ലോകമെമ്പാടും നിലനിൽക്കുന്ന പട്ടിണി മാനവ അന്തസ്സിന് നേരേയുള്ള ഭയാനകമായ കടന്നുകയറ്റമാണെന്ന് ലെയോ പതിനാലാമൻ പാപ്പ പറഞ്ഞു. ഒക്ടോബർ 16 ന് ആചരിച്ച ലോകഭക്ഷ്യദിനത്തോടനുബന്ധിച്ച് പുറത്തിറക്കിയ സന്ദേശത്തിൽ ആണ് പാപ്പ ഇക്കാര്യം വ്യക്തമാക്കിയത്. റോമിലെ ജെമെല്ലി ആശുപത്രിയിൽ ശസ്ത്രക്രിയയ്ക്ക് ശേഷമാണ് മാർപാപ്പ ഐക്യരാഷ്ട്രസഭയുടെ ഭക്ഷ്യ-കാർഷിക സംഘടനയുടെ (FAO) ഡയറക്ടർ ജനറൽ ക്യു ഡോങ്യുവിന് ഈ സന്ദേശം അയച്ചത്.
“ആവശ്യത്തിന് ഭക്ഷണം ലഭിക്കുക എന്നത് അടിസ്ഥാനപരമായ ഒരു മാനുഷിക അവകാശമാണ്. ആർക്കെങ്കിലും അപ്പം എത്തുന്നതിന് തടസ്സം നിൽക്കുന്നതും അത് ഉൽപ്പാദിപ്പിക്കുന്നതിനുള്ള മാർഗങ്ങൾ നശിപ്പിക്കുന്നതും മാനവ അന്തസ്സിന് നേരേയുള്ള ഭയാനകമായ അപരാധമാണ്”- പാപ്പ പറഞ്ഞു. തന്റെ സന്ദേശത്തിൽ, ലോകത്തിലെ പട്ടിണിയെക്കുറിച്ച് മാർപാപ്പ ദുഃഖം രേഖപ്പെടുത്തി. ഭക്ഷണത്തിന് ക്ഷാമം നിലനിൽക്കുമ്പോൾ സാങ്കേതികവിദ്യയുടെ വളർച്ചയെക്കുറിച്ച് സംസാരിക്കുന്നത് എങ്ങനെയെന്ന് പാപ്പ ചോദിച്ചു.
“പട്ടിണി എന്നത് വെറുമൊരു സ്ഥിതിവിവരക്കണക്കിലെ അപാകതയായി കാണാൻ കഴിയില്ല. രാഷ്ട്രീയ ഇച്ഛാശക്തിയുടെയും കൂട്ടായ സ്നേഹത്തിന്റെയും കുറവാണ് ഇതിന് പ്രധാന കാരണം,” മാർപാപ്പ പറഞ്ഞു. സാങ്കേതിക വികസനവും നവീകരണവും കേവലം സാമ്പത്തിക ലാഭത്തിന് വേണ്ടി മാത്രമാകരുതെന്നും, അത് മനുഷ്യന്റെ അന്തസ്സിനെയും പൊതുനന്മയെയും സംരക്ഷിക്കുന്നതിനാകണമെന്നും പാപ്പ കൂട്ടിച്ചേർത്തു
