“ആ കുട്ടി എന്റെ മടിയിൽ കിടന്നാണ് മരിച്ചത്”- നോബിൾ ഫ്രാൻസിസിന്റെ മരണത്തെക്കുറിച്ച്…

“ഒരു ഇല കൊഴിയുന്ന ശാന്തതയോടെ അവൻ ഈ ഭൂമിയിൽ നിന്നും യാത്രയായി” – എംഎംബി ബ്രദേഴ്സ് സമൂഹത്തിന്റെ സുപ്പീരിയർ ജനറൽ ഫ്രാങ്കോ ബ്രദറിന്റെ വാക്കുകളാണ് ഇത്.

നോബിൾ ഫ്രാൻസിസ് എന്ന 28-കാരനെക്കുറിച്ചാണ് കണ്ഠമിടറിയുള്ള അദ്ദേഹത്തിന്റെ ഈ വാക്കുകൾ. ‘ടോയ്‌ലറ്റിൽ ഉപേക്ഷിക്കപ്പെട്ട നിധി’ എന്ന പേരിൽ ഫാ. ജെൻസൺ ലാസലറ്റ്, നോബിൾ ഫ്രാൻസിസിനെക്കുറിച്ച് തയ്യാറാക്കിയ ലേഖനം ആഗസ്റ്റ്‌ ഏഴാം തീയതി ലൈഫ് ഡേയിൽ പ്രസിദ്ധീകരിച്ചിരുന്നു. ഈ ലേഖനം പ്രസിദ്ധീകരിച്ചതിനുശേഷം ലൈഫ് ഡേയുടെ ടെക്നിക്കൽ ഹെഡ് ഫാ. വിൻസെന്റ് സ്രാമ്പിക്കലിനെ തേടി ഒരു സന്ദേശം എത്തി. അത് എംഎംബി ബ്രദേഴ്സിന്റെ ഇപ്പോഴത്തെ സുപ്പീരിയർ ജനറലിന്റേതായിരുന്നു. നോബിൾ ഫ്രാൻസിസിനെ അവസാനമായി ശുശ്രൂഷിക്കുകയും നല്ല മരണത്തിനായി ഒരുക്കുകയും ചെയ്ത അദ്ദേഹത്തിന് ഈ ലേഖനം കണ്ടപ്പോൾ വിളിക്കാതിരിക്കാൻ കഴിയുമായിരുന്നില്ല. കാരണം, അദ്ദേഹത്തിനു മുന്നിൽ വിശുദ്ധനായി മരിച്ച നോബിൾ ഫ്രാൻസിസിന്റെ ജീവിതസാക്ഷ്യം ഉണ്ടായിരുന്നു. വിങ്ങുന്ന ഹൃദയത്തോടെ അദ്ദേഹം ആ ചെറുപ്പക്കാരനെക്കുറിച്ച് മനസ്സ് തുറന്നു…

ടോയ്‌ലറ്റിൽ ഉപേക്ഷിക്കപ്പെട്ട നിലയിൽ കണ്ടെത്തിയ ആ കുഞ്ഞിനെ വളർത്തിയതും വലുതാക്കിയതും എംഎംബി ബ്രദേഴ്സിന്റെ നേതൃത്വത്തിലുള്ള എമ്മാവൂസ് വില്ലയിലായിരുന്നു. ഇരുത്തിയാൽ ഇരിക്കും. അങ്ങോട്ടും ഇങ്ങോട്ടും ആടും. സംസാരമില്ല. മറ്റു ചലനങ്ങളില്ല. എന്നാൽ എല്ലാം അറിയുന്നുമുണ്ട്. 28 വയസു വരെ അവൻ ജീവിച്ചു. 1986 ഡിസംബർ 15-ന് ജനിച്ച് 2014 മാർച്ച് മൂന്നിനാണ് ആ കുഞ്ഞ് മരിക്കുന്നത്. ആ സമയം സ്ഥാപനത്തിന്റെ സുപ്പീരിയർ ആയിരുന്നു ഫ്രാങ്കോ ബ്രദർ.

നോബിളിന്റെ അവസാന നിമിഷത്തെക്കുറിച്ച് അദ്ദേഹം പങ്കുവയ്ക്കുന്നത് ഇപ്രകാരമാണ്: “തമ്പുരാന്റെ സന്നിധിയിലേയ്ക്ക് പോകുന്നതിനു മുമ്പ് ആ കുഞ്ഞിന്റെ കയ്യിൽ പിടിച്ച് ചെകിട്ടോർമ്മ ചൊല്ലിക്കൊടുത്തത് ഞാനായിരുന്നു. അവന് കേൾവിയും കാഴ്ചയും ഒന്നുമില്ലെങ്കിലും ആ ഒരു കൃത്യം നിർവ്വഹിക്കുവാൻ ദൈവം ഉപകരണമാക്കിയത് എന്നെയായിരുന്നു. അവന്റെ ആത്മാവ് തമ്പുരാന്റെ സന്നിധിയിലേയ്ക്കു പോയത് ഒരു ഇല അടർന്നുവീഴുന്ന ശാന്തതയോടെ ആയിരുന്നു. ആ കുഞ്ഞിന്റെ മരണം ഉൾക്കൊള്ളാൻ കുറെ കാലങ്ങളോളം എനിക്ക് സാധിച്ചില്ല. അവൻ ഞങ്ങൾക്ക് ഒരു നിധി തന്നെയായിരുന്നു.” ഉള്ളുലയുന്ന ഒരു വേദന അദ്ദേഹത്തിന്റെ ഈ വാക്കുകളിൽ നിറഞ്ഞിരുന്നു.

എല്ലാവരാലും ഉപേക്ഷിക്കപ്പെട്ട് എമ്മാവൂസ് വില്ലയിലെത്തിയ ആ കുഞ്ഞിന്റെ മൃതസംസ്കാര ശുശ്രൂഷ അത്യാഡംബരപൂർവ്വമായിരുന്നു എന്നത് ഇന്നും അവർക്ക് സന്തോഷം നൽകുന്നു. അഭിവന്ദ്യ പിതാവിന്റെയും വികാരി ജനറാളിന്റെയും ബ്രദേഴ്‌സിന്റെയും നിരവധിയായ സന്യസ്തരുടെയും സാന്നിധ്യത്തിലായിരുന്നു ആ കുഞ്ഞിന്റെ മൃതസംസ്കാരം. എംഎംബിയിലെ സഹോദരങ്ങളായിരുന്നു അവന്റെ മൃതദേഹം വഹിച്ചുകൊണ്ട് പള്ളിയിലേയ്ക്കു പോയത്. “ഈ ഒരു ലേഖനം ലൈഫ് ഡേയിൽ കണ്ടപ്പോൾ വളരെയധികം സന്തോഷം തോന്നി, ഒപ്പം നന്ദിയും” – അദ്ദേഹം പറഞ്ഞുനിർത്തി.

അധികമൊന്നും സംസാരിച്ചിട്ടില്ല, പ്രവർത്തിച്ചിട്ടില്ലായെങ്കിലും വിശുദ്ധമായ ജീവിതമായിരുന്നു ആ യുവാവിന്റേത്. അതിനു തെളിവാണ് അവൻ്റെ കുഴിമാടത്തിൽ വന്ന് പ്രാർത്ഥിച്ച് കടന്നുപോകുന്നവർക്ക് അവനിലൂടെ ദൈവം ചൊരിയുന്ന അനുഗ്രഹങ്ങൾ. കുഞ്ഞുങ്ങളില്ലാത്ത പല ദമ്പതികൾക്കും ഇന്ന് അവൻ്റെ മദ്ധ്യസ്ഥതയാൽ ദൈവം കുഞ്ഞുങ്ങളെ നൽകി അനുഗ്രഹിക്കുകയാണ്.

മരിയ ജോസ്