മ്യാൻമറിൽ കഴിഞ്ഞ വർഷം നടന്ന പൊതുതിരഞ്ഞെടുപ്പ് കാലയളവിൽ മാത്രം സൈന്യം 700-ലധികം നിരപരാധികളായ ജനങ്ങളെ കൊന്നൊടുക്കിയതായി ഐക്യരാഷ്ട്ര സഭ വെളിപ്പെടുത്തുന്നു. കഴിഞ്ഞ ഓഗസ്റ്റ് മുതൽ ജനുവരി വരെയുള്ള ആറ് മാസത്തെ സാഹചര്യങ്ങൾ വിലയിരുത്തി യു. എൻ. ഹ്യൂമൻ റൈറ്റ്സ് ഓഫീസ് പുറത്തുവിട്ട പുതിയ റിപ്പോർട്ടിലാണ് അന്താരാഷ്ട്ര സമൂഹത്തെ നടുക്കുന്ന ഈ വിവരങ്ങളുള്ളത്.
വിശ്വാസയോഗ്യമായ സ്രോതസ്സുകളിൽ നിന്ന് ലഭിച്ച വിവരങ്ങൾ പ്രകാരം ഇക്കാലയളവിൽ കുറഞ്ഞത് 702 സാധാരണക്കാർ കൊല്ലപ്പെട്ടിട്ടുണ്ടെന്ന് യു. എൻ. സ്ഥിരീകരിച്ചു. ഇതിൽ 224 സ്ത്രീകളും 153 കുട്ടികളും ഉൾപ്പെടുന്നു.
അഞ്ച് വർഷം മുൻപ് രാജ്യത്ത് അട്ടിമറിയിലൂടെ ഭരണം പിടിച്ചെടുത്ത മ്യാൻമർ സൈന്യം, പ്രധാന പ്രതിപക്ഷ പാർട്ടികളെയെല്ലാം വിലക്കിക്കൊണ്ടാണ് കഴിഞ്ഞ വർഷം തിരഞ്ഞെടുപ്പ് പ്രഖ്യാപിച്ചത്. ലോകരാജ്യങ്ങൾ തള്ളിക്കളഞ്ഞ ഈ തിരഞ്ഞെടുപ്പ് കാലത്താണ് ജനങ്ങൾക്ക് നേരെ ക്രൂരമായ അടിച്ചമർത്തലുകൾ നടന്നത്.
