നേപ്പിള്‍സില്‍ 1521 ല്‍ അന്ത്രയോസ് അവലീനോ ജനിച്ചു. സിവില്‍ നിയമങ്ങളും കാനന്‍ നിയമങ്ങളും പഠിച്ച് ബിരുദം നേടിയതിനു ശേഷം വൈദികവൃത്തി സ്വീകരിച്ചു. അനന്തരം വൈദിക കോടതികളില്‍ അഭിഭാഷകനായി ജോലിചെയ്തു. പിന്നീട് അദ്ദേഹം അഭിഭാഷകജോലി രാജിവച്ചു.
അന്ത്രയോസ് മുപ്പത്തിയഞ്ചാമത്തെ വയസ്സില്‍ നേപ്പിള്‍സിലെ ‘തിയെറ്റയിന്‍’ സഭയില്‍ ചേര്‍ന്നു. 14 വര്‍ഷം അവിടെ ജീവിച്ചു. 1570 ല്‍ വി. ചാള്‍സ് ബൊറോമിയോവിന്റെ നിര്‍ബന്ധം മൂലം അധികാരികള്‍ അദ്ദേഹത്തെ ലോംബാര്‍ഡിയിലേക്ക് അയച്ചു. അന്ത്രയോസിന്റെ നിരന്തരമായ പ്രയത്‌നത്തിന്റെ ഫലമായി ലോംബാര്‍ഡിയിലെ ജനങ്ങളുടെ ആത്മീയജീവിതം ഉന്നതി പ്രാപിച്ചു. വിശ്വാസത്തില്‍ നിന്നും വ്യതിചലിച്ചുകൊണ്ടിരുന്ന അവിടുത്തെ ജനത്തെ തിരികെ വിശ്വാസത്തിലേക്കു കൊണ്ടുവരാന്‍ അദ്ദേഹത്തിനു സാധിച്ചു.
1608 നവംബര്‍ പത്താം തീയതി അന്ത്രയോസ് പരിശുദ്ധ കുര്‍ബാന അനുഷ്ഠിക്കാന്‍ ഭാവിച്ചപ്പോള്‍ പെട്ടെന്ന് തളര്‍ച്ച ബാധിച്ച് നിലത്തുവീണു; അന്നുതന്നെ മരിക്കുകയും ചെയ്തു. അദ്ദേഹത്തിന് 88 വയസ്സ് പ്രായമുണ്ടായിരുന്നു.
വി. പൗലോസിന്റെ ദൈവാലയത്തിലെ നിലവറയിലാണ് മൃതദേഹം കിടത്തിയത്. ഭക്തരായ സന്ദര്‍ശകര്‍ മൃതദേഹത്തില്‍ നിന്നു തലമുടിയും മുഖത്തെ ത്വക്കും മുറിച്ചെടുത്ത് കൊണ്ടുപോകാന്‍ തുടങ്ങി. മരിച്ചിട്ട് 36 മണിക്കൂറുകള്‍ കഴിഞ്ഞപ്പോള്‍ മുറിഞ്ഞ ഭാഗങ്ങളില്‍ ചോര പൊടിയുകയും ശരീരം ചൂടുള്ളതായി കാണപ്പെടുകയും ചെയ്തു. വൈദ്യപരിശോധനയില്‍ അദ്ദേഹം മരിച്ചുകഴിഞ്ഞിരുന്നതായി തെളിഞ്ഞു. എന്നിട്ടും അടുത്ത 36 മണിക്കൂർ സമയം തുടര്‍ച്ചയായി മുറിവുകളില്‍ നിന്നും രക്തം സ്രവിച്ചുകൊണ്ടിരുന്നു. ആശ്രമവാസികള്‍ ആ രക്തം ചഷകത്തില്‍ ശേഖരിച്ച് ഭദ്രമായി സൂക്ഷിച്ചുവച്ചു. നാലുദിവസം കഴിഞ്ഞപ്പോള്‍ അത് പതഞ്ഞുപൊങ്ങി; പിന്നീട് കട്ടിയാവുകയും ചെയ്തു. തുടര്‍ന്ന് അന്ത്രയോസിന്റെ ചരമവാര്‍ഷിക ദിനങ്ങളിലെല്ലാം കട്ടിയായ രക്തം ഉരുകിയിരുന്നതായി പറയപ്പെടുന്നു. 1717 ല്‍ സഭ അന്ത്രയോസിനെ വിശുദ്ധനായി നാമകരണം ചെയ്തു.
വിചിന്തനം: ”ദൈവം തിരുമനസ്സാകാതെയോ, അങ്ങയുടെ പരിപാലന കൂടാതെയോ, അകാരണമായോ യാതെന്നും ഈ ഭൂമിയില്‍ സംഭവിക്കുന്നില്ല.”
ഇതരവിശുദ്ധര്‍ : ലയോ. പാപാ (440-461)/ ഗുവെരെസാള്‍ദുസ് (+965) സ്‌പെയിനിലെ മെത്രാന്‍/ റാറ്റ്‌സ്ബര്‍ഗ്ഗിലെ ജോണ്‍ (+1066) മിഷനറി/ യൂസ്തൂസ് +(627) കാന്റര്‍ബറിയിലെ മെത്രാന്‍/മോണിത്തോര്‍ (+490) ഓര്‍ലീന്‍സിലെ മെത്രാന്‍ /നോണൂസ് +(417) ഹിലിയോപോളീസിലെ മെത്രാന്‍/ ട്രൈഫോണ്‍(+251) രക്തസാക്ഷി/ റ്റിബേരിയൂസ് (+303) രക്തസാക്ഷി/ ആന്‍ഡ്രൂ (1521-1608)
ഫാ. ജെ. കൊച്ചുവീട്ടില്‍
