൻ ശിൽപമായി മാറി.”
2026 ജൂൺ 24-നുണ്ടായ ഭൂചലനങ്ങളെത്തുടർന്ന് ബറുട്ട മുനിസിപ്പാലിറ്റിയിൽ മരണപ്പെട്ട മൂന്ന് പേരുടെ ഓർമ്മയ്ക്കായി ശിൽപത്തിൽ പ്രതീകാത്മകമായ മൂന്ന് അടയാളങ്ങളും ഉൾപ്പെടുത്തിയിട്ടുണ്ട്.
ജോഷ്വേ ബെഞ്ചമിന്റെ കലാജീവിതം ആരംഭിക്കുന്നത് അദ്ദേഹത്തിന് നാല് വയസ്സുള്ളപ്പോഴാണ്. കളിമണ്ണ് കൊണ്ട് രൂപങ്ങൾ ഉണ്ടാക്കാൻ അദ്ദേഹത്തിന്റെ പിതാവാണ് അദ്ദേഹത്തെ പഠിപ്പിച്ചത്. അന്നുമുതൽ ശിൽപകല ജോഷ്വേയുടെ ജീവിതത്തിന്റെ ഒരു പ്രധാന ഭാഗമായി മാറി.
15-ാം വയസ്സിൽ വെനസ്വേലയിലെ ഗ്വാക്കാരയിൽ ഫൈബർ ഗ്ലാസ് റസിനും ഉള്ളിൽ ലോഹക്കൂടും ഉപയോഗിച്ച് ഏകദേശം 20 അടി ഉയരമുള്ള ഹിപ്പോയിലെ വിശുദ്ധ അഗസ്റ്റിന്റെ ശിൽപം ഈ യുവ കലാകാരൻ നിർമ്മിച്ചിരുന്നു. ഈ പദ്ധതി വിജയകരമാക്കാൻ കുറഞ്ഞത് പത്ത് പേരടങ്ങുന്ന ഒരു സംഘം അദ്ദേഹത്തെ സഹായിച്ചിരുന്നു.
