1997 ൽ വിഖ്യാത ഇറാനിയൻ സംവിധായകൻ മജീദ് മജീദി (Majid Majidi) ഒരുക്കിയ ‘ചിൽഡ്രൻ ഓഫ് ഹെവൻ’ (Children of Heaven) എന്ന ചലച്ചിത്രം സ്നേഹത്തിന്റെയും ത്യാഗത്തിന്റെയും ലാളിത്യത്തിന്റെയും അപൂർവമായ ഒരു വൈകാരിക അനുഭവമാണ് സമ്മാനിക്കുന്നത്. ദാരിദ്ര്യത്തിന്റെ കയ്പുനീരിനിടയിലും പരസ്പരസ്നേഹവും ധാർമ്മികതയും കാത്തുസൂക്ഷിക്കുന്ന രണ്ട് കൊച്ചുകുട്ടികളുടെ കഥയിലൂടെ മനുഷ്യബന്ധങ്ങളുടെ ആഴവും വിശുദ്ധിയും ചിത്രം വളരെ ആർദ്രമായി വരച്ചുകാട്ടുന്നു. ടെഹ്റാനിലെ ഒരു സാധാരണ തെരുവിന്റെ പശ്ചാത്തലത്തിലാണ് ഈ കഥ വികസിക്കുന്നത്.
അലി എന്ന മൂന്നാം ക്ലാസ്സുകാരൻ തന്റെ അനിയത്തി സഹ്രയുടെ ഷൂസ് നഷ്ടപ്പെടുത്തുന്നിടത്താണ് സിനിമ ആരംഭിക്കുന്നത്. കടുത്ത സാമ്പത്തിക ബുദ്ധിമുട്ടുകൾ നേരിടുന്ന കുടുംബത്തിൽ, പുതിയൊരു ഷൂസ് വേണമെന്ന് ആവശ്യപ്പെടാൻ ആ കുഞ്ഞുങ്ങൾക്ക് കഴിയില്ലായിരുന്നു. അച്ഛന്റെ ശകാരം ഭയന്നും കുടുംബത്തിന്റെ പ്രയാസങ്ങൾ മനസ്സിലാക്കിയും ഷൂസ് നഷ്ടപ്പെട്ട വിവരം അവര് മാതാപിതാക്കളിൽ നിന്ന് മറച്ചുവയ്ക്കുന്നു.
തുടർന്ന് തങ്ങളുടെ പക്കലുള്ള അലിയുടെ ഏക ജോഡി സ്പോർട്സ് ഷൂസ് (Sneakers) രണ്ടുപേരും മാറിമാറി ഉപയോഗിക്കാൻ അവർ തീരുമാനമെടുക്കുകയാണ്. രാവിലെ സഹ്ര സ്കൂളിൽ പോയി തിരിച്ചെത്തിയ ശേഷം അതേ ഷൂസ് ധരിച്ച് അലി ഉച്ചയ്ക്കത്തെ ഷിഫ്റ്റിൽ സ്കൂളിലേക്ക് ഓടുന്നു. കൃത്യസമയത്ത് സ്കൂളിലെത്താൻ തെരുവുകളിലൂടെ അലി നടത്തുന്ന നെട്ടോട്ടങ്ങൾ ഏത് പ്രേക്ഷകന്റെയും നെഞ്ചകം തകർക്കുന്ന കാഴ്ചയാണ്. തങ്ങളുടെ ഷൂസ് മറ്റൊരാൾ ധരിച്ചിരിക്കുന്നത് കണ്ട് അന്വേഷിച്ചു ചെല്ലുമ്പോൾ ആ കുട്ടിയുടെ അച്ഛൻ കാഴ്ചയില്ലാത്ത ആളാണെന്ന് തിരിച്ചറിഞ്ഞ് അവർ മടങ്ങുന്നത് ആ ഇളംമനസ്സുകളിലെ അപാരമായ അനുകമ്പ വെളിപ്പെടുത്തുന്നു.
ദൈനംദിന ജീവിതത്തിലെ കൊച്ചുകൊച്ചു സങ്കടങ്ങൾക്കിടയിലും മാതാപിതാക്കളെ സഹായിക്കാനും അവർ തമ്മിലുള്ള സഹോദരബന്ധം സുദൃഢമാക്കാനും അവർ ശ്രമിക്കുന്നു. അച്ഛനോടൊപ്പം നഗരത്തിലെ സമ്പന്നമായ വസതികളിൽ തോട്ടം പണിക്കു പോകുന്ന അലി, ആധുനികലോകത്തിന്റെ പ്രൗഢിക്കു മുന്നിലും തന്റെ ലാളിത്യവും ആത്മാർഥതയും കൈവിടുന്നില്ല.
ഇതിനിടയിലാണ് സ്കൂളിൽ ഒരു ഓട്ടമത്സരം പ്രഖ്യാപിക്കപ്പെടുന്നത്. അതില് മൂന്നാം സ്ഥാനം നേടുന്നയാൾക്ക് സമ്മാനമായി ലഭിക്കുന്നത് ഒരു ജോഡി ഷൂസ് ആണെന്ന് അലി മനസ്സിലാക്കി. ആദ്യ സ്ഥാനക്കാരനാകാനല്ല, മറിച്ച് തന്റെ പെങ്ങൾക്ക് ഒരു ജോഡി ഷൂസ് സമ്മാനിക്കാൻ വേണ്ടി മാത്രമായി മൂന്നാം സ്ഥാനക്കാരനാകാൻ അലി മത്സരിക്കാനിറങ്ങുകയാണ്. മത്സരത്തിൽ വേഗത്തില് ഓടുന്ന അലി, ആകസ്മികമായി ഒന്നാം സ്ഥാനക്കാരനായി ഫിനിഷ് ചെയ്യുന്നു. തനിക്ക് ഒന്നാം സ്ഥാനം ലഭിച്ചുവെന്നോർത്ത് എല്ലാവരും സന്തോഷിക്കുമ്പോൾ, സഹ്രയ്ക്ക് ഷൂസ് നേടിക്കൊടുക്കാൻ കഴിഞ്ഞില്ലല്ലോ എന്നോർത്ത് വിങ്ങിപ്പൊട്ടുന്ന അലിയുടെ ചിത്രം പ്രേക്ഷകരുടെ കണ്ണുകളെ ഈറനണിയിക്കുന്നതാണ്.
വീട്ടിലെത്തി നിരാശയോടെ ഇരിക്കുന്ന അലിക്കു മുന്നിൽ നിശ്ശബ്ദയായി ഇരിക്കുന്ന സഹ്രയും, തുടർന്ന് നീരുവന്ന തന്റെ പാദങ്ങൾ കുളത്തിലെ വെള്ളത്തിലേക്ക് ഇറക്കിവയ്ക്കുന്ന അലിയുടെ ദൃശ്യവും ചിത്രത്തിന്റെ കാവ്യാത്മകമായ ക്ലൈമാക്സാണ്. അലിയുടെ ക്ഷീണിതമായ കാലുകളിൽ വന്ന് തൊടുന്ന ആ കൊച്ച് സ്വർണ്ണമീനുകൾ അവൻ അനുഭവിച്ച സങ്കടങ്ങൾക്കുള്ള പ്രകൃതിയുടെ ആശ്വാസസ്പർശമായി മാറുന്നു.
ഈ ചലച്ചിത്രം മുന്നോട്ടുവയ്ക്കുന്നത്, പണത്തിനപ്പുറം കുടുംബബന്ധങ്ങളിൽ ഉണ്ടായിരിക്കേണ്ടത് സ്നേഹവും പരസ്പര ധാരണയും ത്യാഗമനോഭാവവുമാണ് എന്ന സന്ദേശമാണ്. ദാരിദ്ര്യം എത്ര കഠിനമാണെങ്കിലും തങ്ങളുടെ ആത്മാഭിമാനവും ധാർമ്മികമൂല്യങ്ങളും അടിയറവ് വയ്ക്കാൻ അലിയും സഹ്രയും തയ്യാറാകുന്നില്ല. ഈ കുഞ്ഞുങ്ങളുടെ മനസ്സിലുള്ള ആത്മാർഥതയും നന്മയും മുതിർന്നവർക്ക് വലിയൊരു പാഠമാണ്.
അതോടൊപ്പം തന്നെ, ചെറിയ കാര്യങ്ങളിൽ പോലും വലിയ സന്തോഷങ്ങൾ കണ്ടെത്താനും മറ്റുള്ളവരുടെ വിഷമങ്ങൾ കണ്ടറിഞ്ഞ് സഹായിക്കാനുമുള്ള മനസ്സാണ് ജീവിതത്തിന്റെ യഥാർഥ ഐശ്വര്യമെന്നും ഈ ചിത്രം ഓർമ്മിപ്പിക്കുന്നു. പരാജയങ്ങളിലും നിരാശകളിലും തളർന്നുപോകാതെ, സ്നേഹത്തിന്റെ കരുത്തിൽ ഏത് പ്രതിസന്ധിയെയും മറികടക്കാമെന്ന സന്ദേശമാണ് ‘ചിൽഡ്രൻ ഓഫ് ഹെവൻ’ നമ്മൾക്ക് നൽകുന്നത്. എത്ര ഇരുണ്ട വഴികളിലൂടെ നടന്നാലും, നന്മ നിറഞ്ഞ മനസ്സുകൾക്കു മുന്നിൽ പ്രതീക്ഷയുടെ വെളിച്ചം തെളിയുക തന്നെ ചെയ്യും.
ഫാ. ജി. കടൂപ്പാറയിൽ MCBS
