ഇന്തോനേഷ്യയിലുണ്ടായ ശക്തമായ ഭൂകമ്പത്തിൽ ദുരിതമനുഭവിക്കുന്ന ജനങ്ങൾക്ക് ലെയോ പതിനാലാമൻ മാർപാപ്പ പ്രാർഥനയും ആശ്വാസവും അറിയിച്ചു. ദുരന്തബാധിതർക്ക് സഹായങ്ങൾ എത്തിക്കുന്ന രക്ഷാപ്രവർത്തകർക്കും പ്രാദേശിക അധികാരികൾക്കും മാർപാപ്പ പിന്തുണ വാഗ്ദാനം ചെയ്തു. ആഗസ്റ്റ് 15 ന് 7.7 തീവ്രത രേഖപ്പെടുത്തിയ ഭൂകമ്പത്തിൽ മരണം 68 ഓളം ആയി ഉയർന്നു.
ഭൂകമ്പത്തിൽ 213 ഓളം പേർക്ക് പരിക്കേറ്റിട്ടുണ്ട്. നിരവധി വീടുകളും സ്കൂളുകളും ആരാധനാലയങ്ങളും തകരുകയും പതിനായിരക്കണക്കിന് ആളുകൾ ഭവനരഹിതരാകുകയും ചെയ്തു. ആദ്യ ഭൂകമ്പത്തിന് ശേഷം 1500 ലധികം തുടർചലനങ്ങളാണ് പ്രദേശത്ത് അനുഭവപ്പെട്ടത്.
ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങളെ മാർപാപ്പ തന്റെ പ്രാർഥനകളിൽ സ്മരിക്കുകയും ആശ്വസിപ്പിക്കുകയും ചെയ്തു. ദുരിതാശ്വാസ പ്രവർത്തനങ്ങൾ വേഗത്തിലാക്കാൻ ഇന്തോനേഷ്യൻ ഭരണകൂടവും വിവിധ ഏജൻസികളും നിലവിൽ രംഗത്തുണ്ട്. തകർന്ന റോഡുകൾ ഗതാഗതയോഗ്യമാക്കാനും ജനങ്ങളെ സുരക്ഷിത സ്ഥാനങ്ങളിലേക്ക് മാറ്റാനുമുള്ള ശ്രമങ്ങൾ ഊർജ്ജിതമായി നടക്കുകയാണ്.
