ഐഎസ് തീവ്രവാദികളുടെ അക്രമങ്ങളെത്തുടർന്ന് സ്വന്തം വീടുകളിൽ നിന്ന് പലായനം ചെയ്ത ക്രിസ്ത്യാനികളെ ഇറാഖിൽ തിരികെ എത്തിച്ച മാതൃക, രൂക്ഷമായ വർഗീയ അക്രമങ്ങൾ നേരിടുന്ന നൈജീരിയയിലെ മിഡിൽ ബെൽറ്റ് മേഖലയിലും നടപ്പിലാക്കാമെന്ന് പ്രമുഖ കത്തോലിക്കാ സന്നദ്ധ സംഘടനയായ ‘എയ്ഡ് ടു ദി ചർച്ച് ഇൻ നീഡ്’ (ACN) വെളിപ്പെടുത്തി. നൈജീരിയയിൽ ഭീകരാക്രമണങ്ങൾ കാരണം കുടിയൊഴിപ്പിക്കപ്പെട്ട ലക്ഷക്കണക്കിന് ക്രിസ്ത്യാനികളെ സ്വന്തം മണ്ണിലേക്ക് തിരികെയെത്തിക്കാൻ ഈ ഇറാഖ് മോഡൽ പിന്തുടരാവുന്നതാണെന്ന് കത്തോലിക്കാ സഭാ നേതാക്കളും ചൂണ്ടിക്കാണിക്കുന്നു.
2014-ൽ ഇറാഖിലെ നിനവേ സമതലത്തിൽ ഐസിസ് ഭീകരർ നടത്തിയ കൂട്ടക്കൊലകളെയും അക്രമങ്ങളെയും തുടർന്ന് ലക്ഷക്കണക്കിന് ക്രിസ്ത്യാനികളാണ് സ്വന്തം വീടുകൾ ഉപേക്ഷിച്ച് പലായനം ചെയ്തത്. എന്നാൽ 2017 നും 2019 നും ഇടയിൽ ACN നടത്തിയ ‘റിട്ടേൺ ടു ദി റൂട്ട്സ്’ (Return to the Roots) പദ്ധതിയിലൂടെ തകർക്കപ്പെട്ട വീടുകളും പള്ളികളും സ്കൂളുകളും പുനർനിർമ്മിക്കുകയും 50 ശതമാനത്തിലധികം ആളുകളെ സ്വന്തം ഗ്രാമങ്ങളിലേക്ക് വിജയകരമായി തിരികെയെത്തിക്കുകയും ചെയ്തു.
നൈജീരിയ നേരിടുന്ന കടുത്ത പ്രതിസന്ധി
ഇന്ന് സമാനമായ സാഹചര്യത്തിലൂടെയാണ് നൈജീരിയയിലെ മിഡിൽ ബെൽറ്റിലെ ക്രൈസ്തവർ കടന്നുപോകുന്നത്. ഫുലാനി തീവ്രവാദികളുടെയും ഭീകര സംഘടനകളുടെയും നിരന്തരമായ ആക്രമണങ്ങൾ കാരണം ദശലക്ഷക്കണക്കിന് ആളുകളാണ് തങ്ങളുടെ കൃഷിഭൂമിയും വീടുകളും ഉപേക്ഷിച്ച് അഭയാർഥി ക്യാമ്പുകളിൽ ജീവിക്കുന്നത്.
പ്രത്യേകിച്ച് ബെനു സംസ്ഥാനത്ത് മാത്രം 20 ലക്ഷത്തിലധികം ആളുകൾ കുടിയൊഴിപ്പിക്കപ്പെട്ട് ക്യാമ്പുകളിൽ കഴിയുന്നുണ്ട്. ഇതിൽ 98 ശതമാനവും ക്രൈസ്തവരാണ്. പതിറ്റാണ്ടുകളായി ക്യാമ്പുകളിൽ കഴിയേണ്ടി വരുന്നത് ബാലവേല, പീഡനങ്ങൾ, മറ്റ് സാമൂഹിക തിന്മകൾ എന്നിവ വർധിക്കാൻ കാരണമാകുന്നുവെന്ന് പ്രാദേശിക വൈദികനായ ഫാ. റെമിജിയസ് ഇഹ്യുല വ്യക്തമാക്കുന്നു.
പുനരധിവാസമല്ല, സ്വന്തം മണ്ണിലേക്ക് മടങ്ങുകയാണ് പരിഹാരം
നൈജീരിയൻ സർക്കാർ ജനങ്ങളെ മറ്റ് പ്രദേശങ്ങളിലേക്ക് മാറ്റിപ്പാർപ്പിക്കാനുള്ള പദ്ധതി നിർദേശിക്കുമ്പോൾ, പ്രാദേശിക സഭ അതിനെ ശക്തമായി എതിർക്കുന്നു. ആളുകളെ മാറ്റിപ്പാർപ്പിക്കുന്നത് തീവ്രവാദികളുടെ അധിനിവേശത്തെ നിയമവിധേയമാക്കുന്നതിന് തുല്യമാണെന്നും, അതിനേക്കാൾ പ്രധാനം ഭീകരരിൽ നിന്ന് സ്വന്തം മണ്ണ് തിരിച്ചുപിടിച്ച് ആളുകളെ പഴയ വീടുകളിലേക്ക് തിരിച്ചെത്തിക്കുകയാണെന്നും സഭ വ്യക്തമാക്കുന്നു.
സർക്കാരും അന്താരാഷ്ട്ര സമൂഹവും പ്രദേശത്തെ കത്തോലിക്കാ സഭയുമായി ചേർന്ന് പ്രവർത്തിക്കുകയാണെങ്കിൽ, ഇറാഖിൽ കൈവരിച്ച വിജയം നൈജീരിയയിലും സാധ്യമാക്കാനാകുമെന്ന് എ സി എൻ ഡയറക്ടർ മാർക്ക് വോൺ റീഡെമാൻ പറഞ്ഞു. ജനങ്ങളുടെ അന്തസ്സും മേഖലയുടെ സാമൂഹിക-സാമ്പത്തിക വ്യവസ്ഥയും വീണ്ടെടുക്കാൻ ക്യാമ്പ് സംസ്കാരത്തിൽ നിന്ന് അവരെ സ്വന്തം ജന്മനാട്ടിലേക്ക് മടക്കിക്കൊണ്ടുവരേണ്ടത് അത്യന്താപേക്ഷിതമാണ്.
