വെനിസ്വേലയിലെ ലാ ഗ്വൈറയിലുണ്ടായ വിനാശകരമായ ഭൂകമ്പത്തിൽ തകർന്നുവീണ അപ്പാർട്ട്മെന്റിന്റെ അവശിഷ്ടങ്ങൾക്കിടയിൽ നിന്നും പന്ത്രണ്ടുകാരിയായ ഫാബിയാന ബ്ലാങ്കോയെ അദ്ഭുതകരമായി രക്ഷപ്പെടുത്തി. ദുരന്തത്തിന്റെ ഇരുളിൽ മണിക്കൂറുകളോളം ഒറ്റപ്പെട്ടുപോയെങ്കിലും താൻ രക്ഷപെടുമെന്ന ഉറച്ച വിശ്വാസമാണ് ഈ പെൺകുട്ടിയെ ജീവനോടെ നിലനിർത്തിയത്.
തനിക്കായി പ്രാർഥിക്കാനും സഹായം എത്തിക്കാനുമായി അവശിഷ്ടങ്ങൾക്കിടയിൽ വച്ച് ഫാബിയാന ഒരു വീഡിയോ സന്ദേശം റെക്കോർഡ് ചെയ്തിരുന്നു. ഒടുവിൽ രക്ഷാപ്രവർത്തകർ അവശിഷ്ടങ്ങൾക്കിടയിൽ നിന്നും പുറത്തെടുക്കുമ്പോൾ വേദനകൾക്കിടയിലും ഫാബിയാനയുടെ മുഖത്തുണ്ടായിരുന്ന ആ മനോഹരമായ പുഞ്ചിരി ലോകത്തെ ഒന്നടങ്കം അദ്ഭുതപ്പെടുത്തി. ദുരന്തമുഖത്ത് പ്രതീക്ഷ കൈവിടാത്ത ലക്ഷക്കണക്കിന് ആളുകൾക്ക് പ്രത്യാശയുടെ പ്രതീകമായി മാറിയിരിക്കുകയാണ് ഇപ്പോൾ ഈ കൊച്ചു പെൺകുട്ടി.
തന്റെ ജീവൻ തിരിച്ചുകിട്ടിയതിന് ദൈവത്തോടും രക്ഷാപ്രവർത്തകരോടും അമ്മയോടും നന്ദി പറഞ്ഞ ഫാബിയാന എത്ര വലിയ പ്രതിസന്ധിയിലും പ്രതീക്ഷ കൈവിടാതിരിക്കാനും പുഞ്ചിരിക്കാനും ലോകത്തോട് ആഹ്വാനം ചെയ്തു.
ചുറ്റുമുള്ളതെല്ലാം തകർന്നടിയുമ്പോഴും ദൈവത്തിലുള്ള വിശ്വാസവും ധൈര്യവും കൈവിടാതിരുന്ന ഫാബിയാനയുടെ ഈ അതിജീവനം ലോകത്തിന് വലിയൊരു സന്ദേശമാണ് നൽകുന്നത്. വെനിസ്വേലയിലെ ഭൂകമ്പ ബാധിതർക്കായും പ്രിയപ്പെട്ടവരെ നഷ്ടപ്പെട്ടവർക്കായും ഇപ്പോഴും രക്ഷാപ്രവർത്തനം തുടരുന്ന ടീമുകൾക്കായും പ്രാർഥനകൾ തുടരുകയാണ്.
