റോമിലെ പേപ്പൽ ബസിലിക്കയായ സെന്റ് മേരി മേജർ ദൈവാലയത്തിലെ പൗളിൻ ചാപ്പലിന്റെ പുനരുദ്ധാരണ പ്രവർത്തനങ്ങൾ ആരംഭിക്കുന്നു. നവംബർ ആറിന് പുറത്തിറക്കിയ വാർത്താക്കുറിപ്പിലാണ് ചാപ്പലിലെ കലാസൃഷ്ടികൾ പുനരുദ്ധരിക്കുന്നതിനുള്ള പദ്ധതികൾ ബസിലിക്ക പ്രഖ്യാപിച്ചത്. നവംബർ 16 ന് ആരംഭിക്കുന്ന ഈ പദ്ധതി, വിപുലമായ സംരക്ഷണ ക്യാമ്പെയ്‌ന്റെ ഭാഗമായുള്ള നിരവധി പ്രവർത്തനങ്ങളിലൊന്നാണ്.
പണികൾ നടക്കുന്ന സമയത്ത് ഈ ചാപ്പൽ 90 ദിവസത്തേക്ക് അടച്ചിടും. റോമിലെ നാല് പ്രധാന ബസിലിക്കകളിലൊന്നായ ഇത്, എ ഡി 431 ൽ മറിയത്തെ ദൈവമാതാവായി പ്രഖ്യാപിച്ച എഫെസൂസ് കൗൺസിലിനു തൊട്ടുപിന്നാലെയാണ് നിർമ്മിക്കപ്പെട്ടത്. പടിഞ്ഞാറൻ മേഖലയിലെ പരിശുദ്ധ കന്യകാമറിയത്തിനായി സമർപ്പിക്കപ്പെട്ടിട്ടുള്ള ഏറ്റവും പഴക്കം ചെന്ന ദൈവാലയമായി കരുതപ്പെടുന്നതും ഈ ദൈവാലയം തന്നെയാണ്. വത്തിക്കാൻ സിറ്റി സ്റ്റേറ്റിന്റെ ഭരണവിഭാഗവുമായി (Governorate) സഹകരിച്ചാണ് ഈ പദ്ധതി നടപ്പിലാക്കുന്നത്. ചാപ്പലിന്റെ താഴികക്കുടത്തിലും (dome) അതിനു ചുറ്റുമുള്ള ചുവർചിത്രങ്ങളിലും കേന്ദ്രീകരിച്ചായിരിക്കും പുനരുദ്ധാരണ പ്രവർത്തനങ്ങൾ നടക്കുക.
പരിശുദ്ധ കന്യകാമറിയത്തെയും ഉണ്ണിയേശുവിനെയും ചിത്രീകരിക്കുന്ന, ‘സാലൂസ് പോപ്പുലി റൊമാനി’ എന്ന പുരാതന മരിയൻ ചിത്രവും പൗളിൻ ചാപ്പലിലാണ് സൂക്ഷിച്ചിരിക്കുന്നത്. സുവിശേഷകനായ വി. ലൂക്കായാണ് ഈ ചിത്രം നിർമ്മിച്ചതെന്നാണ് പാരമ്പര്യം. ഇതിന്റെ നിർമ്മിതിക്കു ശേഷം, വി. ഗ്രിഗറി ഒന്നാമൻ മാർപാപ്പയും ദൈവദാസനായ പയസ് പന്ത്രണ്ടാമൻ മാർപാപ്പയും ഉൾപ്പെടെയുള്ള നിരവധിയായ മാർപാപ്പമാർ ആരാധനാക്രമപരമായ പ്രദക്ഷിണങ്ങളിലൂടെയും അലങ്കാരങ്ങളിലൂടെയും ഈ ചിത്രത്തെ ആദരിച്ചിട്ടുണ്ട്. 1615 ൽ പോൾ അഞ്ചാമൻ മാർപാപ്പ ഈ ചിത്രം സൂക്ഷിക്കുന്നതിനായി സെന്റ് മേരി മേജർ ബസിലിക്കയിൽ മനോഹരമായ ഒരു ചാപ്പൽ നിർമ്മിക്കുകയും ഔദ്യോഗികമായി ചിത്രം അങ്ങോട്ട് മാറ്റുകയും ചെയ്തു.
