കത്തോലിക്കാ ഭക്തിഗാന രംഗത്തെ അഞ്ച് വർഷത്തെ ഇടവേളയ്ക്ക് ശേഷം പുതിയ ഗാനവുമായി ഗായികയും ഗാനരചയിതാവുമായ സെലിനെസ് തിരിച്ചെത്തുന്നു. വിശുദ്ധനായ പാദ്രെ പിയോയുടെ പ്രാർഥനകളിൽ നിന്ന് പ്രചോദനമുൾക്കൊണ്ട് ഒരുക്കിയ ‘യോ കോൺഫിയോ എൻ തി’ (ഞാൻ നിന്നിൽ ആശ്രയിക്കുന്നു) എന്നർഥം വരുന്ന സിംഗിൾ ഗാനമാണ് അവർ പുറത്തിറക്കിയിരിക്കുന്നത്.
ഡൊമിനിക്കൻ മിഷനറി കൂടിയായ സെലിനെസിന്റെ വരാനിരിക്കുന്ന പുതിയ സ്റ്റുഡിയോ ആൽബത്തിലെ പ്രധാന ഗാനമാണിത്. പ്രശസ്ത പ്രൊഡ്യൂസറായ ജുവാൻ ഡെൽഗാഡോയുടെ ‘വിയാ കാന്റസ്’ എന്ന ബാനറിലാണ് ഈ ഗാനം ഒരുങ്ങുന്നത്. ജുവാൻ ഡെൽഗാഡോ തന്നെയാണ് ഈ ഗാനത്തിന്റെ സഹരചയിതാവ്. വിശുദ്ധ പാദ്രെ പിയോയോട് തനിക്കും കുടുംബത്തിനുമുള്ള ആഴമായ ഭക്തിയും ആത്മീയ ചിന്തകളും പങ്കുവെക്കുന്ന ഒന്നായതിനാൽ ഈ ഗാനം സെലിനെസിന് ഏറെ സവിശേഷപ്പെട്ടതാണ്. പ്രത്യേകിച്ച് അനിശ്ചിതത്വങ്ങൾ നിറഞ്ഞ ജീവിത സാഹചര്യങ്ങളിൽ നമ്മുടെ ഭൂതകാലവും വർത്തമാനവും ഭാവിയുമെല്ലാം ദൈവത്തിന്റെ അനന്തമായ കരുണയ്ക്ക് സമർപ്പിക്കാൻ ഈ ഗാനത്തിലെ വരികൾ നമ്മെ ഓർമ്മിപ്പിക്കുന്നു.
ആത്മീയമായ ആഴത്തോടൊപ്പം മികച്ച സംഗീത നിലവാരവും ഈ പോപ്പ് – വർഷിപ്പ് ഗാനത്തിനുണ്ട്. പിയാനോ സംഗീതത്തിനൊപ്പം തത്സമയം റെക്കോർഡ് ചെയ്ത ഒരു സ്ട്രിംഗ് ഓർക്കസ്ട്രയും, അമേരിക്കയിലെ അറ്റ്ലാന്റ നഗരത്തിൽ നിന്നുള്ള പ്രശസ്തമായ ആഫ്രിക്കൻ അമേരിക്കൻ ഗോസ്പൽ ഗായകസംഘത്തിന്റെ പശ്ചാത്തല ശബ്ദവും ഈ ഗാനത്തിന് കൂടുതൽ മനോഹാരിതയേകുന്നു.
