വത്തിക്കാൻ പ്രസ്സ് ഓഫീസ് പുറത്തിറക്കിയ പ്രസ്താവനയിൽ ഡോ. ലൂയിജി കാർബോണും പ്രൊഫസർ സ്റ്റെഫാനോ മാർഗരിത്തോറയും അറിയിച്ചതനുസരിച്ച്, മാർപാപ്പ ഒക്ടോബർ 13 ന് ഉച്ചയ്ക്കു ശേഷം ജെമെല്ലി ആശുപത്രിയിൽ നിശ്ചയിച്ചപ്രകാരം ശസ്ത്രക്രിയയ്ക്കു വിധേയനായി. മാർപാപ്പയുടെ ശ്വാസകോശത്തിന്റെ താഴത്തെ ലോബ് (lower lobe) ആണ് ശസ്ത്രക്രിയയിലൂടെ നീക്കം ചെയ്തത്.
ശസ്ത്രക്രിയയ്ക്കിടെ പരിശോധിച്ച ടിഷ്യു സാമ്പിളുകൾ, മുൻകൂട്ടി നടത്തിയ പരിശോധനകളിൽ ഡോക്ടർമാർ സംശയിച്ചിരുന്ന രോഗനിർണ്ണയം ശരിയാണെന്ന് സ്ഥിരീകരിച്ചു. “ശസ്ത്രക്രിയയ്ക്കിടെ നടത്തിയ ഹിസ്റ്റോളജിക്കൽ പരിശോധനയിൽ, പ്രീ-ഓപ്പറേറ്റീവ് പരിശോധനകളിൽ സംശയിച്ചതുപോലെ ലംഗ് അഡിനോകാർസിനോമ (lung adenocarcinoma) ആണെന്ന് സ്ഥിരീകരിച്ചു” എന്ന് ഡോക്ടർമാർ വ്യക്തമാക്കി.
മാർപാപ്പ ഏകദേശം മൂന്ന് മണിക്കൂറോളം ഓപ്പറേഷൻ തിയേറ്ററിൽ ഉണ്ടായിരുന്നു. ശസ്ത്രക്രിയയ്ക്കു മാത്രം ഏകദേശം 90 മിനിറ്റ് എടുത്തു. ശസ്ത്രക്രിയ വിജയകരമായിരുന്നുവെന്നും യാതൊരു സങ്കീർണ്ണതകളും ഉണ്ടായിരുന്നില്ലെന്നും ഡോക്ടർമാർ അറിയിച്ചു. ശസ്ത്രക്രിയയ്ക്കു ശേഷം മാർപാപ്പ സാധാരണ നിലയിൽ ബോധം വീണ്ടെടുത്തതായും ചെറിയൊരു നിരീക്ഷണ സമയത്തിനു ശേഷം ആശുപത്രിയിലെ പത്താം നിലയിലുള്ള മുറിയിലേക്ക് മാറ്റിയതായും പ്രസ്താവനയിൽ പറയുന്നു.
പ്രൊഫസർ സ്റ്റെഫാനോ മാർഗരിത്തോറയുടെ നേതൃത്വത്തിലുള്ള സംഘമാണ് ശസ്ത്രക്രിയ നടത്തിയത്. വരുംദിവസങ്ങളിൽ നീക്കം ചെയ്ത ടിഷ്യുവിൽ പോസ്റ്റ്-ഓപ്പറേറ്റീവ് പരിശോധനകൾ നടത്തുന്നതായിരിക്കും. എവിടെ, എങ്ങനെ ശസ്ത്രക്രിയ നടത്തണമെന്ന് പ്രീ-ഓപ്പറേറ്റീവ് പരിശോധനകൾ വഴി ഡോക്ടർമാർ നേരത്തെ തന്നെ തീരുമാനിച്ചിരുന്നു.
നേരത്തെ അറിയിച്ചതുപോലെ ഒരാഴ്ചത്തെ ആശുപത്രിവാസത്തിൽ യാതൊരു മാറ്റവും വരുത്തിയിട്ടില്ല. ഇന്ന് രാവിലെ വത്തിക്കാൻ പ്രസ്സ് ഓഫീസ് മാർപാപ്പയുടെ രാത്രിയിലെ ആരോഗ്യനിലയെക്കുറിച്ചും പരിശോധനാഫലങ്ങളെക്കുറിച്ചുമുള്ള പുതിയ വിവരങ്ങൾ പുറത്തുവിടുമെന്നാണ് പ്രതീക്ഷിക്കുന്നത്.
