ജൂലൈ ആറിന് പുറത്തുവിട്ട പ്രവേശനരേഖ (preparatory document) പ്രകാരം, ഒക്ടോബറിൽ വത്തിക്കാൻ സംഘടിപ്പിക്കുന്ന ബിഷപ്പുമാരുടെ സമ്മേളനത്തിൽ വിവാഹമോചനം, കുടുംബപ്രശ്നങ്ങൾ എന്നിവയുൾപ്പെടെ കുടുംബവുമായി ബന്ധപ്പെട്ട വിവിധ വിഷയങ്ങൾ ചർച്ച ചെയ്യും. ലോകമെമ്പാടുമുള്ള എപ്പിസ്കോപ്പൽ കോൺഫറൻസ് പ്രസിഡന്റുമാരുടെ ഈ കൂട്ടായ്മ, വിവാഹത്തെയും കുടുംബത്തെയും കുറിച്ച് ഫ്രാൻസിസ് മാർപാപ്പ 2016 ൽ പുറപ്പെടുവിച്ച ‘അമോറിസ് ലെത്തീ ഷ്യ’ (Amoris Laetitia) എന്ന അപ്പസ്തോലിക പ്രബോധനത്തിന്റെ നിലവിലെ പ്രായോഗികവശങ്ങൾ വിലയിരുത്തുന്നതിനുള്ള വേദിയായിരിക്കും.
ഒക്ടോബർ ഏഴ് മുതൽ 14 വരെ നടക്കുന്ന സമ്മേളനത്തിൽ, ജീവിതത്തിലെ പ്രതിസന്ധികളിൽ കുടുംബങ്ങൾക്ക് നൽകേണ്ട പിന്തുണയും സഹായവും ഉൾപ്പെടെ അഞ്ച് പ്രധാന തീമുകളിലായിരിക്കും ശ്രദ്ധ കേന്ദ്രീകരിക്കുകയെന്ന് വത്തിക്കാൻ അറിയിച്ചു. ഉപേക്ഷിക്കപ്പെടൽ, വേർപിരിയൽ, വിവാഹമോചനം തുടങ്ങിയ സങ്കീർണ്ണമായ സാഹചര്യങ്ങളിലൂടെ കടന്നുപോകുന്ന കുടുംബങ്ങളെ സഭയോട് ചേർത്തുനിർത്താനും അവരുടെ ശബ്ദം കേൾക്കാനും ലക്ഷ്യമിട്ടുള്ള ചർച്ചകൾ സമ്മേളനത്തിൽ ഉണ്ടാകുമെന്ന് സിനഡിന്റെ ജനറൽ സെക്രട്ടേറിയറ്റും അൽമായർക്കും കുടുംബത്തിനും ജീവനും വേണ്ടിയുള്ള ഡിക്കാസ്റ്ററിയും സംയുക്തമായി പുറത്തിറക്കിയ പത്രക്കുറിപ്പിൽ വ്യക്തമാക്കുന്നു.
ഇതോടൊപ്പം, വിവാഹം കഴിക്കാതെ ഒരുമിച്ചു ജീവിക്കുന്ന ദമ്പതികളുടെ സാഹചര്യം, കുട്ടികളെ സ്വീകരിക്കാനുള്ള സന്നദ്ധത, യുവാക്കൾക്കിടയിൽ വിവാഹത്തോടുള്ള താൽപര്യം കുറയുന്നത്, പുതിയ തലമുറയിലേക്ക് വിശ്വാസം പകർന്നുനൽകൽ എന്നിവയും ചർച്ചാവിഷയങ്ങളാകും. റോമൻ കാത്തലിക്, ഈസ്റ്റേൺ ബിഷപ്പുമാർക്കൊപ്പം നിരവധി കുടുംബങ്ങളും ഈ സമ്മേളനത്തിൽ പങ്കാളികളാകുമെന്ന് ലെയോ പതിനാലാമൻ മാർപാപ്പ ജൂൺ 27 ന് തന്റെ രണ്ടാമത്തെ കർദിനാൾ കൺസിസ്റ്ററിയുടെ സമാപനത്തിൽ പ്രഖ്യാപിച്ചിരുന്നു.
