ഡൗൺ സിൻഡ്രോം എന്ന ജനിതക വൈകല്യത്തിന്റെ കാരണം കണ്ടെത്തിയ പ്രശസ്ത ഫ്രഞ്ച് ശാസ്ത്രജ്ഞനും ഡോക്ടറുമായ ജെറോം ലെജ്യൂണിന്റെ നൂറാം ജന്മവാർഷികത്തോടനുബന്ധിച്ച് അദ്ദേഹത്തിന്റെ മകൾ കാരിൻ ലെജ്യൂൺ ഓർമ്മകൾ പങ്കുവച്ചു. തന്റെ പിതാവിന്റെ ജീവിതത്തിലെ ഏറ്റവും കഠിനമായ പ്രതിസന്ധി ഘട്ടങ്ങളിൽ പ്രത്യാശ കൈവിടാതിരിക്കാൻ വിശുദ്ധ ജോൺ പോൾ രണ്ടാമൻ മാർപാപ്പയുമായുള്ള ആഴമേറിയ സൗഹൃദം ഏറെ സഹായിച്ചതായി അവർ വ്യക്തമാക്കി.
ഫ്രാൻസിൽ ഗർഭച്ഛിദ്രം നിയമവിധേയമാക്കിയതിന് പിന്നാലെ ജീവന്റെ സംരക്ഷണത്തിനായി ശക്തമായി വാദിച്ച ജെറോം ലെജ്യൂണിന് വലിയ രീതിയിലുള്ള സാമൂഹിക ഒറ്റപ്പെടൽ നേരിടേണ്ടി വന്നിരുന്നു. ശാസ്ത്രലോകവും രാഷ്ട്രീയ നേതൃത്വങ്ങളും, ഫ്രാൻസിലെ സഭാ നേതൃത്വം പോലും അക്കാലത്ത് അദ്ദേഹത്തെ മാറ്റിനിർത്തിയതായി കാരിൻ ഓർക്കുന്നു. അദ്ദേഹത്തിന്റെ ലബോറട്ടറിക്കുള്ള ഗവേഷണ ഫണ്ടുകൾ വരെ അന്ന് നിഷേധിക്കപ്പെട്ടു. ഈ കടുത്ത പ്രതിസന്ധി ഘട്ടത്തിലാണ് ജോൺ പോൾ രണ്ടാമൻ മാർപാപ്പയുടെ സൗഹൃദം ആണ് അദ്ദേഹത്തിന് താങ്ങായതെന്ന് മകൾ പറയുന്നു. ബൗദ്ധിക വൈകല്യമുള്ള, സമൂഹത്തിലെ ഏറ്റവും പാർശ്വവൽക്കരിക്കപ്പെട്ട കുട്ടികളെ സേവിക്കുക എന്ന ഒരേയൊരു ലക്ഷ്യമായിരുന്നു ഈ രണ്ട് മഹദ്വ്യക്തികളെയും പരസ്പരം അടുപ്പിച്ചത്.
1981 മെയ് 13-ന് വത്തിക്കാനിൽ വെച്ച് ഇരുവരും ഒരുമിച്ച് ഉച്ചഭക്ഷണം കഴിക്കുകയും ജീവന്റെ സംരക്ഷണത്തെക്കുറിച്ച് രണ്ട് മണിക്കൂറോളം സംസാരിക്കുകയും ചെയ്തിരുന്നു. ഇതിന് തൊട്ടുപിന്നാലെയാണ് സെന്റ് പീറ്റേഴ്സ് സ്ക്വയറിൽ വച്ച് മാർപാപ്പയ്ക്ക് നേരെ വധശ്രമമുണ്ടായത്. വിമാനമിറങ്ങി വീട്ടിലേക്ക് മടങ്ങുന്ന വഴിയാണ് ഈ ദാരുണ വാർത്ത ജെറോം ലെജ്യൂൺ അറിയുന്നത്. മാർപാപ്പയ്ക്ക് വെടിയേറ്റ വിവരമറിഞ്ഞ് അദ്ദേഹം വികാരാധീനനായെന്നും “ആ വെടിയുണ്ടയേറ്റത് എനിക്കായിരുന്നെങ്കിൽ” എന്ന് അദ്ദേഹം തീവ്രമായി ആഗ്രഹിച്ചതായും കാരിൻ വെളിപ്പെടുത്തി. മാർപാപ്പയോടുള്ള ആഴമായ സ്നേഹവും സഹാനുഭൂതിയും കാരണം അന്ന് വൈകുന്നേരം ജെറോം ലെജ്യൂൺ പെട്ടെന്ന് രോഗബാധിതനാവുകയും ചെയ്തു.
ആധുനിക ജനിതകശാസ്ത്രത്തിന്റെ പിതാക്കന്മാരിൽ ഒരാളായ ജെറോം ലെജ്യൂൺ 1994 ഏപ്രിലിൽ 67-ാം വയസ്സിലാണ് അന്തരിച്ചത്. 1994-ൽ ജോൺ പോൾ രണ്ടാമൻ മാർപാപ്പയാണ് അദ്ദേഹത്തെ വത്തിക്കാന്റെ ‘പോന്തിഫിക്കൽ അക്കാദമി ഫോർ ലൈഫ്’ എന്ന സംഘടനയുടെ ആദ്യ പ്രസിഡന്റായി നിയമിക്കുന്നത്. 2024 ജനുവരിയിൽ ഫ്രാൻസിസ് മാർപാപ്പ അദ്ദേഹത്തെ ധന്യൻ പദവിയിലേക്ക് ഉയർത്തിയിരുന്നു. ഒരു ശാസ്ത്രജ്ഞൻ എന്നതിനപ്പുറം, തന്റെ അഞ്ച് മക്കൾക്കും അളവറ്റ സ്നേഹവും കരുതലുമുള്ള ഒരു നല്ല പിതാവായിരുന്നു അദ്ദേഹമെന്ന് മകൾ കാരിൻ അനുസ്മരിച്ചു.
