സ്വതന്ത്ര ഇന്ത്യയുടെ ആദ്യ വിദ്യാഭ്യാസ മന്ത്രിയായിരുന്ന മൗലാന അബുൽ കലാം ആസാദിന്റെ ജന്മദിനമായ ഇന്ന് രാജ്യം ദേശീയ വിദ്യാഭ്യാസ ദിനമായി ആചരിക്കുന്നു. എല്ലാവർക്കും മികച്ച വിദ്യാഭ്യാസം ഉറപ്പാക്കേണ്ടതിന്റെ പ്രാധാന്യമാണ് ഈ ദിനം ഓർമ്മപ്പെടുത്തുന്നത്.
1888 നവംബർ 11 നാണ് മൗലാന അബുൽ കലാം ആസാദ് ജനിച്ചത്. രാജ്യത്തിന്റെ വിദ്യാഭ്യാസ അടിത്തറ രൂപപ്പെടുത്തുന്നതിൽ അദ്ദേഹം നിർണ്ണായക പങ്കാണ് വഹിച്ചത്. അദ്ദേഹത്തിന്റെ സ്മരണയ്ക്കായി 2008 മുതൽ ഈ ദിവസം ദേശീയ വിദ്യാഭ്യാസ ദിനമായി പ്രഖ്യാപിക്കുകയായിരുന്നു. ഈ ദിനത്തോടനുബന്ധിച്ച് സ്കൂളുകളിലും കോളേജുകളിലും വിവിധ ബോധവത്കരണ പരിപാടികളും സംഘടിപ്പിക്കാറുണ്ട്. വ്യക്തിവികാസത്തിനും ഒപ്പം രാജ്യത്തിന്റെ സമഗ്ര പുരോഗതിക്കും വിദ്യാഭ്യാസം എത്രത്തോളം അത്യന്താപേക്ഷിതമാണെന്ന ഓർമ്മപ്പെടുത്തലാണ് ഇത്തരം ആചരണങ്ങൾ.
വിദ്യാഭ്യാസ രംഗത്ത് നിലനിൽക്കുന്ന പരിമിതികൾ പരിഹരിക്കാൻ സമൂഹം ഒരുമിച്ച് പ്രവർത്തിക്കണമെന്ന് ഈ ദിനം ഓർമ്മിപ്പിക്കുന്നു. മാത്രമല്ല പെൺകുട്ടികൾ ഉൾപ്പെടെ എല്ലാ കുട്ടികൾക്കും തുല്യമായ പഠനാവസരങ്ങൾ ലഭിക്കാൻ രാജ്യം ശ്രദ്ധ നൽകേണ്ടതുണ്ട്. അറിവുള്ള ഒരു തലമുറയെ വാർത്തെടുക്കുന്നതിലൂടെ മാത്രമേ മികച്ചൊരു സമൂഹം കെട്ടിപ്പടുക്കാൻ സാധിക്കൂ.
