പൊന്തിഫിക്കൽ അക്കാദമി ഓഫ് സയൻസിലെ അംഗങ്ങളുമായുള്ള കൂടിക്കാഴ്ചയിൽ, ആസ്ട്രോ കെമിസ്ട്രിയിൽ (ജ്യോതിർ രസതന്ത്രം) വൈദഗ്ധ്യം നേടിയ ഹാർവാർഡ് ശാസ്ത്രജ്ഞയായ കരിൻ ഐ. ഓബർഗിന് ലെയോ പതിനാലാമൻ പാപ്പ ‘പയസ് പതിനൊന്നാമൻ മെഡൽ’ സമ്മാനിച്ചു. സെപ്റ്റംബർ 24-ന് നൽകിയ ഈ അവാർഡ്, തങ്ങളുടെ ഗവേഷണത്തിലൂടെ കഴിവ് തെളിയിക്കുകയും സ്വന്തം മേഖലയിൽ അസാധാരണമായ പ്രതിഭ പ്രകടിപ്പിക്കുകയും ചെയ്യുന്ന 45 വയസ്സിൽ താഴെയുള്ള ശാസ്ത്രജ്ഞരെ ആദരിക്കുന്ന ഒന്നാണ്. മുൻപ് ഈ പുരസ്കാരം ലഭിച്ചവരിൽ പ്രമുഖരായ നൊബേൽ സമ്മാന വിജയികളും ഭൗതികശാസ്ത്രജ്ഞനായ സ്റ്റീഫൻ ഹോക്കിംഗും ഉൾപ്പെടുന്നു.
ഹാർവാർഡ് സർവകലാശാലയിൽ ‘തോമസ് ഡഡ്‌ലി കാബട്ട് പ്രൊഫസർ ഓഫ് നാച്ചുറൽ സയൻസസ്’ പദവി വഹിക്കുന്ന ഓബർഗ്, ഹാർവാർഡ്-സ്മിത്സോണിയൻ സെന്റർ ഫോർ ആസ്ട്രോ ഫിസിക്സിലെ ‘ഓബർഗ് ലബോറട്ടറി ഓഫ് ആസ്ട്രോ കെമിസ്ട്രി’ക്ക് നേതൃത്വം നൽകുന്നു. ഗ്രഹ രൂപീകരണത്തിലും രാസപരമായ ജീവാനുകൂല അന്തരീക്ഷത്തിലും (chemical habitability) നടക്കുന്ന രാസപ്രക്രിയകളിലാണ് അവരുടെ ഗവേഷണം പ്രധാനമായും ശ്രദ്ധ കേന്ദ്രീകരിക്കുന്നത്.
എന്നാൽ, ശാസ്ത്രീയ ജീവിതത്തിന് പുറമേ, കത്തോലിക്കാ വിശ്വാസത്തിലേക്കുള്ള തന്റെ പരിവർത്തനത്തെക്കുറിച്ചും അറിവിനായുള്ള തിരച്ചിൽ ദൈവവിശ്വാസത്തിലേക്കുള്ള വഴിയെ എങ്ങനെ സ്വാധീനിച്ചുവെന്നതിനെക്കുറിച്ചും ഓബർഗ് പരസ്യമായി സംസാരിച്ചിട്ടുണ്ട്. 2011-ൽ അഗസ്റ്റിൻ ഇൻസ്റ്റിറ്റ്യൂട്ടിന് നൽകിയ അഭിമുഖത്തിൽ, കേവലം പദാർഥകേന്ദ്രീകൃതമായ കാഴ്ചപ്പാടിനെ അംഗീകരിക്കുന്നത് ബുദ്ധിമുട്ടാക്കിയ ചില കാര്യങ്ങൾ ലോകത്തിലുണ്ടെന്ന് അവർ വിശദീകരിച്ചു.
“ഭൗതികവാദത്തെയോ ശുദ്ധമായ അസ്ഥിത്വത്തെയോ സംശയത്തോടെ വീക്ഷിക്കാൻ എന്നെ പ്രേരിപ്പിച്ച ചില വസ്തുതകൾ ഈ ലോകത്തിലുണ്ട്. ഈ ലോകത്ത് ഒരു ധാർമ്മിക യാഥാർഥ്യമുണ്ടെന്ന് (moral realism) എനിക്ക് വളരെ വ്യക്തമായി തോന്നി. അതായത്, ആളുകൾ എന്ത് കരുതുന്നു എന്നതിനെ ആശ്രയിച്ചല്ല, മറിച്ച് ശരിയും തെറ്റുമുള്ള ചില കാര്യങ്ങൾ ഇവിടെയുണ്ട്,” അവർ പറഞ്ഞു. “ആ പ്രക്രിയയിൽ, സി.എസ്. ലൂയിസിന്റെ ‘മിയർ ക്രിസ്ത്യാനിറ്റി’ (Mere Christianity) എന്ന പുസ്തകം വായിച്ചത് അതിൽ ഒരു പ്രധാന പങ്ക് വഹിച്ചു. ബ്രിട്ടീഷ് എഴുത്തുകാരനായ ലൂയിസിന്റെ ആശയങ്ങൾ വളരെ യുക്തിസഹമാണെന്ന് എനിക്ക് തോന്നി,” ഓബർഗ് പങ്കുവച്ചു.
എന്നിരുന്നാലും, ഓബർഗിനെ സംബന്ധിച്ചിടത്തോളം, ബുദ്ധിയുടെ തലത്തിൽ (intellectually) വിശ്വാസം സ്വീകരിക്കുന്നത് കൊണ്ട് മാത്രം കാര്യങ്ങൾ അവസാനിച്ചില്ല. “സ്നേഹവും കാരുണ്യവും പ്രവർത്തിക്കുക, വിശ്വാസമനുസരിച്ച് ജീവിക്കുക, ദൈവവുമായി യഥാർഥത്തിൽ ഒരു ബന്ധം കെട്ടിപ്പടുക്കുക എന്നിവയ്ക്കാണ് സമയമെടുത്തത്,” അവർ വിശദീകരിച്ചു.
ദൈവത്തെക്കുറിച്ച് ചർച്ച ചെയ്യുമ്പോൾ ശാസ്ത്രീയ രീതിയുടെ പരിധികളെക്കുറിച്ചും വ്യാപ്തിയെക്കുറിച്ചും ഈ ശാസ്ത്രജ്ഞ ചിന്തിച്ചിട്ടുണ്ട്. “ദൈവത്തെ തെളിയിക്കാനോ തള്ളിക്കളയാനോ ശാസ്ത്രീയ രീതി ഉപയോഗിക്കാൻ കഴിയില്ല,” ആ അഭിമുഖത്തിൽ അവർ വ്യക്തമായി പറഞ്ഞു. ഓബർഗിന്റെ കാഴ്ചപ്പാടിൽ, ശാസ്ത്രം എന്നത് ‘താൻ വളരെ പ്രധാനമായി കരുതുന്ന ഒന്നിനെ പ്രശംസിക്കാൻ നമ്മെ സഹായിക്കുന്നു.’
ശാസ്ത്രവും വിശ്വാസവും തമ്മിലുള്ള ബന്ധത്തെക്കുറിച്ചുള്ള അവരുടെ ധാരണയിൽ പ്രപഞ്ചത്തിന്റെ സൗന്ദര്യവും ഒരു വലിയ പങ്ക് വഹിക്കുന്നുണ്ട്. അതുകൊണ്ടു തന്നെ, ശാസ്ത്രവും വിശ്വാസവും പരസ്പരം എതിർക്കുന്ന വഴികളായി അവതരിപ്പിക്കപ്പെടേണ്ടതില്ലെന്ന് ഓബർഗ് വിശ്വസിക്കുന്നു. താൻ ഒരു കത്തോലിക്കാ വിശ്വാസിയാണെന്ന കാര്യത്തെക്കുറിച്ചും ഈ ശാസ്ത്രജ്ഞ തുറന്നു സംസാരിച്ചിട്ടുണ്ട്.
“കത്തോലിക്കയാണെന്ന കാര്യത്തിൽ ഞാൻ വളരെ തുറന്ന സമീപനമുള്ളവളാണ്,” അഭിമുഖത്തിൽ അവർ പറഞ്ഞു. അതേസമയം, ഈ തുറന്നുപറച്ചിൽ മറ്റുള്ളവരിൽ അടിച്ചേൽപിക്കുന്നതിന് പകരം അവരെ ആരോഗ്യകരമായ സംവാദങ്ങളിലേക്ക് നയിക്കാനാണ് താൻ ആഗ്രഹിക്കുന്നതെന്നും അവർ വിശദീകരിച്ചു.
“ആളുകളോട് പ്രസംഗിക്കുന്നതിന് പകരം, എന്നോട് വന്ന് സംസാരിക്കാൻ ആളുകളെ ക്ഷണിക്കാനും കാര്യങ്ങൾ തുറന്നുപറയാനുമാണ് ഞാൻ ശ്രമിക്കുന്നത്,” ഓബർഗ് പറഞ്ഞു.
ഡൊമിനിക്കൻ പാരമ്പര്യത്തോടും വി. തോമസ് അക്വിനാസിനോടും ഓബർഗിന് പ്രത്യേക ആഭിമുഖ്യമുണ്ട്. വിശ്വാസത്തെയും യുക്തിയെയും ഒന്നിച്ചു കൊണ്ടുപോകുന്ന തന്റെ രീതിയിൽ അക്വിനാസ് വളരെ പ്രധാനപ്പെട്ട ഒരു വ്യക്തിയാണെന്ന് അവർ എടുത്തുപറഞ്ഞു.
ഉപ്‌സാല സർവകലാശാലയിലെ മാക്രോ ഇക്കണോമിക്സ് വിദഗ്ധനും സാമ്പത്തിക ശാസ്ത്രജ്ഞനുമായ സഹോദരൻ എറിക് ഓബർഗ്, കരിന് ലഭിച്ച ഈ അംഗീകാരത്തെക്കുറിച്ച് തന്റെ ലിങ്ക്ഡ്ഇൻ (LinkedIn) അക്കൗണ്ടിലൂടെ പരസ്യമായി സന്തോഷം പങ്കുവച്ചുകൊണ്ട് കുറിച്ചു: “ഞാൻ അവളെയോർത്ത് വളരെ അഭിമാനിക്കുന്നു.”
