ആടുകൾ അവന്റെ സ്വരം കേൾക്കുന്നു (3) എന്ന വചനം ഇക്കാലത്ത് കൂടുതൽ പ്രാധാന്യമർഹിക്കുന്നു. ആടുകൾ കേൾക്കേണ്ടത് ഇടയന്റെ സ്വരമാണ്. കേൾക്കുക എന്നു പറഞ്ഞാൽ ശ്രദ്ധിച്ച് അനുഗമിക്കുക എന്ന് നമ്മൾ മനസിലാക്കണം. ഇടയനെപ്പോലെ വേഷം ധരിച്ച, സ്വരം ഉള്ള, രൂപഭാവങ്ങൾ ഉള്ള പലരും ആടുകളെ പ്രലോഭിപ്പിക്കാനും വഴിതെറ്റിക്കാനും എത്തിയേക്കാം. പക്ഷേ, ആടുകൾ ഇടയന്റെ സ്വരം മാത്രമേ ശ്രവിക്കാവൂ, ശ്രദ്ധിക്കാവൂ.
ഇന്ന് നമ്മളും അത്തരം സാഹചര്യത്തിലാണ് ജീവിക്കുന്നത്. ഒട്ടനവധി സ്വരങ്ങൾ നമുക്ക് ചുറ്റും ഉണ്ട്. ഇടയന്റെത് എന്ന് തോന്നിപ്പിക്കുന്ന, ഇടയ സമാനമായ സ്വരങ്ങൾ. കേൾക്കാൻ ഇമ്പമുള്ളതും വഴി തെറ്റിക്കാൻ പര്യാപ്തവും ആയിരിക്കും അവ. ചില വ്യക്തികളിലൂടെയും മാധ്യമങ്ങളിലൂടെയും സമൂഹ മാധ്യമങ്ങളിലൂടെയും സാഹചര്യങ്ങളിലൂടെയും കടന്നു വരുന്ന അത്തരം സ്വരങ്ങളെക്കുറിച്ച്, ബോധവാന്മാരാകുക, ജാഗരൂകരാകുക. അനാദി മുതലെയുള്ള ആ സ്വരം, 2000 വർഷമായി കൂടുതൽ വ്യക്തമായ ആ സ്വരം, തിരുസഭയിലൂടെ തുടരുന്ന ആ സ്വരം ‘കേൾക്കാൻ’ ആസ്വരത്തെ മാത്രം അനുഗമിക്കാൻ നമുക്ക് സാധിക്കട്ടെ.
ഫാ. ജി. കടൂപ്പാറയിൽ എം.സി.ബി.എസ്
