പരിശുദ്ധ ഫ്രാൻസിസ് പിതാവ് ആഹ്വാനം ചെയ്ത ജപമാല മാരത്തോണിന്റെ അഞ്ചാം ദിവസമായ ഇന്ന് പ്രത്യേക ജപമാല പ്രാർത്ഥന നടക്കുന്നത് ദക്ഷിണ കൊറിയയിലെ നമ്യാങിലെ അവർ ലേഡി ഓഫ് റോസറി ദൈവാലയത്തിലാണ്. കുഞ്ഞുങ്ങൾക്കും മുതിർന്നവർക്കുമായി പ്രത്യേകം പ്രാർത്ഥിക്കുന്ന അഞ്ചാം ദിനത്തിൽ നമ്യാങിലെ ദൈവാലയത്തെക്കുറിച്ചും അവിടുത്തെ പ്രത്യേകതകളെക്കുറിച്ചുമാണ് ഇന്ന് ലൈഫ് ഡേ പങ്കുവയ്ക്കുന്നത്.
ദക്ഷിണ കൊറിയയിലെ ആദ്യത്തെ മരിയൻ തീർത്ഥാടന കേന്ദ്രം നമ്യാങിലെ അവർ ലേഡി ഓഫ് റോസറി ദൈവാലയമാണ്. പത്തൊൻപതാം നൂറ്റാണ്ടിൽ നടന്ന ക്രൈസ്തവ പീഡനത്തിൽ കൊല്ലപ്പെട്ട 19 രക്തസാക്ഷികളുടെ ബഹുമാനാർത്ഥമാണ് ഈ ദൈവാലയം നിർമ്മിക്കപ്പെട്ടത്. കൊറിയ സാക്ഷ്യം വഹിച്ച ഏറ്റവും ക്രൂരവും ഭീകരവുമായ ക്രൈസ്തവ മതപീഡനം നടന്നത് പത്തൊൻപതാം നൂറ്റാണ്ടിലായിരുന്നു. 1991 -ൽ പരിശുദ്ധ ജപമാല രാജ്ഞിയുടെ തിരുനാൾ ദിനമായ ഒക്ടോബർ ഏഴിനാണ് ഈ ദൈവാലയം രക്ത സാക്ഷികൾക്കായി പ്രത്യേകം സമർപ്പിക്കപ്പെട്ടത്. അതിനാൽ തന്നെ ഇത് യാഥാർത്ഥത്തിൽ ഒരു മരിയൻ തീർത്ഥാടന കേന്ദ്രമാണ്. തുടക്കകാലം മുതൽ തന്നെ ലോകത്തിന്റെയും പ്രത്യേകിച്ച് കൊറിയയുടെയും സമാധാനത്തിനും അനുരഞ്ജനത്തിനുമായിട്ടാണ് ഈ ദൈവാലയത്തിൽ പ്രാർത്ഥനകൾ നടക്കുന്നത്.
ദൈവാലയത്തിന്റെ സമീപത്തിൽ തന്നെ ‘റോസറി ഹിൽ’ എന്ന പേരിൽ ഒരു ചെറിയ മലയും ഒരു ചാപ്പലും കൂടിയുണ്ട്. ‘റോസറി റോഡ്’ (ജപമാല നിരത്ത്) എന്ന് നാമകരണം ചെയ്തിരിക്കുന്ന വഴിയിൽ കൂടി നടന്നാണ് കരങ്ങൾ വിരിച്ചു നിൽക്കുന്ന പരിശുദ്ധ അമ്മയുടെ രൂപത്തിനരികിലേക്ക് തീർത്ഥാടകർ എത്തിച്ചേരുന്നത്. അമ്മയുടെ അടുക്കൽ സ്നേഹത്തോടെ ചേർന്ന് നിൽക്കുന്ന ഉണ്ണിയേശുവിനെയും നമുക്കവിടെ കാണാം. ഉണ്ണിയേശു തന്റെ അമ്മയുടെ ചാരത്തണഞ്ഞിരിക്കുന്നതുപോലെ വിശ്വാസികൾ തങ്ങളുടെ സന്തോഷവും വിഷമതകളും ആഗ്രഹങ്ങളുമെല്ലാം അമ്മയുടെ അരികിൽ വന്നാണ് പങ്കുവെയ്ക്കുന്നത്. അതിനാൽതന്നെ നമ്യാങ്, പരിശുദ്ധ അമ്മയുടെയും ദൈവത്തിന്റെയും പ്രത്യേക സംരക്ഷണത്തിലാണ്. ദൈവാലയത്തിന്റെ വശങ്ങളിലൂടെ കുരിശിന്റെ വഴി പ്രാർത്ഥിച്ചുകൊണ്ട് തീർത്ഥാടകർക്ക് ‘ഗാർഡൻ ഓഫ് ജീസസ് മെർസിഫുൾ’ (കാരുണ്യവാനായ യേശുവിന്റെ പൂന്തോട്ടം) എന്ന സ്ഥലത്ത് എത്തിച്ചേരുവാൻ സാധിക്കും. അവിടെ പ്രത്യേകമായി പ്രതിഷ്ഠിക്കപ്പെട്ടിരിക്കുന്ന യേശുവിന്റെ കരുണയുടെ രൂപത്തിന്റെ മുൻപിൽ നിന്ന് പ്രാർത്ഥിക്കുവാനും സാധിക്കും. വി. ഫൗസ്റ്റീനയുടെയും ജോൺ പോൾ രണ്ടാമൻ പാപ്പായുടെയും അർദ്ധകായ രൂപങ്ങളും ഇവിടെയുണ്ട്. ദെവത്തിന്റെ അനന്തമായ കാരുണ്യത്തെയും സ്നേഹത്തെയും കുറിച്ച് ലോകത്തെ അറിയിക്കേണ്ട ആവശ്യകതയുണ്ട് എന്ന ബോധ്യത്തിലാണ് കരുണയുടെ ഈ പൂന്തോട്ടം പ്രത്യേകമായി നിർമ്മിച്ചിരിക്കുന്നത്.
ദൈവാലയത്തിന്റെ അൾത്താരയിൽ പ്രധാനമായും രണ്ടു സൂചകങ്ങൾ ചേർക്കപ്പെട്ടിരിക്കുന്നു. റോസാച്ചെടികളുടെ ഒരു കൂട്ടവും അതുപോലെ തന്നെ മുൾക്കിരീടവും. ജപമാല ചൊല്ലി പ്രാർത്ഥിക്കേണ്ടതിന്റെ ആവശ്യകതയെയും കഷ്ടതകളിലൂടെ മാത്രം സ്വർഗ്ഗത്തിൽ എത്തിച്ചേർന്ന യേശുവിന്റെയും പരിശുദ്ധ അമ്മയുടെയും സഹനങ്ങളെയും സൂചിപ്പിക്കുവാനാണ് മുൾക്കിരീടവും റോസാച്ചെടിയും കൂട്ടിച്ചേർത്തിരിക്കുന്നത്. നമ്യാങിലെ ജപമാല നിരത്തിലേക്കുള്ള വഴി ആരംഭിക്കുന്ന ഇടത്തിൽ അവർ ലേഡി ഓഫ് വ്ലാഡിമിർ ചിത്രവും പ്രത്യേകം പ്രതിഷ്ഠിക്കപ്പെട്ടിട്ടുണ്ട്. ‘അഡോറേഷ്യോ ഡൊമിനി’ എന്നറിയപ്പെടുന്ന അൾത്താരയിൽ വി. ജോൺ പോൾ രണ്ടാമൻ പാപ്പായുടെ തിരുശേഷിപ്പും സൂക്ഷിച്ചിരിക്കുന്നു.
സുനീഷ നടവയല്‍
മരിയൻ മാരത്തോൺ പ്രാർത്ഥന 5: നിയോഗം – കുട്ടികൾ, കൗമാരക്കാർ
1. തിരി കൊളുത്തുക
(പരിശുദ്ധ കന്യകാമറിയത്തിൻ്റെ തിരുസ്വരൂപത്തിൻ്റെ മുമ്പിലോ ഛായചിത്രത്തിൻ്റെ മുമ്പിലോ തിരി കത്തിച്ചു കൊണ്ടാരംഭിക്കുക)
2. തിരുവചന ഭാഗം വായന: ലൂക്കാ 18: 1-8
(വിശുദ്ധ ലൂക്കാ സുവിശേഷം പതിനെട്ടാം അധ്യായം ഒന്നു മുതൽ എട്ടുവരെയുള്ള തിരുവചന ഭാഗം വായിക്കുക)
ഭഗ്‌നാശരാകാതെ എപ്പോഴും പ്രാര്‍ഥിക്കണം എന്നു കാണിക്കാന്‍ യേശു അവരോട്‌ ഒരു ഉപമ പറഞ്ഞു:
ദൈവത്തെ ഭയപ്പെടുകയോ മനുഷ്യരെ മാനിക്കുകയോ ചെയ്യാത്ത ഒരുന്യായാധിപന്‍ ഒരു പട്ടണത്തില്‍ ഉണ്ടായിരുന്നു.
ആ പട്ടണത്തില്‍ ഒരു വിധവയും ഉണ്ടായിരുന്നു. അവള്‍ വന്ന്‌ അവനോട്‌, എതിരാളിക്കെതിരേ എനിക്കു നീതി നടത്തിത്തരണമേ എന്നപേക്‌ഷിക്കുമായിരുന്നു.
കുറേ നാളത്തേക്ക്‌ അവന്‍ അതു ഗൗനിച്ചില്ല. പിന്നീട്‌, അവന്‍ ഇങ്ങനെ ചിന്തിച്ചു: ഞാന്‍ ദൈവത്തെ ഭയപ്പെടുകയോ മനുഷ്യരെ മാനിക്കുകയോ ചെയ്യുന്നില്ല.
എങ്കിലും ഈ വിധവ എന്നെ ശല്യപ്പെടുത്തുന്നതുകൊണ്ടു ഞാന വള്‍ക്കു നീതിനടത്തിക്കൊടുക്കും. അല്ലെങ്കില്‍, അവള്‍ കൂടെക്കൂടെ വന്ന്‌ എന്നെ അസഹ്യപ്പെടുത്തും.
കര്‍ത്താവ്‌ പറഞ്ഞു: നീതിരഹിതനായ ആന്യായാധിപന്‍ പറഞ്ഞതെന്തെന്ന്‌ ശ്രദ്‌ധിക്കുവിന്‍.
അങ്ങനെയെങ്കില്‍, രാവും പകലും തന്നെ വിളിച്ചു കരയുന്നതന്റെ തെരഞ്ഞെടുക്കപ്പെട്ട വര്‍ക്കു ദൈവം നീതി നടത്തിക്കൊടുക്കുകയില്ലേ? അവിടുന്ന്‌ അതിനു കാലവിളംബം വരുത്തുമോ?
അവര്‍ക്കു വേഗം നീതി നടത്തിക്കൊടുക്കും എന്നു ഞാന്‍ നിങ്ങളോടു പറയുന്നു. എങ്കിലും, മനുഷ്യപുത്രന്‍ വരുമ്പോള്‍ ഭൂമിയില്‍ വിശ്വാസം കണ്ടെത്തുമോ?
3. വിചിന്തനം പങ്കുവയ്ക്കുക.
(വചന വായനയ്ക്കു ശേഷം അല്പം നിശബ്ദ വിചിന്തനത്തിനുള്ള സമയം അനുവദിക്കുക. കാർമ്മികൻ താഴെ പറയുന്നതോ തത്തുല്യമായ മറ്റെതെങ്കിലും വ്യഖ്യാനം നൽകുക.)
പ്രിയ സഹോദരി സഹോദരന്മാരേ, പകർച്ചവ്യാധിയുടെ സമയം നമ്മുടെ ജീവിതത്തെ സാരമായി ബാധിച്ചു. പരീക്ഷണങ്ങളുടെ ഈ സമയം വിശ്വാസത്തിനു സാക്ഷ്യം വഹിക്കുവാനും പ്രത്യാശ പരിപോഷിപ്പിക്കുവാനും ആത്മീയവും ശാരീരികവുമായ കാരുണ്യ പ്രവർത്തങ്ങളിൽ ഏർപ്പെടാനുമുള്ള നല്ല അവസരമാണ്.
പ്രിയപ്പെട്ടവരെ നഷ്ടപ്പെട്ടതിന്നാലും മരണസമയത്തും ശവസംസ്കാര ശുശ്രൂഷയിൽ പോലും അവരോടൊപ്പം സന്നിഹിതരായാൽ കഴിയാത്തതിൻ്റെ തീവ്ര ദുഃഖം നമ്മളിൽ ചിലരിൽ തങ്ങി നിൽക്കുന്നു. കുടുബപരവും സാമൂഹികവുമായ ബന്ധങ്ങൾ കഠിനമായ പരീക്ഷണങ്ങൾക്കു വിധേയമായി. സാമ്പത്തിക പ്രതിസന്ധിയും തൊഴിലില്ലായ്മയും കുടുബങ്ങളുടെ ഭാവി അനിശ്ചിതത്വത്തിലാക്കുന്നു. ഈ അനുഭവങ്ങളിൽ, ആദിമ ക്രൈസ്തവ സമൂഹം എന്തു ചെയ്തു എന്ന് അപ്പസ്തോലന്മാരുടെ പ്രവർത്തനങ്ങളിൽ മനോഹരമായി വിവരിച്ചിരിക്കുന്നു. “സഭ അവനുവേണ്ടി ദൈവത്തോടു തീക്‌ഷണമായി പ്രാര്‍ഥിച്ചുകൊണ്ടിരുന്നു” (അപ്പ. പ്രവ 12 : 5). നമ്മുടെ യാചനകൾ കേൾക്കാനായി ദൈവസന്നിധിയിലേക്കു നമ്മുടെ പ്രാർത്ഥനകൾ ഉയർത്താം.
4. പരിശുദ്ധ മാതാവിൻ്റെ സ്തുതിക്കായുള്ള ഒരു ഗാനം ആലപിക്കുക
5. ജപമാല പ്രാർത്ഥന ചൊല്ലുക
നമ്മൾ ഇപ്പോൾ കത്തിച്ച തിരി മഹാവ്യാധിയുടെ അവസാനത്തിനായി പ്രാർത്ഥിക്കാൻ നമ്മൾ വിളിക്കപ്പെട്ടിരിക്കുന്നു എന്നു ഓർമ്മപ്പെടുത്തുന്നു. ഈ പ്രാർത്ഥനാലയത്തിൽ ജാഗ്രതയോടെ വ്യാപരിക്കാൻ എല്ലാവരെയും ക്ഷണിക്കുന്നു. ശരീരികമായി സന്നിഹിതമാകാൻ കഴിയില്ലങ്കിലും ആത്മീയമായി സ്വഭവനങ്ങളിലും ജോലി സ്ഥലങ്ങളിലും ഇടവക സമൂഹങ്ങളിലും ഇരുന്നു കൊണ്ട് ദൈവമാതാവായ പരിശുദ്ധ കന്യകാമറിയത്തോടു ഈ പരീക്ഷണ കാലങ്ങൾ അതിജീവിക്കാനായി നമുക്കു മദ്ധ്യസ്ഥം തേടാം.
നമുക്കു പ്രാർത്ഥിക്കാം
ഓ പരിശുദ്ധ ദൈവമാതാവേ, ഞങ്ങൾ നിൻ്റെ സംരക്ഷണം തേടി നിൻ്റെ പക്കൽ വരുന്നു. ഓ ഭാഗ്യവതിയും മഹത്വപൂർണ്ണയുമായ കന്യകയേ, ഞങ്ങളുടെ ആവശ്യങ്ങളിൽ ഞങ്ങളുടെ അപേക്ഷകളെ നീ തള്ളിക്കളയരുതേ, എല്ലാ അപകടങ്ങളിൽ നിന്നും ഞങ്ങളെ വിടുവിപ്പിക്കണമേ. പിതാവും പുത്രനും പരിശുദ്ധാത്മാവുമായ സർവ്വേശ്വരാ എന്നേക്കും. ആമ്മേൻ
പ്രിയ സഹോദരി സഹോദരന്മാരെ, പരിശുദ്ധ പിതാവിനോടുള്ള ഐക്യത്തിൽ വലിയ പരീക്ഷണങ്ങളുടെ ഈ നാളുകളിൽ ആദിമ ക്രൈസ്തവ സമൂഹങ്ങളെപ്പോലെ പരിശുദ്ധ കന്യകാമറിയത്തിൻ്റെ മദ്ധ്യസ്ഥതയിലുടെ നമ്മളെ അലട്ടുന്ന കോവിഡ് എന്ന മഹാവ്യാധി അവസാനിക്കുന്നതിനായി നമ്മുടെ പ്രാർത്ഥനകള ദൈവസന്നിധിയിലേക്ക് ഉയർത്താം.
ഇന്നേ ദിനം പ്രത്യേകമായി ദക്ഷിണ കൊറിയയിലെ നമ്യാങിലെ അവർ ലേഡി ഓഫ് റോസറി ദൈവാലയത്തോട് ചേർന്ന് കുട്ടികളെയും കൗമാരക്കാരെയും സമർപ്പിച്ചു നമുക്കു പ്രാർത്ഥിക്കാം.
പരിശുദ്ധ കന്യകാമറിയത്തിൻ്റെ ചിത്രത്തിനു മുമ്പിൽ എരിയുന്ന ഈ തിരികൾ നമ്മുടെ അന്ധകാരത്തിൻ്റെ നിമിഷങ്ങളെ പ്രകാശിപ്പിക്കുകയും വെളിച്ചത്തിൻ്റെ പുതിയ അരുണോദയത്തിലേക്കു നമ്മുടെ ജീവിതങ്ങളെ പരിവർത്തനം ചെയ്യുകയും ചെയ്യട്ടെ.
(ഇപ്പോൾ നമുക്കു ജപമാല പ്രാർത്ഥന ജപിക്കാം. ജപമാലയുടെ അവസാനം ലുത്തിനിയാ, മരിയൻ ഗീതങ്ങൾ എന്നിവ പാടാവുന്നതാണ്.)
6. പ്രാർത്ഥനാ
ഓ പരിശുദ്ധ ദൈവ മാതാവേ, ഞങ്ങൾ നിൻ്റെ സംരക്ഷണം തേടി വരുന്നു. ലോകം മുഴുവൻ കഷ്ടപ്പാടുകൾക്കും ഉത്കണ്ഠകൾക്കും ഇരയായിരിക്കുന്ന ഈ ദാരുണ സാഹചര്യത്തിൽ, ദൈവമാതാവും ഞങ്ങളുടെ അമ്മയുമായ നിൻ്റെ പക്കലേക്കു ഞങ്ങൾ ഓടി വരുകയും നിൻ്റെ സംരക്ഷണത്തിൽ അഭയം തേടുകയും ചെയ്യുന്നു.
കന്യകാമറിയമേ, കോറോണ വൈറസ് തീർക്കുന്ന പകർച്ചവ്യാധിക്കിടയിൽ നിൻ്റെ കരുണയുള്ള കണ്ണുകൾ ഞങ്ങളുടെ നേരേ തിരിക്കണമേ. അസ്വസ്ഥരായവരെയും പ്രിയപ്പെട്ടവരുടെ വേർപാടുമൂലം വിലപിക്കുന്നവരെയും ആശ്വസിപ്പിക്കണമേ. പ്രിയപ്പെട്ടവരുടെ രോഗം മൂലം ആകുലചിത്തരായിരിക്കുന്നവരോടും രോഗം പടരാതിരിക്കാൽ പ്രിയപ്പെട്ടവരിൽ നിന്നു അകന്നു നിൽക്കുന്നവരോടും നീ ചേർന്നു നിൽക്കണമേ. ഭാവിയെക്കുറിച്ചുള്ള അനിശ്ചിതത്വങ്ങളാലും സമ്പദ് വ്യവസ്ഥയും തൊഴിലില്ലായ്മയും ഉണ്ടാക്കുന്ന പ്രത്യാഘാതങ്ങളാൽ വിഷമിക്കുന്നവരിൽ നീ പ്രത്യശ നിറയ്ക്കണമേ.
ദൈവമാതാവും ഞങ്ങളുടെ അമ്മയുമായ മറിയമേ, ഈ മഹാവ്യാധി അവസാനിക്കുവാനും പ്രത്യാശയും സമാധാനവും പുതുതായി ഉദയം ചെയ്യുവാനും കരുണയുള്ള പിതാവായ ദൈവത്തോടു ഞങ്ങൾക്കു വേണ്ടി പ്രാർത്ഥിക്കണമേ. രോഗികളുടെയും അവരോടു ബന്ധപ്പെട്ട കുടുംബങ്ങളുടെയും ആശ്വാസത്തിനും അവരുടെ ഹൃദയങ്ങളിൽ ആത്മവിശ്വാസത്തിൻ്റെയും പ്രത്യാശയുടെയും കിരണങ്ങൾ വിരിയുവാനും കാനായിൽ നിൻ്റെ ദിവ്യ സുതനോടു അപേക്ഷിച്ചുപോലെ ഞങ്ങൾക്കു വേണ്ടിയും പ്രാർത്ഥിക്കണമേ. മറ്റുള്ളവരുടെ ജീവൻ രക്ഷിക്കാനായി അപകട സാധ്യതകളൾ നിറഞ്ഞ അത്യാഹിത വിഭാഗങ്ങളിൽ മുൻനിരയിൽ ശുശ്രൂഷ ചെയ്യുന്ന ഡോക്ടർമാരെയും നേഴ്സുമാരെയും ആരോഗ്യ പ്രവർത്തകരെയും സന്നദ്ധ പ്രവർത്തകരെയും സംരക്ഷിക്കണമേ. അവരുടെ വീരോചിതമായ പരിശ്രമങ്ങളെ സഹായിക്കുകയും അവർക്കു ആരോഗ്യവും മഹാമനസ്കതയും ശക്തിയും നൽകുകയും ചെയ്യണമേ.
ദുഃഖിതരുടെ ആശ്വാസമായ മറിയമേ, ദുരിതത്തിലകപ്പെട്ടിരിക്കുന്ന നിൻ്റെ എല്ലാ മക്കളെയും ആശ്വസിപ്പിക്കുകയും ദൈവം തൻ്റെ സർവ്വശക്തമായ കരം നീട്ടി ഭയാനകമായ ഈ പകർച്ചവ്യാധിയിൽ നിന്നു മോചനം നൽകുന്നതിനായി ഞങ്ങൾക്കു വേണ്ടി പ്രാർത്ഥിക്കുകയും ചെയ്യണമേ, അതുവഴി സാധാരണ ജീവിതത്തിലേക്കു ഞങ്ങൾ മടങ്ങി വരട്ടെ. രക്ഷയുടെയും പ്രത്യാശയുടെയും അടയാളമായി ഞങ്ങളുടെ ജീവിതയാത്രയിൽ വിളങ്ങി ശോഭിക്കുന്ന മാധുര്യവും സ്നേഹവും കരുണയും നിറഞ്ഞ പരിശുദ്ധ അമ്മേ, ഞങ്ങളെത്തന്നെ നിനക്കു ഞങ്ങൾ ഭരമേല്പിക്കുന്നു. ആമ്മേൻ
7. സമാപന പ്രാർത്ഥന
പ്രിയ സഹോദരി സഹോദരന്മാരെ, ഇന്നേ ദിനം പരിശുദ്ധ കന്യകാമറിയത്തിൻ്റെ കരങ്ങളിലൂടെ പ്രത്യേകമായി ദക്ഷിണ കൊറിയയിലെ നമ്യാങിലെ അവർ ലേഡി ഓഫ് റോസറി ദൈവാലയത്തോട് ചേർന്ന് കുട്ടികളെയും കൗമാരക്കാരെയും നാം ദൈവത്തിനു സമർപ്പിച്ചുവല്ലോ. നമ്മുടെ യാചനകൾ അവിടുന്നു ശ്രവിക്കുകയും അവ സാധിച്ചുു തരുകയും ചെയ്യട്ടെ.
8. എത്രയും ദയയുള്ള മാതാവേ എന്ന പ്രാർത്ഥന
എത്രയും ദയയുള്ള മാതാവേ/ നിന്‍റെ സങ്കേതത്തില്‍ ഓടി വന്ന്‌/ നിന്‍റെ സഹായം തേടി/ നിന്‍റെ മാദ്ധ്യസ്ഥം അപേക്ഷിച്ചവരില്‍/ ഒരുവനെയെങ്കിലും/ നീ ഉപേക്ഷിച്ചതായി കേട്ടിട്ടില്ല/ എന്ന് നീ ഓര്‍ക്കണമെ. കന്യകളുടെ രാജ്ഞിയായ കന്യകേ/ ദയയുള്ള മാതാവെ/ ഈ വിശ്വാസത്തില്‍ ധൈര്യപ്പെട്ടു/ നിന്‍റെ തൃപ്പാദത്തിങ്കല്‍/ ഞാന്‍ അണയുന്നു. വിലപിച്ചു കണ്ണുനീര്‍ ചിന്തി/ പാപിയായ ഞാന്‍/ നിന്‍റെ ദയാധിക്യത്തെ കാത്തു കൊണ്ട്/ നിന്‍റെ സന്നിധിയില്‍/ നില്‍ക്കുന്നു. അവതരിച്ച വചനത്തിന്‍ മാതാവേ/ എന്‍റെ അപേക്ഷ ഉപേക്ഷിക്കാതെ/ ദയാപൂര്‍വ്വം കേട്ടരുളേണമെ, ആമ്മേന്‍.
തയ്യാറാക്കിയത്: ഫാ. ജെയ്സൺ കുന്നേൽ MCBS
