ഇറാനിൽ മരുന്നുകളുടെ വില കുത്തനെ ഉയർന്നതോടെ അർബുദ രോഗികൾ ചികിത്സയ്ക്കായി വീട്ടിലെ അവശ്യ സാധനങ്ങൾ വിറ്റഴിക്കുന്നതായി റിപ്പോർട്ട്. സാമ്പത്തിക ബുദ്ധിമുട്ട് കാരണം പല കുടുംബങ്ങളും ഫ്രിഡ്ജ്, ടെലിവിഷൻ എന്നിവ വിറ്റാണ് മരുന്നുകൾ വാങ്ങുന്നത്. പണമില്ലാത്തതിനാൽ ചില രോഗികൾ ചികിത്സ തന്നെ ഉപേക്ഷിക്കുന്ന അവസ്ഥയിലാണെന്ന് സന്നദ്ധ സംഘടനകൾ വ്യക്തമാക്കുന്നു.
രാജ്യത്ത് മരുന്നുകളുടെ വിലയിൽ 100 ശതമാനത്തിലേറെ വർദ്ധനവാണ് അടുത്തിടെ ഉണ്ടായിരിക്കുന്നത്. രോഗിയുടെ ഒരു മാസത്തെ മരുന്നിന് മാത്രം വലിയ തുക ചെലവാക്കേണ്ടി വരുന്നത് സാധാരണക്കാരെ വൻ കടക്കെണിയിലാക്കുന്നു. ഇൻഷുറൻസ് ആനുകൂല്യങ്ങൾ കൃത്യമായി ലഭിക്കാത്തതും മരുന്നുകളുടെ ക്ഷാമവും പ്രശ്നം കൂടുതൽ ഗുരുതരമാക്കുന്നുണ്ട്.
സന്നദ്ധ സംഘടനകൾ സാമ്പത്തിക സഹായങ്ങളും പിന്തുണയും നൽകുന്നുണ്ടെങ്കിലും ഉയർന്ന മരുന്ന് വില കാരണം എല്ലാവരിലേക്കും സഹായം എത്തിക്കാൻ സാധിക്കുന്നില്ല. ഭക്ഷണച്ചെലവിനൊപ്പം മരുന്ന് വിലയും കൂടിയത് പാവപ്പെട്ട കുടുംബങ്ങളുടെ ജീവിതം കൂടുതൽ ദുരിതത്തിലാക്കി. സ്ഥിതിഗതികൾ ദയനീയമായി തുടരുന്നതിനാൽ അടിയന്തര ഇടപെടൽ ഉണ്ടാകുമെന്ന പ്രതീക്ഷയിലാണ് രോഗികളും കുടുംബങ്ങളും.
