യോഹന്നാന്റെ സുവിശേഷം എട്ടാം അധ്യായത്തിൽ, കൂടാരത്തിരുനാളിനു ശേഷം ജെറുസലേം ദൈവാലയത്തിൽ വച്ച് അനേകം പ്രവചനങ്ങൾ നടത്തുന്ന യേശുവിനെയാണ് നാം കണ്ടുമുട്ടുന്നത്. പക്ഷേ, അവിടെയുണ്ടായിരുന്ന യഹൂദപ്രമാണികൾക്ക് അവനോടുള്ള എതിർപ്പ് കൂടുകയും അവനെ കൊല്ലണമെന്ന തീരുമാനത്തിലേക്ക് എത്തുകയും ചെയ്യുന്നു. ഈയൊരു സാഹചര്യത്തിലാണ് യഹൂദരുടെ ഏറ്റവും വലിയ വിശ്വാസത്തെ, അഭിമാനത്തെ മുറിവേൽപിച്ചുകൊണ്ട് യേശു ഇപ്രകാരം പറയുന്നത്: “നിങ്ങൾ അബ്രഹാത്തിന്റെ സന്തതികളല്ല” എന്ന്.
ലോകക്രമത്തിൽ അവർ അബ്രഹാമിന്റെ സന്തതികളാണെങ്കിൽ പോലും ആത്മീയമായി അവർ അങ്ങനെയല്ല എന്ന് യേശു ഓർമ്മിപ്പിക്കുന്നു. പ്രിയമുള്ളവരേ, പലപ്പോഴും നമ്മളും ഇപ്രകാരമല്ലേ ജീവിക്കുന്നതെന്ന് ചിന്തിക്കേണ്ട സമയം അതിക്രമിച്ചിരിക്കുന്നു. ഒരുവിധത്തിൽ ഉപരിപ്ലവമായി മാത്രമല്ലേ നാം ക്രിസ്ത്യാനികൾ ആയിരിക്കുക. തൊലിപ്പുറത്തു മാത്രമേ നമുക്ക് ക്രിസ്തീയതയുള്ളൂ.
നാം ദൈവത്തിൽ നിന്നുള്ളവരാണോ, പിശാചിൽ നിന്നുള്ളവരാണോ എന്നതാണ് യേശു മുന്നോട്ടുവയ്ക്കുന്ന പ്രധാന ചോദ്യം. ദൈവത്തിന്റെ സന്തതികളാണെങ്കിൽ യേശുവിൽ അടിയുറച്ച വിശ്വാസവും അവന്റെ വാക്കുകളോട് പൂർണ്ണമായ വിധേയത്വവും നമുക്ക് പുലർത്താം. കാരണം, “യേശുക്രിസ്‌തുവിലുള്ള വിശ്വാസം വഴി നിങ്ങളെല്ലാവരും ദൈവപുത്രന്മാരാണ്‌” (ഗലാ. 3:26). പക്ഷേ, നമ്മൾ പിശാചിന്റെ പുത്രന്മാരാണെങ്കിൽ ദൈവത്തിങ്കലേക്കു തിരിയാൻ പരിശ്രമിക്കണം. ദൈവം നമ്മെ സ്വീകരിക്കും. “പിതാവ്‌ എനിക്കു നല്‍കുന്നവരെല്ലാം എന്റെ അടുത്തുവരും. എന്റെ അടുക്കല്‍ വരുന്നവനെ ഞാന്‍ ഒരിക്കലും തള്ളിക്കളയുകയുമില്ല” (യോഹ. 6:37).
ഫാ. ജോസഫ് കുടിലിൽ
