
ജന്മനാ കേൾവിശക്തിയില്ലാതെ ജനിച്ച ഒൻപത് മാസം പ്രായമുള്ള ഇരട്ടക്കുട്ടികൾക്ക് ഒരേദിവസം കോക്ലിയർ ഇംപ്ലാന്റ് ശസ്ത്രക്രിയ നടത്തി ഓസ്ട്രേലിയൻ വൈദ്യശാസ്ത്ര ലോകം ചരിത്രം കുറിച്ചു. ഓസ്ട്രേലിയയിലെ മോസ് വെയ്ലിൽ നിന്നുള്ള എമിലി – ഇവാൻ പോർട്ടർ ദമ്പതികളുടെ മക്കളായ ആർട്ടി, ജാക്ക് എന്നീ ഇരട്ടക്കുട്ടികളാണ് ശസ്ത്രക്രിയയിലൂടെ ആദ്യമായി അമ്മയുടെ ശബ്ദം കേട്ടത്.
2025 ജൂലൈയിൽ മാസം തികയാതെ ജനിച്ച ഈ ഇരട്ടകൾക്ക് ‘കോണെക്സിൻ 26’ (Connexin 26) എന്ന ജനിതക അവസ്ഥ കാരണം പൂർണ്ണമായും കേൾവിശക്തി നഷ്ടപ്പെട്ടിരുന്നു. തുടർന്ന് 2026 ഏപ്രിലിൽ സിഡ്നിയിലെ പ്രിൻസ് ഓഫ് വെയിൽസ് പ്രൈവറ്റ് ഹോസ്പിറ്റലിൽ ഇ.എൻ.ടി സർജൻ ഡോ. റിത്വിക് റെഡ്ഡിയുടെ നേതൃത്വത്തിലുള്ള മെഡിക്കൽ സംഘം എട്ട് മണിക്കൂർ നീണ്ട സങ്കീർണ്ണമായ ശസ്ത്രക്രിയയിലൂടെ ഇരുവർക്കും രണ്ട് വീതം കോക്ലിയർ ഇംപ്ലാന്റുകൾ വിജയകരമായി ഘടിപ്പിച്ചു. ഓസ്ട്രേലിയയിൽ ആദ്യമായാണ് ഇരട്ടക്കുട്ടികൾക്ക് ഒരേദിവസം ഇത്തരമൊരു ശസ്ത്രക്രിയ നടക്കുന്നത്.
ശസ്ത്രക്രിയ കഴിഞ്ഞ് 15 ദിവസങ്ങൾക്ക് ശേഷം വൊളോങ്കോങ്ങിലെ ‘ദി ഷെപ്പേർഡ് സെന്ററിൽ’ വച്ച് ഉപകരണങ്ങൾ പ്രവർത്തിപ്പിച്ചു തുടങ്ങി. ഉപകരണം ഓൺ ചെയ്ത നിമിഷം അമ്മ എമിലിയുടെ ശബ്ദം കേട്ട കുരുന്നുകൾ വിടർന്ന കണ്ണുകളോടെ അമ്മയ്ക്ക് നേരെ തിരിഞ്ഞുനോക്കിയത് കുടുംബത്തിനും ഡോക്ടർമാർക്കും വൈകാരികമായ നിമിഷമായി.
കുട്ടികളുടെ ഈ അതിജീവനം രാജ്യവ്യാപകമായി ശ്രദ്ധിക്കപ്പെട്ടതോടെ കുട്ടികളിലെ കോക്ലിയർ ഇംപ്ലാന്റ് സേവനങ്ങൾക്കും തുടർചികിത്സയ്ക്കുമായി ന്യൂ സൗത്ത് വെയിൽസ് സർക്കാർ നാല് വർഷത്തേക്ക് 20.4 മില്യൺ ഡോളർ ധനസഹായവും പ്രഖ്യാപിച്ചിട്ടുണ്ട്. വൈദ്യശാസ്ത്രത്തിന്റെ വളർച്ചയും മാതാപിതാക്കളുടെ നിശ്ചയദാർഢ്യവും ചേർന്ന് ഈ കുരുന്നുകൾക്ക് മുന്നിൽ പുതിയൊരു ലോകമാണ് തുറന്നുനൽകിയിരിക്കുന്നത്.




