ഫ്രാൻസിലേക്കുള്ള തന്റെ സമീപകാല അപ്പസ്തോലിക സന്ദർശനം ആത്മീയവും സാമൂഹികവുമായ ഒരു ‘വീണ്ടെടുപ്പിന്റെ’ വലിയ അടയാളമായിരുന്നുവെന്ന് ലെയോ പതിനാലാമൻ മാർപാപ്പ. വത്തിക്കാനിലെ സെന്റ് പീറ്റേഴ്സ് സ്ക്വയറിൽ നടന്ന പൊതു കൂടിക്കാഴ്ചയിലാണ് സെപ്റ്റംബർ 25 മുതൽ 28 വരെ ഫ്രാൻസിലേക്ക് നടത്തിയ ചരിത്രപ്രസിദ്ധമായ യാത്രയെക്കുറിച്ച് പാപ്പ പങ്കുവച്ചത്.
2019 ലെ വിനാശകരമായ തീപിടുത്തത്തിന് ശേഷം അതിജീവനത്തിന്റെ ചിഹ്നമായി പുനർനിർമ്മിക്കപ്പെട്ട പാരീസിലെ നോട്ര ഡാം കത്തീഡ്രലിനെ ചൂണ്ടിക്കാണിച്ചാണ് പാപ്പ തന്റെ സന്ദേശം ആരംഭിച്ചത്. സഭയും ഭരണകൂടവും പൊതുജനങ്ങളും കൈകോർത്തപ്പോൾ സാധ്യമായ ഈ പുനരുദ്ധാരണം, പൊതുനന്മയ്ക്കായി എല്ലാവരും ഒന്നിക്കേണ്ടതിന്റെ ആവശ്യകതയാണ് ഓർമ്മിപ്പിക്കുന്നത്. മനോഹരമായ നിർമ്മിതികളേക്കാൾ യേശുക്രിസ്തുവിനെ സ്നേഹിക്കുന്ന മനുഷ്യരെന്ന ‘ജീവനുള്ള കല്ലുകളാലാണ്’ യഥാർഥ സഭ പണിതുയർത്തപ്പെട്ടിരിക്കുന്നതെന്ന് സ്റ്റേഡ് ഡി ഫ്രാൻസ് സ്റ്റേഡിയത്തിൽ ഒത്തുകൂടിയ എൺപതിനായിരത്തോളം യുവാക്കളെ സാക്ഷിയാക്കി ലെയോ പാപ്പ ഓർമ്മിപ്പിച്ചു.
തുടർന്ന് തന്റെ അപ്പസ്തോലിക സന്ദർശനത്തിന്റെ രണ്ടാം ഘട്ടമായ, “സ്നേഹത്തിന്റെ സംസ്കാരത്തിന്റെ തീർഥാടന കേന്ദ്രമായ” ലൂർദിലേക്കും അവിടുത്തെ പ്രശസ്തമായ മരിയൻ പുണ്യസങ്കേതത്തിലേക്കുമുള്ള തന്റെ യാത്രയെക്കുറിച്ച് പാപ്പ സംസാരിച്ചു. “ഏതൊരു അവസ്ഥയിലായാലും, എത്ര വലിയ ബലഹീനതയിലായാലും, ഓരോ മനുഷ്യജീവനും അതിന്റെ ലംഘിക്കപ്പെടാനാവാത്ത അന്തസ്സ് നിലനിർത്തുന്നുണ്ടെന്നും, മാനുഷിക അനുകമ്പയോടും ശാസ്ത്രം നൽകുന്ന മാർഗങ്ങളുടെ സഹായത്തോടും കൂടി അത് പരിചരിക്കപ്പെടാനും, കൂടെനിർത്തപ്പെടാനും, ദുരിതങ്ങളിൽ നിന്ന് ആശ്വാസം നൽകപ്പെടാനും അർഹതയുള്ളതാണെന്ന് ഞാൻ തുറന്നുപറയാൻ ആഗ്രഹിച്ച സന്ദേശമാണിത്.” പാപ്പ കൂട്ടിച്ചേർത്തു.
“തീപിടുത്തത്തിൽ പാരീസിലെ നോട്ര ഡാം കത്തീഡ്രലിന് സംഭവിച്ചതാണ് രണ്ടാം ലോകമഹായുദ്ധസമയത്ത് യൂറോപ്പിനും സംഭവിച്ചത് എന്ന് വേണമെങ്കിൽ പറയാം. യുദ്ധമുണ്ടാക്കിയ വിനാശത്തിന്റെ പശ്ചാത്തലത്തിൽ സമാധാനത്തിനായുള്ള ഒരു പദ്ധതിയായാണ് ആധുനിക യൂറോപ്പ് ജനിച്ചത്,” മാർപാപ്പ ഓർമ്മിച്ചു. രണ്ടാം ലോകമഹായുദ്ധത്തിൽ തകർന്നടിഞ്ഞ യൂറോപ്പിന്റെ അതിജീവനത്തെ അനുസ്മരിപ്പിച്ചുകൊണ്ട് മെറ്റ്സ് (Metz) നഗരത്തിൽ വച്ച് നടന്ന സംവാദത്തിൽ, സമാധാനത്തിനും സഹോദര്യത്തിനും വേണ്ടിയുള്ള ആഹ്വാനവും പാപ്പ മുന്നോട്ടുവച്ചു. വിവിധ മതനേതാക്കളുമായി ചേർന്ന് സമാധാനത്തിനായുള്ള “മെറ്റ്സ് അപ്പീൽ” ഒപ്പുവച്ചുകൊണ്ടാണ് അദ്ദേഹം സന്ദർശനം പൂർത്തിയാക്കിയത്.
“ലോകത്തിന് ജീവൻ ഉണ്ടാകേണ്ടതിന്” എന്ന പ്രമേയവുമായി നടത്തിയ ഈ സന്ദർശനം ലോകമെമ്പാടുമുള്ള സഭയ്ക്ക് പ്രത്യാശയുടെയും വിശ്വാസത്തിന്റെയും വലിയൊരു പ്രചോദനമായി മാറിയിരിക്കുകയാണ്. നമ്മുടെ വിശ്വാസത്തെ മടിയേതുമില്ലാതെ ലോകത്തിന് മുന്നിൽ പ്രഘോഷിക്കാൻ ലെയോ പതിനാലാമൻ മാർപാപ്പ വിശ്വാസികളെ ആഹ്വാനം ചെയ്തു.
