ലക്ഷ്യങ്ങളിലേക്ക് നടക്കുമ്പോൾ ജീവിതവഴിയിൽ കണ്ടുമുട്ടുന്ന ഒരു ചെറിയ തടസ്സം മാത്രമാണ് പരാജയം. അതിനെ ഭയന്ന് ആരും തങ്ങളുടെ സ്വപ്നങ്ങൾ വഴിയിൽ ഉപേക്ഷിക്കരുത്. തെറ്റുകൾ തിരുത്തി, കൂടുതൽ കരുത്തോടെ വീണ്ടും മുന്നേറാൻ നമ്മളെ പഠിപ്പിക്കുന്ന മനോഹരമായ ഒരു പാഠമാണ് ഓരോ തോൽവിയും.
തോൽവികൾ തന്ന പാഠങ്ങൾ
ഈ ലോകത്ത് ഒരിക്കൽപോലും തോൽക്കാത്തവരായി ആരുമില്ല. ഇന്ന് നമ്മൾ ബഹുമാനിക്കുന്ന വലിയ മനുഷ്യരായ ആൽബർട്ട് ഐൻസ്റ്റീൻ, അബ്രഹാം ലിങ്കൺ, ഡോ. എ.പി.ജെ. അബ്ദുൾ കലാം എന്നിവരെല്ലാം ജീവിതത്തിൽ ഒരുപാട് തവണ തോറ്റവരാണ്. പക്ഷേ, പരാജയപ്പെടുമ്പോൾ വിഷമിച്ചിരിക്കാതെ, അവർ തങ്ങളുടെ തെറ്റുകളിൽ നിന്ന് പഠിച്ച് വീണ്ടും മുന്നോട്ട് പോയി. ആ നിശ്ചയദാർഢ്യമാണ് അവരെ വലിയ വിജയങ്ങളിലേക്ക് നയിച്ചത്.
തോറ്റാലും വീണ്ടും ശ്രമിക്കുക
ഒരിക്കൽ തോറ്റാൽ “എനിക്കിതിന് കഴിയില്ല” എന്ന് കരുതി ഒരിക്കലും പിന്മാറരുത്. എത്ര തവണ വീണാലും ആത്മവിശ്വാസത്തോടെ വീണ്ടും ശ്രമിക്കണം. നമ്മുടെ സ്വാതന്ത്ര്യസമര പോരാളികൾ തിരിച്ചടികൾ കണ്ട് ഭയന്ന് പിന്മാറിയിരുന്നെങ്കിൽ ഇന്ന് നമ്മൾ സ്വതന്ത്രരായി ജീവിക്കുമായിരുന്നില്ല. പ്രതീക്ഷ കൈവിടാതെ പ്രയത്നിച്ചാൽ മാത്രമേ വിജയത്തിന്റെ സന്തോഷം അനുഭവിക്കാൻ കഴിയൂ.
ഓരോ പരാജയവും നമ്മളെ കൂടുതൽ ശക്തരാക്കും. നാളെ നിങ്ങൾ വിജയിച്ചുനിൽക്കുമ്പോൾ, നിങ്ങൾ എത്ര തവണ തോറ്റു എന്നതിനെക്കുറിച്ചല്ല, എത്ര ഭംഗിയായി തിരികെ ഉയർന്നുവന്നു എന്നതിനെക്കുറിച്ചാവും ലോകം സംസാരിക്കുക. അതിനാൽ തോൽവികളെ ഭയപ്പെടാതെ ആത്മവിശ്വാസത്തോടെ മുന്നോട്ട് പോവുക; വിജയം നിങ്ങളെ തേടിയെത്തും.
വിവർത്തനം: ഡിൻസി തോമസ്
