“ദൈവമാണ് നിങ്ങളുടെ പിതാവെങ്കില്‍ നിങ്ങള്‍ എന്നെ സ്നേഹിക്കുമായിരുന്നു” (42) എന്ന ഈശോയുടെ വചനം നമ്മുടെ കണ്ണുകള്‍ തുറപ്പിക്കേണ്ടതാണ്. നമ്മള്‍ ഈശോയെ യഥാര്‍ത്ഥത്തില്‍ സ്നേഹിക്കുന്നുണ്ടോ അതോ വാക്കാല്‍ മാത്രമേ ഉള്ളുവോ? നമ്മുടെ പ്രവര്‍ത്തികള്‍ പരിശോധിച്ചാല്‍ മതി അതിനുള്ള ഉത്തരം നമുക്ക് ലഭിക്കും. സ്നേഹം എപ്പോഴും വെളിപ്പെടുത്തേണ്ടത് കര്‍മ്മങ്ങളിലൂടെയാണ്.
ഒരു കുഞ്ഞ് നമ്മെ നോക്കി ചിരിക്കുമ്പോള്‍ നമ്മള്‍ വിചാരിക്കും ആ കുഞ്ഞിന് സ്നേഹമുണ്ടെന്ന്‍. നമ്മോട് മുഖം തിരിച്ചാല്‍ സ്നേഹമില്ല എന്നും പറയും. “Words words, I am tired of words; if you love me you show me” എന്നത് My fair lady എന്ന സിനിമയിലെ വാക്യമാണ്.
യഹൂദര്‍, തങ്ങള്‍ ദൈവമക്കളാണെന്നു പറയുകയും എന്നാല്‍ യേശുവിനെ സ്നേഹിക്കാതിരിക്കുകയും ചെയ്ത പശ്ചാത്തലത്തിലാണ് ഇന്നത്തെ വചനഭാഗം. നമ്മളും അനുദിന ജീവിതത്തില്‍ ദൈവമക്കളാണെന്നു പറയുകയും എന്നാല്‍ യേശുവിനെ സ്നേഹിക്കാതിരിക്കുകയും ചെയ്യുന്നുണ്ടോ? ദൈവമക്കള്‍ ആണെങ്കില്‍ യേശുവിനെ സ്നേഹിക്കുന്ന പ്രവര്‍ത്തികള്‍ ചെയ്യുക. യേശുവിനെ സ്നേഹിക്കുമ്പോഴേ ദൈവമക്കള്‍ ആകുകയുള്ളൂ എന്നും ഓര്‍മ്മിക്കുക.
ഫാ. ജി. കടൂപ്പാറയില്‍ MCBS
