ഉന്നത വിദ്യാഭ്യാസമേഖലയിലെ അനന്തസാധ്യതകള് പ്രയോജനപ്പെടുത്താന് വിദ്യാര്ഥികള്ക്ക് കഴിയണമെന്ന് ഭക്ഷ്യ സിവില് സപ്ലൈസ് വകുപ്പ് മന്ത്രി അനൂപ് ജേക്കബ്. കോട്ടയം അതിരൂപതയുടെ സാമൂഹ്യസേവന വിഭാഗമായ കോട്ടയം സോഷ്യല് സര്വീസ് സൊസൈറ്റിയുടെ നേതൃത്വത്തില് തെള്ളകം ചൈതന്യയില് സംഘടിപ്പിച്ച എസ്.എസ്.എല്.സി., പ്ലസ് ടു പരീക്ഷകളില് എല്ലാ വിഷയങ്ങള്ക്കും എ പ്ലസ് കരസ്ഥമാക്കിയ വിദ്യാര്ഥികളെ ആദരിക്കുന്ന സമ്മേളനത്തിന്റെ ഉദ്ഘാടനകര്മ്മം നിര്വഹിച്ചു സംസാരിക്കുകയായിരുന്നു മന്ത്രി. വിദേശ മൈഗ്രേഷന് വലിയ വെല്ലുവിളിയായി മാറിക്കൊണ്ടിരിക്കുന്ന ഇന്നത്തെ സാഹചര്യത്തില് നമ്മുടെ നാട്ടിലെ തൊഴില്സാധ്യതകൾ വിദ്യാര്ഥികള് പ്രയോജനപ്പെടുത്തണമെന്നും അദ്ദേഹം കൂട്ടിച്ചേര്ത്തു.
കോട്ടയം അതിരൂപത മെത്രാപ്പോലിത്ത മാര് മാത്യു മൂലക്കാട്ട് ചടങ്ങില് അധ്യക്ഷത വഹിച്ചു. വിദ്യാഭ്യാസത്തോടൊപ്പം സാമൂഹികവും മാനുഷികവുമായ മൂല്യങ്ങള് മുറുകെപ്പിടിച്ചുകൊണ്ട് ജീവിതത്തില് മുന്നോറാന് വിദ്യാര്ഥികള്ക്ക് കഴിയണമെന്ന് അദ്ദേഹം അധ്യക്ഷപ്രസംഗത്തില് പറഞ്ഞു.
കെ.എസ്.എസ്.എസ്. എക്സിക്യൂട്ടീവ് ഡയറക്ടര് ഫാ. സുനില് പെരുമാനൂര്, ചൈതന്യ പാസ്റ്ററല് സെന്റര് ഡയറക്ടര് ഫാ. ബിബിന് കണ്ടോത്ത്, കോട്ടയം ജില്ലാ പഞ്ചായത്ത് മെമ്പര് ജിം അലക്സ്, ഏറ്റുമാനൂര് മുനിസിപ്പാലിറ്റി ചെയര്മാന് ടോമി കുരുവിള, ഏറ്റുമാനൂര് ബ്ലോക്ക് പഞ്ചായത്ത് മെമ്പര് ഡോ. റോസമ്മ സോണി, അതിരമ്പുഴ ഗ്രാമപഞ്ചായത്ത് വൈസ് പ്രസിഡന്റ് തോമസ് പുതുശ്ശേരി, കോട്ടയം മുനിസിപ്പാലിറ്റി കൗണ്സിലര്മാരായ ബിന്സി സെബാസ്റ്റ്യന്, ടി.സി. റോയി, ഏറ്റുമാനൂര് മുനിസിപ്പാലിറ്റി കൗണ്സിലര് ലൗലി ജോര്ജ്, ടോമി വേദഗിരി, കെ.എസ്.എസ്.എസ്. അസി. ഡയറക്ടര് ഫാ. ജെഫിന് ഒഴുങ്ങാലില് എന്നിവര് ചടങ്ങില് സന്നിഹിതരായിരുന്നു.
സമ്മേളനത്തോടനുബന്ധിച്ച് മന്ത്രി അനൂപ് ജേക്കബിനെ കോട്ടയം സോഷ്യല് സര്വീസ് സൊസൈറ്റിക്കു വേണ്ടി മാര് മാത്യു മൂലക്കാട്ട് പൊന്നാടയും പൂച്ചെണ്ടും നല്കി ആദരിച്ചു. കെ.എസ്.എസ്.എസിന്റെ പ്രവര്ത്തനഗ്രാമങ്ങളില് നിന്നായി എസ്.എസ്.എല്.സി., പ്ലസ് ടു പരീക്ഷകളില് എല്ലാ വിഷയങ്ങള്ക്കും എ പ്ലസ് വിജയം കരസ്ഥമാക്കിയവരെയാണ് ആദരിച്ചത്.
ഫാ. സുനില് പെരുമാനൂര്, എക്സിക്യൂട്ടീവ് ഡയറക്ടര്
