ഫ്രാൻസിലെ ഗിറോണ്ട് മേഖലയിലുണ്ടായ കാട്ടുതീയിൽ പ്രദേശമാകെ ചാരമായി മാറിയപ്പോഴും യാതൊരു കേടുപാടുകളും കൂടാതെ ഉറച്ചുനിന്ന ഒരു കുരിശുരൂപത്തിന്റെ ചിത്രം സോഷ്യൽ മീഡിയയിൽ തരംഗമാകുന്നു. സൊമോസ് (Saumos) ഗ്രാമത്തിൽ ഫോട്ടോ ജേണലിസ്റ്റായ പാട്രിക് ബർണാർഡ് ഐഫോണിൽ പകർത്തിയ ചിത്രമാണ് ലക്ഷക്കണക്കിന് ആളുകളുടെ ശ്രദ്ധനേടിയത്.
പത്തൊൻപതാം നൂറ്റാണ്ടിന്റെ അവസാനത്തിൽ സ്ഥാപിക്കപ്പെട്ടതാണ് ഈ കുരിശ്. വൻ തീപിടുത്തത്തിൽ ചുറ്റുമുള്ള കാടുകളും പുല്ലുകളും പൂർണ്ണമായി കത്തിനശിച്ചെങ്കിലും രണ്ട് തവണ തീ കടന്നുപോയിട്ടും ഈ കുരിശിന് കാര്യമായ കേടുപാടുകൾ സംഭവിച്ചില്ല.
പ്രദേശവാസിയും ഫോറസ്റ്റ് ഫയർ ഡിഫൻസ് സർവീസ് സാങ്കേതിക ഉപദേഷ്ടാവുമായ ആന്ദ്രേ പ്രൊവോയർ, ദുരന്തമുഖത്ത് ഫയർഫോഴ്സിനും സന്നദ്ധപ്രവർത്തകർക്കും വെള്ളമെത്തിക്കുന്നതിൽ പ്രധാന പങ്കുവഹിച്ചിരുന്നു. ‘എന്നെ മുന്നോട്ട് നയിക്കുന്നത് ക്രിസ്തുവിലുള്ള വിശ്വാസമാണ്’ എന്ന് അദ്ദേഹം പ്രതികരിച്ചു. 130 – ലധികം വർഷത്തെ പഴക്കമുള്ള ഈ കുരിശ് നാശത്തിനിടയിലും പ്രത്യാശയുടെയും വിശ്വാസത്തിന്റെയും പ്രതീകമായി ലോകമെമ്പാടുമുള്ള ആളുകൾ ഏറ്റെടുത്തിരിക്കുകയാണ്.
