ജീവിതം എന്നത് പലപ്പോഴും മുൻകൂട്ടി നിശ്ചയിക്കാൻ കഴിയാത്ത അപ്രതീക്ഷിത വഴിത്തിരിവുകളുടെ ഒരു വലിയ പരമ്പരയാണ്. സമൂഹം പൂർണ്ണമായും കൈവിട്ടേക്കാവുന്ന വിചിത്ര സ്വഭാവക്കാരും ഒറ്റപ്പെട്ടവരുമായ മനുഷ്യരുടെ ഉള്ളിലും സ്നേഹത്തിന്റെ വലിയ ഉറവയുണ്ടെന്ന് തിരിച്ചറിയുമ്പോഴാണ് നാം മനുഷ്യത്വത്തിന്റെ യഥാർഥ സൗന്ദര്യം അനുഭവിച്ചറിയുന്നത്. തിയോഡോർ മെൽഫി സംവിധാനം ചെയ്ത്, ബിൽ മുറെ മുഖ്യവേഷത്തിൽ അഭിനയിച്ച ‘സെന്റ് വിൻസെന്റ്’ (St. Vincent) എന്ന ഹൃദ്യമായ ചലച്ചിത്രം നമ്മെ ഓർമ്മിപ്പിക്കുന്നതും മറ്റൊന്നല്ല. ജീവിതത്തിന്റെ സായാഹ്നത്തിൽ കയ്പേറിയ അനുഭവങ്ങളുടെ ഭാരവും പേറി ജീവിക്കുന്ന ഒരു വൃദ്ധന്റെ പരുക്കൻ ഭാവങ്ങൾക്കു പിന്നിലെ സ്നേഹനിർഭരമായ മനസ്സ് വരച്ചുകാട്ടുന്ന ഈ ചിത്രം, ആത്മീയവും മാനുഷികവുമായ ഒട്ടനവധി ചിന്തകളാണ് ഓരോ പ്രേക്ഷകന്റെയും മനസ്സിൽ അവശേഷിപ്പിക്കുന്നത്.
ഈ സിനിമയുടെ കേന്ദ്രബിന്ദു വിൻസെന്റ് മക്കെന്ന എന്ന വിരമിച്ച സൈനികനാണ്. ബ്രൂക്ലിനിലെ തന്റെ ചെറിയ വീട്ടിൽ ഏകാന്തജീവിതം നയിക്കുന്ന വിൻസെന്റ്, അൽപം പരുഷമായ പെരുമാറ്റക്കാരനും മദ്യപാനത്തിനും ചൂതാട്ടത്തിനും അടിമപ്പെട്ടവനുമാണ്. സ്വന്തം കണ്ണിലും സമൂഹത്തിന്റെ നോട്ടത്തിലും അദ്ദേഹം ഒരു മോശം മനുഷ്യനാണ്. എന്നാൽ, അദ്ദേഹത്തിന്റെ ജീവിതത്തിലേക്ക് പുതിയതായി കടന്നുവരുന്ന അയൽവാസിയായ മാഗിയും മകൻ ഒലിവറും അദ്ദേഹത്തിന്റെ ലോകത്തെ മാറ്റിമറിക്കുന്നു. ഭർത്താവുമായി പിരിഞ്ഞ് ജീവിക്കുന്ന നഴ്സായ മാഗിക്ക് ജോലിക്ക് പോകേണ്ടിവരുമ്പോൾ തന്റെ പത്തുവയസ്സുകാരൻ മകൻ ഒലിവറെ നോക്കാൻ വിൻസെന്റിനെ ആശ്രയിക്കേണ്ടിവരുന്നു. തുടക്കത്തിൽ പ്രതിഫലം വാങ്ങി കുട്ടിയെ നോക്കാൻ തയ്യാറാകുന്ന വിൻസെന്റ്, ഒലിവറുമായി സമയം ചെലവഴിക്കുമ്പോൾ തന്റെ യഥാർഥ സ്വഭാവം പുറത്തെടുക്കുകയാണ്. മദ്യശാലകളിലേക്കും കുതിരപ്പന്തയ കേന്ദ്രങ്ങളിലേക്കും ഒലിവറെ ഒപ്പം കൂട്ടുന്ന വിൻസെന്റ്, അവന് ജീവിതത്തിലെ കയ്പേറിയ പാഠങ്ങൾ പ്രായോഗികമായി പകർന്നുനൽകുന്നു. അതേസമയം തന്നെ, ഒലിവർ തന്റെ പ്രായത്തിന് അതീതമായ പക്വതയോടെ വിൻസെന്റിന്റെ ജീവിതത്തിന് ഒരു വലിയ ആശ്വാസമായി മാറുകയാണ്.
മാനസിക വെല്ലുവിളികൾ നേരിടുന്ന തന്റെ പ്രിയ ഭാര്യയെ പരിചരിക്കുന്ന നഴ്സിംഗ് ഹോമിൽ അദ്ദേഹം പതിവായി എത്തുന്നതും അവിടെ വച്ച് അവളോട് സംസാരിക്കുന്നതും അദ്ദേഹത്തിന്റെ ഉള്ളിലെ അടങ്ങാത്ത സ്നേഹത്തിന്റെ ആഴം കാണിച്ചുതരുന്നു. സമൂഹത്തിന്റെ മുൻപിൽ തെറ്റുകാരനായി ചിത്രീകരിക്കപ്പെടുമ്പോഴും, തന്റെ പ്രിയപ്പെട്ടവരോടുള്ള കടമകളിൽ അദ്ദേഹം ഒരിക്കലും വീഴ്ച വരുത്തുന്നില്ല. ഒലിവറും മാഗിയും അദ്ദേഹത്തിന് ഒരു കുടുംബത്തിന്റെ സ്നേഹം തിരികെ നൽകുമ്പോൾ, വിൻസെന്റിന്റെ ഏകാന്തതയ്ക്ക് അറുതി വരുന്നു. ഇത് കാണുമ്പോൾ സ്നേഹം പുറംലോകത്തിന്റെ എല്ലാ വിധിയെഴുത്തുകളെയും മറികടക്കുന്നു എന്ന് നമുക്കും ബോധ്യമാകും.
ഒരു ദിവസം അദ്ദേഹത്തിന് കഠിനമായ ഒരു പക്ഷാഘാതം സംഭവിക്കുകയും അദ്ദേഹത്തെ ആശുപത്രിയിൽ പ്രവേശിപ്പിക്കുകയും ചെയ്യുന്നു. ഈ രോഗാവസ്ഥ അദ്ദേഹത്തിന്റെ ജീവിതശൈലിയെ ഒരു പരിധിവരെ മാറ്റിമറിക്കുന്നു. തന്റെ പഴയ അഹങ്കാരവും ഈഗോയും മാറ്റിപ്പിടിച്ച്, ചുറ്റുമുള്ളവരുടെ സ്നേഹവും സഹായവും സ്വീകരിക്കാൻ അദ്ദേഹം തയ്യാറാകുകയാണ്. ആ രോഗാവസ്ഥ അദ്ദേഹത്തിന്റെ ഉള്ളിലെ മനുഷ്യനെ കൂടുതൽ നിര്മലനാക്കി മാറ്റി എന്നു പറയാം. താന് ആശുപത്രിയില് ആയിരുന്നപ്പോള് തന്റെ ഭാര്യ മരണമടയുന്നത് അദ്ദേഹം അറിയുന്നില്ല. ആ വാര്ത്ത അറിയുമ്പോള് തളർന്നുപോയ വിൻസെന്റിനെയാണ് നാം കാണുന്നത്. സമൂഹത്തിന്റെ മുൻപിൽ പരുക്കനായും തെറ്റുകാരനായും ചിത്രീകരിക്കപ്പെടുമ്പോഴും, തന്റെ പ്രിയപ്പെട്ടവരോടുള്ള കടമകളിൽ അദ്ദേഹം ഒരിക്കലും വീഴ്ച വരുത്തിയിരുന്നില്ല.
ഗർഭിണിയായ റഷ്യക്കാരി ഡാക്കയുമായുള്ള അദ്ദേഹത്തിന്റെ അപൂർവമായ സൗഹൃദം സമൂഹത്തിന്റെ മുൻവിധികളെ ചോദ്യം ചെയ്യുന്നതാണ്. തനിക്ക് സാമ്പത്തികമായി വലിയ ബുദ്ധിമുട്ടുകൾ നേരിടേണ്ടിവരുമ്പോഴും, ഒലിവറിന്റെ സുരക്ഷയ്ക്കും സന്തോഷത്തിനും വേണ്ടി വിൻസെന്റ് തന്റെ അൽപം വരുന്ന സമ്പാദ്യവും സമയവും മാറ്റിവയ്ക്കുന്നു. പ്രായത്തിന്റെ അവശതകളും ശാരീരികബുദ്ധിമുട്ടുകളും അദ്ദേഹത്തെ വേദനിപ്പിക്കുമ്പോഴും തന്റെ ചുറ്റുമുള്ളവരെ സംരക്ഷിക്കുന്നതിൽ അദ്ദേഹം ഒരു വിട്ടവീഴ്ചയ്ക്കും തയ്യാറാകുന്നില്ല.
ഒലിവർ പഠിക്കുന്ന കത്തോലിക്കാ സ്കൂളിൽ ഒരു പ്രത്യേക അസൈൻമെന്റ് നൽകപ്പെടുന്നു: ‘നിങ്ങളുടെ ജീവിതത്തിൽ നിങ്ങൾ കണ്ട ഒരു വിശുദ്ധനെ (Saint) അവതരിപ്പിക്കുക’ എന്നതായിരുന്നു ആ ടാസ്ക്. പല കുട്ടികളും ചരിത്രത്തിലെ പ്രശസ്തരായ വിശുദ്ധരുടെ പേരുകൾ അവതരിപ്പിച്ചപ്പോൾ, ഒലിവർ തിരഞ്ഞെടുത്തത് തന്റെ അയൽക്കാരനായ വിൻസെന്റിനെയാണ്. സ്കൂൾ ഹാളിൽ നടന്ന ആ സമ്മേളനത്തില് ഒലിവർ വിൻസെന്റിന്റെ ജീവിതം വിവരിക്കുന്നു; പുറമെ പരുക്കനാണെങ്കിലും ഉള്ളിൽ സ്നേഹവും കരുണയും സൂക്ഷിക്കുന്ന, തന്റെ ഭാര്യയെ ആത്മാർഥമായി സ്നേഹിച്ച, തനിക്ക് ഒരു വഴികാട്ടിയായ ആ മനുഷ്യനാണ് – വിൻസെന്റാണ് – തന്റെ വിശുദ്ധൻ എന്ന് ഒലിവർ പ്രഖ്യാപിക്കുന്നു. ഒലിവറിന്റെ ഈ പ്രഖ്യാപനം എല്ലാവരെയും അദ്ഭുതപ്പെടുത്തി. ഒലിവറിന്റെ ഈ വാക്കുകള്ക്ക് സാക്ഷ്യം വഹിച്ച വിൻസെന്റിന്റെ മനസ്സിലും മാറ്റങ്ങള് സംഭവിക്കുകയാണ്.
മനുഷ്യന്റെ ജീവിതം ഇത്തരം വിചിത്രമായ സൗഹൃദങ്ങൾ കൊണ്ട് നിറഞ്ഞതാണെന്ന് തോന്നിപ്പോകുന്നു. പുറമെ കാണുന്ന പരുക്കൻ ഭാവങ്ങൾക്കപ്പുറത്ത് ഓരോ മനുഷ്യനിലും നന്മയുടെ ഒരു ചെറിയ വെളിച്ചം ഒളിഞ്ഞിരിപ്പുണ്ടാകാം. തളർന്ന ശരീരവുമായി, വാർധക്യത്തിന്റെ അവശതകൾക്കിടയിലും തന്റെ ഉത്തരവാദിത്തങ്ങളിൽ നിന്ന് പിന്മാറാത്ത വിൻസെന്റ്, പുറംലോകം വിധിക്കുന്നതിനപ്പുറം സ്നേഹിക്കാൻ കഴിയുന്ന ഒരു മനുഷ്യന്റെ പ്രതീകമായി മാറുന്നു. സൗഹൃദം എന്നത് യാതൊരു നിബന്ധനകളുമില്ലാതെ മറ്റുള്ളവരെ അംഗീകരിക്കുമ്പോഴാണ് പൂർണ്ണമാകുന്നതെന്ന് വിൻസെന്റും ഒലിവറും തെളിയിക്കുന്നു.
നമ്മുടെ ജീവിതത്തിലും എത്രയോ നഷ്ടങ്ങളും വേദനകളും തെറ്റായ ധാരണകളും ഉണ്ടായിട്ടുണ്ടാകും. ചില വ്യക്തികളെക്കുറിച്ച് നാം പുറമെ കാണുന്ന ലക്ഷണങ്ങൾ വച്ച് തെറ്റായ ധാരണകളിൽ എത്തിച്ചേരാറുണ്ട്. എന്നാൽ, ആ മുൻവിധികളിൽ തളർന്നിരിക്കാതെ, മനുഷ്യരിലെ നന്മയെ തിരിച്ചറിയാൻ ഈ ചലച്ചിത്രം നമ്മെ പ്രേരിപ്പിക്കുന്നു. പ്രത്യാശയുടെയും കാരുണ്യത്തിന്റെയും അവസാനത്തെ വെളിച്ചം കാത്തുനിൽക്കുന്നവരാണ് നമ്മളോരോരുത്തരും. ‘സെന്റ് വിൻസെന്റ്’ നൽകുന്ന സന്ദേശം ലളിതമാണ് – ആരും പൂർണ്ണരല്ല; എങ്കിലും സ്നേഹവും കരുണയും കൊണ്ട് നമുക്ക് പരസ്പരം താങ്ങായി മാറാൻ സാധിക്കും!
ഫാ. ജി. കടൂപ്പാറയിൽ MCBS
