2020 ൽ പുറത്തിറങ്ങിയ ‘ദ കോൾ ഓഫ് ദ വൈൽഡ്’ (The Call of the Wild) എന്ന ചലച്ചിത്രം ജാക്ക് ലണ്ടന്റെ പ്രശസ്തമായ നോവലിനെ ആസ്പദമാക്കി നിർമ്മിച്ച ഒന്നാണ്. മനുഷ്യനും പ്രകൃതിയും തമ്മിലുള്ള ആത്മബന്ധം, അതിജീവനത്തിന്റെ പാഠങ്ങൾ, ആന്തരികമായ വിളികൾ എന്നിവയെല്ലാം മനോഹരമായി കോർത്തിണക്കിയ ഈ ചിത്രം ഹൃദയത്തെ സ്പർശിക്കുന്ന ഒരു ദൃശ്യവിരുന്നാണ്. കാലിഫോർണിയയിലെ സുഖലോലുപമായ ജീവിതത്തിൽ നിന്ന് അലാസ്കയിലെ പരുക്കൻ മഞ്ഞുമൂടിയ മലനിരകളിലേക്ക് യാദൃശ്ചികമായി എത്തിച്ചേരുന്ന ‘ബക്ക്’ എന്ന വളർത്തുനായയുടെ അതിജീവനത്തിന്റെയും സ്വയം കണ്ടെത്തലിന്റെയും കഥയാണ് ഈ സിനിമ പറയുന്നത്.
കാലിഫോർണിയയിലെ ഒരു ജഡ്ജിയുടെ വീട്ടിൽ സുഖകരമായ ജീവിതം നയിച്ചിരുന്ന ബക്ക് എന്ന വലിയ നായയെ, മോഷ്ടിച്ച് അലാസ്കയിലേക്ക് കൊണ്ടുപോകുന്നതോടെയാണ് കഥയുടെ ഗതി മാറുന്നത്. ക്രൂരരായ മനുഷ്യരുടെ കൈകളിൽപെട്ട് കഷ്ടപ്പാടുകൾ അനുഭവിക്കുമ്പോഴും, തന്റെ ഉള്ളിലെ കരുത്തും അതിജീവനശേഷിയും ബക്ക് തിരിച്ചറിയുന്നു. പല ഉടമകളിലൂടെ കൈമാറ്റം ചെയ്യപ്പെട്ടുപോകുന്ന ബക്കിന്റെ ജീവിതം ജോൺ തോർട്ടൺ എന്ന മനുഷ്യനുമായുള്ള സൗഹൃദത്തിലൂടെ വഴിമാറുന്നു. പ്രകൃതിയുടെ വന്യമായ വിളിക്കു പിന്നാലെ സഞ്ചരിച്ച് ഒടുവില്, തന്റെ യഥാർഥ സ്വത്വവും പൂർവീകരുടെ വഴികളും ബക്ക് കണ്ടെത്തുന്നത് സിനിമയുടെ ഏറ്റവും മനോഹരമായ കാഴ്ചയാണ്.
ഈ കഥയിൽ ബക്ക് എന്നത് കേവലം ഒരു മൃഗമല്ല, മറിച്ച് പ്രതിസന്ധികളെ തരണം ചെയ്ത് മുന്നേറുന്ന ഏതൊരു മനുഷ്യന്റെയും പ്രതീകമാണ്. ജീവിതം നമ്മെ എത്രമാത്രം തളർത്തിയാലും, യാതനകളുടെ മഞ്ഞുകാലം എത്ര കഠിനമായാലും, ഉള്ളിലെ ആത്മവിശ്വാസം കൈവിടാതെ മുന്നോട്ടുപോകണമെന്ന് ബക്ക് നമ്മെ പഠിപ്പിക്കുന്നു. മനുഷ്യന്റെ ക്രൂരതകളും വഞ്ചനയും അനുഭവിച്ചറിഞ്ഞിട്ടും സ്നേഹിക്കാനും വിശ്വസിക്കാനുമുള്ള കഴിവ് ബക്ക് കൈവിട്ടുകളയുന്നില്ല. പ്രതികൂലസാഹചര്യങ്ങളെ നിരാശയോടെ നോക്കാതെ, അവയെ വിജയത്തിലേക്കുള്ള ചവിട്ടുപടികളാക്കി മാറ്റാൻ ബക്കിന്റെ ജീവിതയാത്ര നമുക്ക് പ്രചോദനമാകുന്നു.
ഈ സിനിമയുടെ ഏറ്റവും ശ്രദ്ധേയമായ മറ്റൊരു വശം പ്രകൃതിയോടുള്ള ബന്ധമാണ്. ആധുനിക മനുഷ്യൻ കോൺക്രീറ്റ് കാടുകളിൽ അകപ്പെട്ടു പോകുമ്പോൾ, പ്രകൃതിയുടെ മാറോടണയാനും അതിന്റെ വന്യമായ സൗന്ദര്യത്തെയും നിഗൂഢതകളെയും അറിയാനും ശ്രമിക്കണമെന്ന് ബക്കിന്റെ ജീവിതം ഓർമ്മിപ്പിക്കുന്നു. കാടിന്റെയും പ്രകൃതിയുടെയും വിളി കേട്ട് സ്വന്തം കൂട്ടത്തിലേക്ക് മടങ്ങുന്ന ബക്ക്, ഒരു രീതിയില് നോക്കുകയാണെങ്കില് ആത്മീയമായ സ്വാതന്ത്ര്യമാണ് നേടുന്നത്. പ്രകൃതി നമ്മെ എപ്പോഴും സ്വാഗതം ചെയ്യുന്നുണ്ടെന്നും, അതിലേക്ക് തിരിഞ്ഞുനോക്കുമ്പോൾ മാത്രമേ നമ്മുടെ മനസ്സിന് ശാന്തി ലഭിക്കൂ എന്നും ഈ ചിത്രം നമ്മെ ബോധ്യപ്പെടുത്തുന്നു.
ഈ സിനിമ നമ്മുടെ ഉൾവിളികളെയും ലക്ഷ്യബോധത്തെയും കുറിച്ചും നമ്മെ ഓർമ്മിപ്പിക്കുന്നു. എല്ലാവർക്കും അവരവരുടേതായ ഒരു വിളിയും ദൗത്യവും ഉണ്ടെന്നും, അത് ശ്രവിക്കാനും അതിനായി യാത്ര തിരിക്കാനും ധൈര്യം വേണമെന്നും ബക്കിന്റെ കഥ വ്യക്തമാക്കുന്നു. സൗകര്യങ്ങളുടെ സുരക്ഷിതത്വത്തിൽ ഒതുങ്ങിക്കൂടാതെ, അജ്ഞാതമായ വഴികളിലൂടെ സഞ്ചരിക്കാൻ ഭയപ്പെടാത്തവരാണ് യഥാർഥ വിജയം നേടുന്നത് എന്ന കാര്യം നമ്മള് വിസ്മരിക്കാന് പാടില്ല.
‘ദ കോൾ ഓഫ് ദ വൈൽഡ്’ നമ്മെ ഏറ്റവും കൂടുതല് പഠിപ്പിക്കുന്നത് നിശ്ചയദാർഢ്യത്തിന്റെ ശക്തിയെക്കുറിച്ചാണ്. യാതനകളും വേദനകളും നിറഞ്ഞ വഴികളിലൂടെ സഞ്ചരിക്കുമ്പോഴും സ്നേഹവും സത്യസന്ധതയും കൈവിടാത്ത ഒരു മനസ്സ് നമ്മിലുണ്ടാകണം. ജീവിതത്തിന്റെ ഏത് കെട്ട കാലത്തും നമ്മെ നയിക്കാൻ ഉള്ളിലൊരു വെളിച്ചമുണ്ടെന്ന് ഓര്ക്കണം. ആ വെളിച്ചത്തെ തിരിച്ചറിയുകയും പ്രകൃതിയോടും ചുറ്റുമുള്ള ജീവജാലങ്ങളോടും ഇണങ്ങി ജീവിക്കുകയും ചെയ്യുമ്പോൾ ജീവിതം അർഥവത്തായിത്തീരും. പുറംലോകത്തിന്റെ ശബ്ദങ്ങളേക്കാൾ നമ്മുടെ ഉള്ളിലെ നിശ്ശബ്ദമായ വിളി കേൾക്കാൻ ഈ സിനിമ നമുക്ക് പ്രചോദനം നൽകുന്നു.
ഫാ. ജി. കടൂപ്പാറയിൽ MCBS
