ഫിലിപ്പീൻസിലെ ഏറ്റവും വലിയ തിരുനാളുകളിൽ ഒന്നായ കറുത്ത നസ്രായന്റെ തിരുനാൾ, കോവിഡ് പകർച്ചവ്യാധിയെ തുടർന്ന് ജനപങ്കാളിത്തം പരിമിതപ്പെടുത്തി ആഘോഷിക്കും. സാധാരണയായി ഓരോ വർഷവും ദശലക്ഷക്കണക്കിന് ആളുകളാണ് ഈ തിരുനാളിനോടനുബന്ധിച്ച് മനിലയിലെത്തുന്നത്.
ജനുവരി ഒൻപതിന് നടക്കുന്ന തിരുനാളിൽ 15 വിശുദ്ധ കുർബാന നടക്കുന്നുണ്ട്. ഓരോന്നിനും 400 പേർക്ക് പങ്കെടുക്കാനുള്ള അനുവാദമേയുള്ളൂ. ആകെ 6,000 പേർക്ക് മാത്രമേ പള്ളിയ്ക്കുള്ളിൽ നടക്കുന്ന വിശുദ്ധ കുർബാനയിൽ പങ്കെടുക്കാൻ സാധിക്കൂ. 30 % പേർക്ക് മാത്രമേ തിരുക്കർമ്മങ്ങളിൽ പങ്കെടുക്കാൻ അനുവാദം ഉള്ളൂ. അത് അൻപത് ശതമാനം ആക്കുവാൻ സഭാനേതൃത്വം ശ്രമിച്ചെങ്കിലും അനുമതി ലഭിച്ചില്ല.
15 വയസ്സിനു താഴെയുള്ളവരോ 65 വയസ്സിനു മുകളിലുള്ളവരോ പങ്കെടുക്കാൻ അനുവദിക്കില്ലെന്ന് അധികൃതർ അറിയിച്ചു. എന്നാൽ, തിരുക്കർമ്മങ്ങളുടെ തത്സമയ സംപ്രേഷണം ഉണ്ടായിരിക്കും.