ലോകം വലിയ ആഘോഷങ്ങളിലേക്ക് ഉണരുമ്പോഴും, ഒരു ചെറിയ മുറിയിലെ വെന്റിലേറ്ററിനും ട്യൂബുകൾക്കും നടുവിൽ ജീവിതത്തിനും മരണത്തിനുമിടയിൽ പോരാടുന്ന ഒരു പത്തുവസ്സുകാരന്റെ ജീവിതമുണ്ട്. കീനാൻ ദാദു (Kinaan Dadou) എന്ന പലസ്തീൻ ബാലന്റെ ജീവിതം ഇന്ന് ഒരു ചോദ്യചിഹ്നമായി അവശേഷിക്കുകയാണ്. 2023 ഒക്ടോബർ ഏഴിൽ ഹമാസ് തൊടുത്തുവിട്ട ഒരു റോക്കറ്റ് തകർത്തത് ആ കുഞ്ഞിന്റെ മാത്രമല്ല, ഒരു കുടുംബത്തിന്റെ മുഴുവൻ സ്വപ്നങ്ങളായിരുന്നു.
ചോരയിൽ കുതിർന്ന ആ രാവ്
2023 ഒക്ടോബർ ഏഴ്. ഗാസയിൽ നിന്ന് പലസ്തീൻ തീവ്രവാദ സംഘടനയായ ഹമാസ് ഇസ്രായേലിലേക്ക് പതിനായിരക്കണക്കിന് റോക്കറ്റുകൾ വർഷിച്ച കറുത്ത ദിവസം. ബെത്‌ലഹേമിന് സമീപമുള്ള ഖിർബത്ത് ഉം റുഖ്ബ എന്ന ചെറിയ ഗ്രാമത്തിലെ ദാദുവിന്റെ വീടിന് മുന്നിലും ആ റോക്കറ്റുകളിലൊന്ന് വന്നു പതിച്ചു.
അന്ന് ഏഴ് വയസ്സ് മാത്രം പ്രായമുണ്ടായിരുന്ന കീനാന്റെ തലയിൽ റോക്കറ്റിന്റെ ഒരു വലിയ അവശിഷ്ടം പതിച്ചു. രക്തത്തിൽ കുളിച്ചു കിടന്ന മകനെ ആശുപത്രിയിലെത്തിക്കാൻ ആ മാതാപിതാക്കൾ നടത്തിയ കഷ്ടപ്പാടുകൾ കണ്ണീർ നനവുള്ള ഓർമ്മയായി ഇന്നും അവശേഷിക്കുന്നു. ആംബുലൻസ് എത്താൻ വൈകിയതിനെ തുടർന്ന് സ്വന്തം കാറിലാണ് അവർ കീനാനെ ആശുപത്രിയിലെത്തിച്ചത്. എന്നാൽ മണിക്കൂറുകൾ വൈകിയതിനാൽ, തലച്ചോറിലുണ്ടായ കനത്ത രക്തസ്രാവം ആ കുഞ്ഞിന്റെ ശരീരത്തെ എന്നെന്നേക്കുമായി തളർത്തിക്കളഞ്ഞിരുന്നു. ഇന്ന് ആ ശരീരത്തിന് അനക്കമില്ല; ശ്വാസോച്ഛ്വാസവും ഭക്ഷണവും ട്യൂബുകളുടെ സഹായത്താൽ മാത്രം.
ഒറ്റപ്പെട്ടുപോയ കുടുംബം
വെസ്റ്റ് ബാങ്കിലെ ഒസ്ലോ ഉടമ്പടി പ്രകാരമുള്ള ‘ഏരിയ സി’ (Area C) മേഖലയിലാണ് ഈ കുടുംബം ജീവിക്കുന്നത്. ഇസ്രായേലിന്റെ പൂർണ്ണ നിയന്ത്രണത്തിലുള്ള ഈ പ്രദേശത്ത്, ആരോഗ്യരംഗത്തിന്റെ ഔദ്യോഗിക ചുമതല പലസ്തീൻ അതോറിറ്റിക്കാണ്. എന്നാൽ ഈ ദുരന്തം വരുമ്പോൾ ഇരുവിഭാഗവും കൈയൊഴിയുന്ന കാഴ്ചയാണ് നാം കാണുന്നത്. “ഞങ്ങൾ എല്ലാ വാതിലിലും മുട്ടി. അറബികളും ഇസ്രായേലികളും ഒരേ മറുപടിയാണ് നൽകുന്നത്. പലസ്തീൻ ഭാഗത്തുനിന്ന് പറയുന്നത് ‘ഇത് ഞങ്ങളുടെ പ്രദേശമല്ല’ എന്നാണ്. ഞങ്ങളുടെ കുറ്റം ഞങ്ങൾ ഈ പ്രദേശത്ത് താമസിക്കുന്നു എന്നത് മാത്രമാണോ?” പറയുമ്പോൾ ആ പിതാവിന്റെ വാക്കുകളിൽ ഹൃദയം തകർന്നുപോകുന്ന വേദനയുണ്ട്.
മാസം തോറും 4,000 ഷെക്കൽ ആണ് കീനാന്റെ മരുന്നുകൾക്ക് മാത്രം വേണ്ടത്. ഇസ്രായേലിൽ തൊഴിലാളിയായി ജോലി ചെയ്തിരുന്ന പിതാവിന് യുദ്ധം തുടങ്ങിയതോടെ പെർമിറ്റ് നഷ്ടപ്പെട്ടു. ഇന്ന് കടം വാങ്ങിയും മറ്റുള്ളവരുടെ സഹായത്താലുമാണ് ഈ കുടുംബം മുന്നോട്ട് പോകുന്നത്. തുർക്കിയിൽ കൊണ്ടുപോയി വിദഗ്ധ ചികിത്സ നൽകാൻ നല്ല തുക വേണം. പണമില്ലാത്തതിനാൽ പ്രൊഫഷണൽ നഴ്സുമാരുടെ സഹായം തേടാൻ കഴിയാതെ, സ്വന്തം അമ്മ വൊറൂദ് ദാദു തന്നെയാണ് മകന്റെ ശ്വാസനാളത്തിലെ ട്യൂബ് ഓരോ ദിവസവും മാറ്റുന്നത്. ട്യൂബ് പഴകി ചുമച്ചുതുടങ്ങുമ്പോൾ ആ അമ്മയുടെ നെഞ്ച് പിടയും.
മകൻ തങ്ങളോട് എന്താണ് പറയുന്നതെന്ന് മനസ്സിലാക്കാൻ കഴിയാതെ, അവൻ അനുഭവിക്കുന്ന വേദന എന്താണെന്ന് അറിയാൻ കഴിയാതെ നിസ്സഹായരായി കരയുന്ന മാതാപിതാക്കൾ. തങ്ങളുടെ മകൻ ഒരിക്കലും പഴയതുപോലെ നടക്കില്ലെന്ന് അവർക്കറിയാം, എങ്കിലും അവന്റെ വേദന കുറയ്ക്കാനെങ്കിലും ലോകം കനിയുമെന്ന പ്രതീക്ഷയിലാണ് അവർ. രാഷ്ട്രീയത്തിന്റെ അതിർവരമ്പുകൾക്കപ്പുറത്ത്, വേദന അനുഭവിക്കുന്ന ഒരു പത്തുവസ്സുകാരനായ കുഞ്ഞിന് വേണ്ടിയുള്ള കണ്ണീരോർമ്മയാണിത്.
