“നിങ്ങൾ ഒരു ദുഷ്കരമായ സാഹചര്യത്തിലൂടെ കടന്നുപോകുകയാണെങ്കിൽ അത് ദൈവത്തിൽ ഭരമേൽപ്പിക്കാൻ മടിക്കരുത്: എല്ലാ ദിവസവും ഒരു ജപമാല ചൊല്ലുക, മാതാവ് നിങ്ങൾക്ക് ഉത്തരം നൽകട്ടെ.” ഡോ. ജോസ് ജോർജ് മായ എന്ന കത്തോലിക്കാ ഡോക്ടറിന്റെ വാക്കുകളാണിത്. ജപമാല ചൊല്ലുന്നതിന്റെ ആരോഗ്യ ഗുണങ്ങളും അത് ആളുകളുടെ ജീവിതത്തിൽ വരുത്തുന്ന മാറ്റങ്ങളും വിശദീകരിക്കുന്ന ഒരു വീഡിയോ, ഇന്റേണിസ്റ്റ് ഡോ. ജോസ് ജോർജ് മായ തന്റെ വ്യക്തി ജീവിതത്തിൽ നിന്നും പ്രൊഫഷണൽ അനുഭവത്തിൽ നിന്നും പങ്കിട്ടു.
തന്റെ പുതിയ വീഡിയോയിൽ ജപമാല ചൊല്ലുന്നത് കണ്ട് പലരും അത്ഭുതപ്പെട്ടുവെന്ന് ഡോ. മായ തന്റെ ഇൻസ്റ്റാഗ്രാം അക്കൗണ്ടിൽ കുറിച്ചു. “ഒരു ഡോക്ടർ എന്ന നിലയിൽ, ജപമാല ചൊല്ലുന്നത് നിങ്ങളുടെ ആരോഗ്യത്തിന് എന്ത് ഗുണങ്ങൾ നൽകുമെന്ന് പരിശോധിക്കാൻ ഞാൻ ആഗ്രഹിച്ചു. ജപമാല ചൊല്ലുമ്പോൾ ശ്വസനനിരക്കും ഹൃദയമിടിപ്പും കുറയുന്നു. അത്, ഹൃദയ, ശ്വസനവ്യവസ്ഥകൾക്കിടയിൽ മികച്ച സമന്വയത്തിന് അനുവദിക്കുന്നു. രക്തസമ്മർദത്തിൽ മാറ്റങ്ങളുണ്ട്, രക്തത്തിൽ കൂടുതൽ ഓക്സിജൻ ഉണ്ടാകുന്നു. ഇത് ശാന്തതയും ക്ഷേമവും പ്രദാനം ചെയ്യുന്നുവെന്ന് മാത്രമല്ല, ആരോഗ്യ ഗുണങ്ങളുമായി ബന്ധപ്പെട്ടിരിക്കുന്നു. ജപമാല ആളുകളെ സുഖപ്പെടുത്താൻ സഹായിക്കും.” ഡോ. മായ വിശദീകരിച്ചു.
“ഗുണപരമായ പഠനങ്ങളിൽ, ഇത് തെളിയിക്കപ്പെട്ടിട്ടുണ്ട്: പതിവായി ജപമാല ചൊല്ലുന്ന ആളുകൾക്ക്, അത് ദിവസവും ചൊല്ലാത്തവരെ അപേക്ഷിച്ച്, ക്ഷേമം, സമാധാനം, സംതൃപ്തി എന്നിവയെക്കുറിച്ചുള്ള മികച്ച ധാരണയുണ്ടാകും. ഒരു വൈദ്യശാസ്ത്ര രീതിയായി ഇത് ഔപചാരികമായി ശുപാർശ ചെയ്യാൻ ശാസ്ത്രീയ തെളിവുകൾ ഇപ്പോഴും പര്യാപ്തമല്ലെന്ന് സമ്മതിക്കുന്നു. എങ്കിലും വ്യക്തിപരമായ തലത്തിൽ, തന്റെ നിഗമനങ്ങൾ വളരെ വ്യത്യസ്തമാണ്.” അദ്ദേഹം വ്യക്തമാക്കി.
“ഒരു വ്യക്തി എന്ന നിലയിൽ, ഞാൻ മിക്കവാറും എല്ലാ ദിവസവും ജപമാല ചൊല്ലാൻ തുടങ്ങിയതുമുതൽ, പഠനങ്ങളിൽ പരാമർശിക്കുന്ന സമാധാനവും ക്ഷേമവും മാത്രമല്ല, ഉത്തരങ്ങളും ആശ്വാസവും വിശ്വാസവും ഞാൻ കണ്ടെത്തിയിട്ടുണ്ടെന്ന് എനിക്ക് നിങ്ങളോട് പറയാൻ കഴിയും.” ദുഷ്കരമായ സമയങ്ങളിലൂടെ കടന്നുപോകുന്നവർക്ക് അദ്ദേഹം ചില ഉപദേശങ്ങൾ നൽകി: “നിങ്ങൾ ഭയം, അനിശ്ചിതത്വം അല്ലെങ്കിൽ സംശയം തോന്നുന്ന ഒരു ദുഷ്കരമായ സാഹചര്യത്തിലൂടെ കടന്നുപോകുകയാണെങ്കിൽ, അത് ദൈവത്തിൽ ഭരമേൽപ്പിക്കാൻ മടിക്കരുത്: എല്ലാ ദിവസവും ഒരു ജപമാല ചൊല്ലുക, മാതാവ് നിങ്ങൾക്കുവേണ്ടി ഉത്തരം നൽകട്ടെ.”
ഈ വീഡിയോ സോഷ്യൽ മീഡിയയിൽ വളരെ പെട്ടെന്ന് വൈറലായി, ഒരു ദിവസം കൊണ്ട് 37,000-ത്തിലധികം ലൈക്കുകൾ ലഭിച്ചു. ഡോ. മായയുടെ സാക്ഷ്യത്തിന് നന്ദി പറഞ്ഞും ജപമാല ചൊല്ലുന്നതിനെക്കുറിച്ചുള്ള സ്വന്തം അനുഭവങ്ങൾ പങ്കുവച്ചും ഉപയോക്താക്കൾ നിരവധി സന്ദേശങ്ങൾ അയച്ചു.
